Penani Maramba 2 - Wunta Mempori

¹ Ongkue bunga rosi inso i Saroni, sisi bonse i lembo-lembono.

² Kana sisi bonse i olono ewo rui, kanatuumo pinehohawaku i olodo ana beine.

³ Kana keu apeli i olodo keu a ntobu, kanatuumo pinehohawaku i olodo mangalitau. Itotono inengoino aku mingki mentoro, wuano ipemo'ahio langiraku.

⁴ Iwawa akumo a raha anggoro, ka banderano i wawoku onaemo pompehohawa.

⁵ Pokorosoakunemo kukisi kisimisi, pokomadooakunemo wua apeli, hangano mahaki ntekewoi aku.

⁶ Kae manggalino kongko i totono uluku, kae ngkoanano kumopui aku.

⁷ Ku'emao ntu'u, luwuno ana beine i Yerusale, hangano lagiwa ke rusa waino anu mo'ila: si mpokontesingkao ka mpokontensilao pompehohawa se'eluno napi ineheno!

A mpewowano umbu ngkoroi beine

⁸ Rongeomo! Pinehohawaku! Kitaomo, onae hawe, melonso-lonso a wawo ntorukuno, melonso-lonso a wawo pongku.

⁹ Pinehohawaku kana lagiwa, ke anano rusa. Kitaomo, onae mentade i asambalino rereto, saru mentango a mpentangoa ka mesimi inso a tarali.

¹⁰ Pinehohawaku mompu'u mepau ndi ongkue, ”Pewangumo pinehohawaku, pinetekosiku, aiwamo!

¹¹ Hangano, kitaomo, tempo morini telaloomo, usa temonto ka laloomo.

¹² A mpada mpe'umbaako iramo sisi, tempo pogontia haweomo; unino wurokou teronge i witato.

¹³ Keu ara mompu'u mewua, ka sisino keu anggoro tewuha woono. Pewangumo, pinehohawaku, tekosiku, aiwamo!

¹⁴ Marapatiku i olo-olono watu a mpewunia i laano torukuno, popokitaomo rupamu, poporongeomo suaramu! Molino ntu'u suaramu ka tekosi rupamu!”

¹⁵ Rakoakamimo dahu-dahu, dahu-dahu kodei, anu sumolangi ira lere anggoro, lere anggoromami anu tekonai mensisi!

¹⁶ Ongkuemo me'ueo pinehohawaku, ka ongkue onae me'ueo anu mompakambi bimba i tonga-tongano sisi bonse.

¹⁷ Se'eluno napi pepuuri angi ngkiniwia ka eo-eo moliu, pekulemo, pinehohawaku, gagimo kana lagiwa, ke kana anano rusa a wawo ntorukuno pinopaho rampa-rampa!