Penani Maramba 1 - Wunta Mempori

¹ Penani Maramba inso ndi Solema.

Pau pompehohawano asa ana beine

² Po'ineeomo ka iwoo-wooakune wiwino, hangano pompehohawamu mo'ahiopo sekono anggoro.

³ Mana mo'ahino woono lanamu, kana lana anu te'uwu neemu, onaemo pu'uno ka dompehohawako ana beine!

⁴ Padii akumo i bungkumu, aiwamo topontuturako! Dowawa akumo mokole a laro bolongko mpo'iangado. Kami memaroa mpebooli ka memawongko hangano omue, kami umunde-undeo pompehohawamu laluaopo sekono anggoro! Lano tekona dompehohawako!

⁵ Ongkue lano mo'ito, sine tekosi, hei ana beine i Yerusale, kana luwuno kemado to Kedari, kana luwuno sawu pelingono i Solema.

⁶ Si mpekokoongakono nine ongkue mo'ito, hangano mokulano oleo mokomo'ai aku. Ana ntamado ineku mentekuda ndi ongkue, ka mpokogagi aku puu mpodagai luwuno lere anggoro; lere anggoroku ongkueku nahi kudagaio.

⁷ Tutuluakunemo, tedontaano aroaku, isua aka upompakambi bimba, isua aka upo'inee ira bimba mpepombole tempono ngkiniwia. Tembio ongkue asalakono mesoumbu umpeda a bawaano bimbado wali-walimu?

⁸ Tewala nahi uto'orio, hei tekosi i olodo beine, tondaomo hangado bawaano bembe bimba, ka pakambi iramo ana bembemu umpeda a mpekemaado puu mpopakambi.

Orua mia mambepehohawa singge umunde-undeo walino 1:9–2:7

⁹ Kana ngara waino a ngkaretano i Pirao kupongkenako, pinehohawaku.

¹⁰ Tekosiomo kombisimu hangano peramba-ramba ka we'umu hangano enu-enu.

¹¹ Kami moweweuakomu peramba-ramba wulaa saru oluti salaka.

¹² Kontongaado mokole mentoro a medado, tewuhaomo woono mina-mina narawasutuku.

¹³ Ndi ongkue pinehohawaku kana asa ntongo mire, te'asipako i olono wua radaku,

¹⁴ Ndi ongkue pinehohawaku asa tangke bunga pasari a luwuno lere anggorono i Eni-Gedi.

¹⁵ Omue tekosi ntu'u, pinehohawaku, tekosiko ntu'u, kana marapati matamu.

¹⁶ Omue tedoa montama, pinehohawaku, tedoa mompadii aroa; morini ntu'u poturiato.

¹⁷ Inso a ngkeu arasi sobono rahato, inso a ngkeu eru dopi perereto.