Peluarakoa 8 - Wunta Mempori

Pohuku ko'orua: tumpa

¹ Mepau Ira i Ue ndi Musa, ”Lakomo ndi Pirao ka pauakono: Kanandiomo pau-Do i Ue: Po'inee iramo bawaa-Ku domelako, ka dompesomba ndi Ongkue.

² Tewala nahi ubehe motola ira, Aku mompotii tumpa kai buke witamu andio.

³ Koro Nili atuu ta bukeako tumpa, ira mpewuatako ka mpewinso a laro langkanaemu, a bolongko poturiamu hawe a laro mpoturiamu, a laro rahado luwuno pegawaimu, ka palilimu, maupo a laro pontunua roti saru a laro ponsaloamu tarigu.

⁴ Tumpa atuudo ira mpomaru a ngkoroimu, a mpalilimu ka a luwuno pegawaimu.”

⁵ Mepau Iramo i Ue ndi Musa, ”Potaeakono i Haruni: weroo kaemu saru tukomu a wawo ngkorono, a pangkoro ka a limbo, ka dompe'umbaako tumpa me'ihiio wita Masiri.”

⁶ Ka i'amba i Haruni weroo kaeno a luwuno uwoi i wita Masiri, mpe'umbaako iramo tumpa, mentutuwio wita Masiri.

⁷ Sine mia anu mpoto'ori atuudo mpoweweu mbo'u anu kanatuu montonda ponto'orido, onaemo ka dompeluarako tumpa me'ihiio wita Masiri.

⁸ Ka i'amba i Pirao moboi ira i Musa ka i Haruni ka ipotae, ”Ipekakaimo ndi Ondae i Ue, ka Dopoko'olaio tumpa atuudo inso ndi ongkue ka inso a mpaliliku; ka akumo umeheako ira tongku atuu melako, ka dompesomba ndi Ondae i Ue”

⁹ Ipotae i Musa ndi Pirao, ”Omiu pakosio tempono ba te'ipia kupekakaiakomiu, mekakaiako ira pegawaimiu ka palilimiu ka dometampula tumpa atuudo inso ndi omiu ka inso a luwuno rahamiu, sangkadio anu mempo'ia a ngkoro Nili.”

¹⁰ Ipotae i Pirao, ”Tisomo.” Ka i'amba motae i Musa, ”Gagiomo kana pinaumiu atuu, ka ito'orio koa ueku, nine nahina anu kana Ondae i Ue, Ue Ala mami.

¹¹ Tumpa atuudo ta pinoko'olai inso ndi omiu, inso a luwuno rahamiu, inso a luwuno mpegawaimiu ka inso a mpalilimiu ka iramo koa mpo'ia a ngkoro Nili.”

¹² Meluarako iramo i Musa ka i Haruni bintao i Pirao, ka ipekakai i Musa ndi Ondae i Ue, ka Dopoko'olai ira tumpa anu pinotii-Do ndi Pirao.

¹³ Dopokogagio i Ue kana po'emano i Musa. Onaemo ka domemate tumpa atuudo a raha, a kintala ka a lere.

¹⁴ Tumpa anu memate atuudo, domepumpu ira mpehowu-howu, onaemo kai mewoo mana moboo wawo wita atuu.

¹⁵ Sine mansano kumitao i Pirao memate iramo tumpa, ipokomoteao aroano nahi behe merorongeako ira, kana anu pinau-Do i Ue.

Pohuku ko'otolu: tiporo

¹⁶ Mepau Iramo i Ue ndi Musa, ”Pauakono i Haruni: Weroo ka ipesepiakono tukomu a awu wita, ka awu wita atuu ta gagi tiporo asa wawo wita Masiri.”

¹⁷ Onaemo ka doweweuo kanatuu. I Haruni weroo kaeno ka ipesepiakono tukono a awu wita, ka tiporo atuudo mpetako ira a mia ka pinotuwu. Luwuno awu wita gagi tiporo asa wawo wita Masiri.

¹⁸ To Masiri anu mpoto'ori atuudo montonda ponto'orido, mpoweweu ira mbo'u kanatuu mingki mpopokogagi tiporo, sine nahi domempolio. Kanatuumo tiporo hadio mpetako ira a mia ka pinotuwu.

¹⁹ Mpotae iramo to Masiri anu mponto'ori atuudo ndi Pirao, ”Onaemo andio wineweuno kae-Do Ue Ala.” Sine aroano i Pirao da motea, ka nahi perorongeako ira, kana anu umariomo Dopauo i Ue.

Pohuku ko'opaa: lale uso

²⁰ Mepau Iramo i Ue ndi Musa. ”Pewangumo da mo'oru ka lakomo pe'aro ndi Pirao, tempono ipeluarako lumako a ngkorono, ka pauakono: Kanandio pau-Do i Ue: Po'inee iramo bawaa-Ku domelako, ka dompesomba ndi Ongkue.

²¹ Tewala nahi u'eheako ira bawaa-Ku atuu melako, Aku mompotola lale uso, ndi omue, a luwuno pegawaimu, a mpalilimu, ka a luwuno rahamu ranta a luwuno raha i wita Masiri, maupo a wita po'iado ta bukeako lale uso.

²² Sine i oleo atuu, Kupesusuao wita Gose, po'iangado bawaa-Ku, nahi ta hina lale uso, ka uto'orio koa nine Ongkue, Ue, kongko i wita andio.

²³ Nde Aku moweweu petondoni pontolosi anu teposisingge bawaa-Ku ka tongkumu. Tisomo petondoni anu kinohali-haliako andio, ta pinokogagi.”

²⁴ Ondae i Ue mokogagio kanandio, onaemo kai hadio lale uso mpewinso a langkanaeno i Pirao, a laro rahado pegawaino ka asa wawo wita Masiri. I wita atuu, memarasai hangano lale uso.

²⁵ Ipoboi ira i Pirao i Musa ka i Haruni, ka ipotae, ”Imelakomo mpopesombaako pesomba ndi Ondae Ue Alamiu, i witamo koa andio.”

²⁶ Sine ipotae i Musa, ”Nahi moiko kami mpoweweu kanatuu, nde pesomba anu kami mpesombaako ndi Ondae i Ue, Ue Ala mami, onaemo anu mokoburudo to Masiri. Tewala kami mpopesombaako i arodo, pesomba anu gagi mokoburudo to Masiri nde nahi ira mewunoakami watu?

²⁷ Asalakono kami melako i pada one, otolu oleo pelempaa olaino, i ra'ai kami mpopesombaako pesomba mami ndi Ondae i Ue, Ue Ala mami, kana anu Dopauakami.”

²⁸ Ka i'amba motae i Pirao. ”Moiko, aku mo'inee komiu imelako mpopesombaako pesomba ndi Ondae i Ue, Ue Alamiu, i pada one. Polomokoa si te'olai lahi imelako, ka impekakaia kune.”

²⁹ Ka i'amba motae i Musa, ”Kanandio-andio aku meluarako bintakomiu ueku, aku mekakai ndi Ondae i Ue. Tisomo lale uso atuudo ta pinoko'olai inso ndi omiu, a mpegawaimiu ka a palilimiu. Polomokoa sipegaupi mbo'u nahi eheako ira tongku atuu domelako mpopesombaako pesomba ndi Ondae i Ue.”

³⁰ Umarino atuu, meluarakoomo i Musa bintao i Pirao, ka ipekakai ndi Ondae i Ue.

³¹ Ondae i Ue mokogagio kana pekakaino i Musa, onaemo lale uso atuudo mpeliahako inso ndi Pirao, inso a luwuno pegawaino ka inso a mpalilino; maupo te'asa nahina toreano.

³² Sine pohona mbo'u andio i Pirao kongko motea aroano; nahi eheako ira tongku atuu domelako.