Peluarakoa 7 - Wunta Mempori

¹ Mepau Iramo i Ue ndi Musa, ”Kitao, Kupokogagikomo kana Ue Ala ndi Pirao, ka i Haruni akamu, ta gagi kana nabimu.

² Asalakono kau pauakono luwuno anu Kutenaakomu, ka i Haruni, akamu, onae anu ta mepauakono i Pirao, ka ipo'inee iramo to Isaraeli melako inso i witano.

³ Sine Aku mokomoteao aroano i Pirao ka Aku mompoko hadio petondoni ka moweweu kinohali-haliako i wita Masiri.

⁴ Tewala nahi perorongeakomiu i Pirao, Aku motiio kae-Ku moweeako ira pohuku anu mobea a nto Masiri, ka lumuarako ira mia-Ku, bawaa-Ku, to Isaraeli inso i wita Masiri.

⁵ To Masiri atuu iramo mento'orio nine Ongkuemo Ue, tewala Kupotiio kae-Ku a nto Masiri ka wawa ira to Isaraeli mpeluarako inso i olodo.”

⁶ Kanandiomo doweweuo i Musa ka i Haruni kana songka-Do i Ue ndi ondae.

⁷ Tempono dopepau ndi Pirao, tinuwuno i Musa halo pulu nta'u ka i Haruni halo pulu ka otolu nta'u.

⁸ Ka Do'amba mepau i Ue ndi Musa ka ndi Haruni,

⁹ ”Tewala motae i Pirao ndi omiu: ’Popokitaakune asa petondoni anu kinohali-haliako,’ asalakono tenao i Haruni: ’Alao ka ipetendeakono tukomu i arono i Pirao.’ Ka tuko atuu ta gagi ule.”

¹⁰ Lumako iramo i Musa ka i Haruni me'aro ndi Pirao, ka doweweuo kana anu Dotenaako ira i Ue; i Haruni metendeakono tukono i arono i Pirao ka a luwuno pegawaino, ka tuko atuu gagi ule.

¹¹ Ka i'amba i Pirao moboi ira mia anu mpoto'ori ka pande sihiri to Masiri ka dompoweweu mbo'u anu kanantuu, montonda ponto'orido.

¹² Pada ira mpopetendeako tukodo, ka tukodo atuu gagi ule; sine tukono i Haruni tumele ira tukodo.

¹³ I Pirao motea aroano, onaemo ka nahi behe merorongeako ira, kana anu umariomo Dopauo i Ue.

Pohuku amba-ambano: uwoi gagi rea

¹⁴ Mepau Iramo i Ue ndi Musa, ”I Pirao mokomoteao aroano, nahi eheako ira to Isaraeli melako.

¹⁵ Lakomo ndi Pirao da mo'oru, tempono ipeluarako lumako a ngkorono. Sikoriomo a wiwino koro Nili, ka wawao a ngkaemu tuko anu horiomo gagi ule.

¹⁶ Pauakono: Ondae i Ue, Ue Alado to Ibarani, tumena aku aiwa pauakomiu: Po'inee iramo bawaa-Ku ka domelako mpesomba ndi Ongkue i pada one. Sine ranta hawe kanandio-andio nahi ubehe momperorongeako.

¹⁷ Onaemo pu'uno, kanandiomo pau-Do i Ue: Inso anu ta gagi andio, ko tumo'orio, nine Ongkuemo Ue. Pauakono i Pirao: Kitao, tuko a ngkaeku andio, aku wombaakono uwoi i koro Nili, ka uwoi atuu ta bali gagi rea.

¹⁸ Bou a ngkorono Nili ta memate, ka koro Nili ta mewoo mana moboo, gagi to Masiri nami moiko dompo'inu uwoi inso a ngkoro Nili.”

¹⁹ Pau-Do i Ue ndi Musa, ”Tenao i Haruni: Alaomo tukomu, weroomo kaemu a luwuakoano uwoi i wita Masiri, a wawo ngkorono, a pangkoro, a limbo ka a luwuakoano tepumpuano uwoi, anu hinao ndi ondae, ka igagi luwu rea. I asa wawo wita Masiri ta hina rea, sekonopo uwoi a dula keu ka a ngkusi gagi rea.”

²⁰ Kanandiomo doweweuo i Musa ka i Haruni, menunu songka-Do i Ue. Tuko atuu itandeo ka ipewombaakono a uwoi i koro Nili, i arono i Pirao ka luwuno pegawaino, ranta luwuno uwoi a ngkoro Nili bali gagi rea.

²¹ Memate iramo luwu bou a ngkoro Nili, onaemo kai mewoo mana moboo koro Nili atuu. Gagi uwoi atuu nami moiko dome'inuo to Masiri ka a luwuno wita Masiri hinao rea.

²² Sine mia mpoto'ori to Masiri, mpoweweu ira koa mbo'u montonda ponto'orido, onaemo i Pirao ka ikongko motea aroano, nahi behe rumonge ira kana anu pinau-Do i Ue.

²³ I Pirao mewolili, ka ipewinso a langkanaeno ka nahi behe mewowoloo mbo'u anu gagi atuu.

²⁴ Sine luwudo to Masiri mpokeke i horino koro Nili mpo'ungke uwoi inuado, hangano nami moiko uwoi koro Nili dome'inuo.

²⁵ Kanandio sompoomo telalo opitu oleo umari-Do i Ue wombakio koro Nili.