Peluarakoa 6 - Wunta Mempori

I Musa wali tinena

¹ Umarino atuu mepau Ira Ue Ala ndi Musa, ”Ongkuemo Ue.

² Mepopokita Akumo ndi Burahima, ndi Saki ka ndi Yako nine Ongkuemo Ue Ala anu tedoa pabawa, sine ia nee-Ku Ue napi Kupepopoto'ori.

³ Komba butu Kupedandiako iramo Aku weeako ira wita Kana'a, po'iangaado kana mia mehawe,

⁴ sine Kurongeomo mbo'u mperaipido to Isaraeli anu mempine'atado to Masiri, ka Ku'inio pedandia-Ku.

⁵ Onaemo, pauako iramo to Isaraeli: Ongkuemo Ue, Aku koa motolakomiu inso a mpodadaido mpo'angga to Masiri, ka motolakomiu inso a mpope'ataado. Aku tumandeo kae pabawa-Ku tumolosikomiu, saru luwuno pohuku anu mobea.

⁶ Aku mokogagi komiu bawaa-Ku ka Ongkue Ue Alamiu, ka imento'orio nine Ongkuemo Ue, Ue Ala anu motola komiu inso a mpedadaido mpo'angga a to Masiri.

⁷ Aku wawa komiu a wita anu Kudandiomo, Aku weeakono i Burahima, i Saki ka i Yako. Aku weeakomiu gagi tiamiu. Ongkuemo Ue.”

⁸ Ka i'amba i Musa pauako ira to Isaraeli, sine nahi domperorongeakono, hangano tedungkuomo aroado ka tedoa dompemobeao tepe'atado.

⁹ Umari atuu Ondae i Ue mepau ndi Musa,

¹⁰ ”Lakomo ndi Pirao, mokoledo to Masiri atuu, ka pauakono, asalakono kai potola iramo to Isaraeli melako inso i witano.”

¹¹ Sine ipotae i Musa ndi Ondae i Ue, ”Sekonopo to Isaraeli nahi domperorongeakune, kana'umpe i Pirao ta rumonge aku, ongkue mia anu nahi pande mpau.”

¹² Kanandiomo pau-Do i Ue ndi Musa ka ndi Haruni, ka tumena ira lumako a nto Isaraeli ka ndi Pirao, mokoledo to Masiri, ka domewinawa to Isaraeli mpeluarako inso i wita Masiri.

Uempu'udo i Musa ka i Haruni

¹³ Ndiomo luwuno petewawado asa mpinu'u anu mpepe'etu: i Rube, ana amba-ambano i Isaraeli, onaemo: i Heno, i Palu, i Heseroni ka i Karami. Ondaemo inuleno i Rube.

¹⁴ Luwuno anano i Simeo onaemo: i Yemueli, i Yami, i Ohada, i Yakini, i Sohari, ka i Saulu; anano inso a beine to Kana'a. Onaemo inuleno i Simeo.

¹⁵ Ndiomo needo anano i Lewi montonda potudano domehina: i Geresoni, i Keha ka i Merari. Tinuwuno i Lewi asa etu tolu pulu ka opitu nta'u.

¹⁶ Anano i Geresoni: I Libeni ka i Simei, montonda pepe'etuado.

¹⁷ Anano i Keha, onaemo: I Amarami, i Yisara, i Heberoni ka i Usieli. Tinuwuno i Keha asa etu tolu pulu ka otolu nta'u.

¹⁸ Anano i Merari, onaemo: i Mahali ka i Musi. Onaemo pepe'etuado to Lewi montonda potudano hinaado.

¹⁹ I Amarami kumombiao i Yokebe, pepaekompono amano, ka beine andio me'anaako ira i Haruni ka i Musa. Tinuwuno i Amarami asa etu tolu pulu ka opitu nta'u.

²⁰ Anano i Yisara, onaemo: I Kora, i Nepegi ka i Sikiri.

²¹ Anano i Usieli, onaemo: I Misaeli, i Elesapa ka i Siteri.

²² I Haruni kumombiao i Eliseba, anano i Aminada, pepaekompono beine i Nahaso, ka beine andio me'anaakono i Nada, i Abihu, i Eleasa ka i Itamara.

²³ Anano i Kora, onaemo: I Asira, i Elikana ka i Abiasapa; onaemo pepe'etuado to Kora.

²⁴ I Eleasa, anano i Haruni, kumombiao asa ana beine anano i Putieli ka beine andio me'anaakono i Pineha. Ondaemo petewawado to Lewi montonda pepe'etuado.

²⁵ I Haruni ka i Musa, ondaemo anu tinena-Do i Ue, ”Wawa iramo to Isaraeli mpeluarako inso i wita Masiri, montonda pebaresido.”

²⁶ Ondaemo i Musa ka i Haruni anu mepau ndi Pirao, mokoledo to Masiri, ka domewinawa to Isaraeli mpeluarako inso i wita Masiri.

Pohona mbo'u i Musa me'aro ndi Pirao

²⁷ Asa tempo mepau Ira i Ue ndi Musa i wita Masiri.

²⁸ Mepau Ira i Ue ndi Musa, ”Ongkuemo Ue. Pauakonomo i Pirao, mokoledo to Masiri, luwuakoano anu Pinau-Ku ndi omue.”

²⁹ Ipotae i Musa ndi Ondae i Ue, ”Ongkue andio komba mia anu pande mpau, kana'umpe ta rumonge aku i Pirao?”