Peluarakoa 5 - Wunta Mempori

I Musa ka i Haruni me'aro i Pirao

¹ Ka i'amba i Musa ka i Haruni lumako me'aro ndi Pirao, ka dopotae ndi onae, ”Kanandiomo pau-Do i Ue, Ue Alado to Isaraeli: Po'inee iramo bawaa-Ku melako mpoweweu pompelangkai ndi Ongkue i pada one.”

² Sine ipotae i Pirao, ”isemake i Ue atuu anu asalakono aku merorongeakono pau-Do ka kupo'inee ira to Isaraeli melako? Nahi kuto'ori Ira i Ue atuu ka nahi aku umeheako ira to Isaraeli melako.”

³ Onaemo ka dopotae i Musa ka i Haruni, ”Ondae Ue Alado to Ibarani mepopokita Iramo ndi omami. I'eheakamimo ka kimelako mpopesombaako pesomba ndi Ondae i Ue, Ue Ala mami i pada one, otolu oleo pelempaa olaino, kasi Dopompotii haki lele ke ponai.”

⁴ Sine ipotae mokoledo to Masiri ndi Musa ka ndi Haruni, ”Tembio ka iweweu ira tongku atuu mpebungkuio anggaado? Ilakomo umanggao anggaamiu!”

⁵ Ipotae mbo'u i Pirao, ”Kitao, kanandio-andio tongku atuu mehadio iramo lahi i wita andio, ka komiu mokompenaa-naa ira a mpo'anggaado!”

⁶ Ia oleo koa atuu i Pirao parenta ira luwuno anu mpodagai mia mpo'angga dinadai a tongku atuu ka luwuno mandoro inso ndi ondae,

⁷ ”Siimo mbo'u impoweeako ira tongku atuu seami weweuado watu tela, kana anu telaloomo andio. Po'inee ira ka domelako ondaedo mpopumpu seami,

⁸ Sine hadiono watu tela, anu asalakono domeweweuo se'eluno, ka ikanatuu koa mpiha, nahi moiko ba imakura hangano memoluwe ira. Onaemo ka dompebooli: Ipowee kamimo tempo melako mpopesombaako pesomba mami ndi Ondae Ue Ala mami.

⁹ Anggaado mia andiodo asalakono pinoko mobea, gagi onae dontetanggoako ka simperorongeakono dandi mpegaupi.”

¹⁰ Melako iramo puu mpodagaido mia mpo'angga dinadai tongku atuu saru mandorodo anu gagi mandoro ka dompotaeako ira, ”Kanandio pauno i mokole Pirao: Nami aku moweeakomiu mbo'u seami.

¹¹ Imelako, ka impo'ungke seami omiu-miu ba isua komiu mpohawe, sine inanggamiu nahi moiko ba imakura maupo tedei.”

¹² Ntesiarawo iramo to Isaraeli mesompoo wita Masiri mpopumpu keuno gandu euno seami.

¹³ Puu mpodagai mia mpo'angga dinadai atuudo dumadai ira, dompotae, ”Imempoko'umario anggaamiu asa oleo kana hadiono i tempono hinao seami.”

¹⁴ Ka do'amba miano i Pirao, puu mpodagai mia mpo'angga dinadai atuu, mentuduhi ira mandoro to Isaraeli anu tinisodo, ka dopotaeako ira, ”Tembio ka nahi mpokosompoo hadiono watu tela anu asalakono imeweweuo kana se'eluno?”

¹⁵ Umarino atuu melako iramo mandoro to Isaraeli ndi Pirao, ka dompotae, ”Tembio ueku ka iweweu kami atamiu kanandio?

¹⁶ Seami, nami dompoweeakami. Sine maupo kanatuu, mentinena kami: impoweweumo watu tela. Kitao, luwuno atamiu andio mentunduhi, kahinaano miamiu anu sala.”

¹⁷ Sine isangki ira, ”Memoluwe komiu, lano moluwe! Onaemo ka impotae: I'eheakamimo melako mpopesombaako pesomba mami ndi Ondae i Ue!

¹⁸ Kanandio-andio, imelakomo mpo'angga! Seami nahi komiu mempinoweeako mbo'u, sine watu tela asalakono mengkena mpiha hadiono impeweengakono.”

¹⁹ Gagi dompokoto'oriomo mandoro to Isaraeli, nine ondae mpo'ia a laro masukaraa, hangano ipotaeako ira, ”Si mengkurangio hadiono watu tela, anu tinantuiomo ndi omiu sompo oleo.”

²⁰ Mansado melako inso ndi Pirao, ntepohawe iramo i Musa ka i Haruni, anu kontongaado sumikori ira,

²¹ Ka do'amba motae ndi ondae, ”Po'ineomo Dokitao i Ue wineweumiu, ka humukukomiu hangano ipokomosa'oo nee mami i arono i Pirao ka a luwuno pegawaino, hangano kanarau, mengkenaomo ipoweeako ira ponai ka dompokoropu kami.”

²² Onaemo ka iwali me'aro i Musa ndi Ondae i Ue, ipotae, ”Oo Ue, tembio ka ipoweeako ira tebobarasaia a bawaa-Miu andio? Pombio ka itena aku?

²³ Hangano mompu'u kulako me'aro ndi Pirao, mepau ia nee-Miu, ibobarasai iramo bawaa andio ka ranta nahi hori motola ira bawaa-Miu.”

²⁴ Sine mepau Ira i Ue ndi Musa, ”Kanandio-andio komo kumitao, hapa anu Aku weweuo ndi Pirao; hangano idadaio kae anu moroso ta mo'inee ira ka domelako, hangano idadaio kae anu moroso ta sumaari ira inso i witano.”