Peluarakoa 40 - Wunta Mempori

I Musa mowangu Kema Mempori

¹ Mepau iramo i Ue ndi Musa,

² ”A oleo ko aasa wula ko'aasa asalakono wanguomo Kema Mempori, Kema Tepotowoa atuu.

³ Burua po'iangano songka asalakono unaao ilarono ka pasao sawu pelingo olotino i arono burua pedandia atuu.

⁴ Asalakono uwawao meda i larono Kema Mempori ka parewano podedeo i wawono meda atuu. Wawaomo mbo'u hulu mekaru ka pasao luwuno huluno.

⁵ Meda pontunua dupa inso a wulaa asalakono unaao i arono burua po'iangano songka ka a mpewowano Kema Mempori, asalakono pasao sawu pelingo.

⁶ Meda pontunua pesomba tinunu asalakono unaao i arono pewowa Kema Mempori, Kema Tepotowoa atuu.

⁷ Asalakono unaao bolusa pewo'ohia i olono Kema Tepotowoa ka meda pontunua pesomba atuu ka pontawa uwoi i larono.

⁸ Asalakono poweweu kintala lumimbuo Kema Tepohawea atuu ka ponaakono sawu pelingo a mpewowa langkai kintala atuu.

⁹ Asalakono ka u'amba mo'ala lana po'urapi ka urapio Kema Mempori saru luwuno anu kongko i larono. Kanatuumo omue asalakono mokomemporio saru luwuno parewano, onaemo ka igagi mempori Kema atuu.

¹⁰ Asalakono ka u'urapio meda pontunua pesomba tinunu saru luwuno parewano, ka mokomemporio meda pontunua pesomba atuu.

¹¹ Bolusa pewo'ohia atuu saru empehino asalakono kau urapio. Kanatuumo upokomemporio.

¹² I Haruni saru luwuno anano, asalakono uwawa ira a mpewowano Kema Tepotowoa, ka domewino'ohiako uwoi.

¹³ Asalakono pokonaakono sangka mempori i Haruni, urapio ka pokomemporio, kai gagi sando mpesomba ndi Ongkue.

¹⁴ Luwuno anano tena ira me'umpeda ka upokonaako ira lemba meloe i larono.

¹⁵ Asalakono u'urapi ira kana u'urapio amado ka domegagi sando mpesomba ndi Ongkue. Hangano po'urapi atuu, ondae ira megagi sando mpesomba ranta nahina tampulaano a luwuno inulemu.”

¹⁶ Luwuno atuu i weweuomo i Musa menunu kana parenta-Do i Ue ndi onae. Kanatuumo iweweuo.

¹⁷ Tanggala aasa wula ko'aasa ta'u ko'orua, Kema Mempori winangu.

¹⁸ I wanguo i Musa Kema Mempori atuu, saru monaakono luwuno empehino, ipodedeo luwu dopino, ipasao luwuno keu montoweano ka ipontade ira karuno.

¹⁹ Iwileo atono Kema i wawono Kema Mempori atuu, ka ipasao boruno kema i wawono mbo'u, kana parenta-Do i Ue ndi Musa.

²⁰ I'alao watu buriano songka ka inaao a larono burua po'iangano songka atuu. Ipasao luwuno keu ponsela a burua po'iangano songka atuu ka inaao ulo pesintuwua iwawono burua po'iangano songka atuu.

²¹ Burua po'iangano songka atuu iwawao i Musa i larono Kema Mempori ka sawu pelingo pontutuwi indoeakono gagi po'oloti i arono burua po'iangano songka atuu, kana parenta-Do i Ue ndi onae.

²² Inaao meda i larono Kema Tepotowoa, i utarano Kema Mempori, i arono i horino sawu mpelingo.

²³ Iwawono meda atuu ipodedeo i Musa roti pesomba i'aro-Do i Ue, kana parenta-Do i Ue ndi onae.

²⁴ Hulu mekaru inaao i larono Kema Tepotowoa tepo'aro saru meda atuu, i selatano Kema Mempori.

²⁵ Luwuno hulu ipasao i Musa i wawono, i aro-Do i Ue, kana parenta-Do i Ue ndi onae.

²⁶ Meda pontunua pesomba inso a wulaa, inaao i larono Kema Tepotowoa, i arono sawu pelingo.

²⁷ I wawono meda pontunua pesomba atuu i Musa montunu dupa mo'ahi woono, kana parenta-Do i Ue ndi onae.

²⁸ Ipasao sawu pelingo a mpewowano Kema Mempori.

²⁹ I Musa numaao meda pontunua pesomba tinunu i arono pewowa Kema Mempori, onaemo Kema Tepotowoa, ka ipompesombaako pesomba tinunu saru pesomba kaanga, kana parenta-Do i Ue ndi onae.

³⁰ I naao bolusa pewo'ohia i olono Kema Tepotowoa ka meda pontunua pesomba atuu ka itawaakono uwoi i larono gagi pewo'ohi.

³¹ Ka uwoi atuu i Musa, i Haruni ka luwuno anano i Haruni mewo'ohio kaedo ka karudo.

³² Tewala mpewinso ira i larono Kema Tepotowoa ka me'umpeda a meda pontunua pesomba, mpewo'ohi ira, kana parenta-Do i Ue ndi Musa.

³³ I Musa moweweu kintala i limbuo Kema Mempori ka meda pontunua pesomba atuu ka mompasa sawu pelingo a mpewowa langkai i kintala atuu. Kanatuumo ipoko'umario i Musa anggaa atuu.

Kema Mempori bukeako maramba-Do i Ue

³⁴ Umarino atuu seru kuma'uwio Kema Tepotowoa. Kema Mempori atuu bukeako maramba-Do i Ue,

³⁵ ranta i Musa nahi pokompewinso a Ngkema Tepotowoa, hangano seru metii i wawono ka Kema Mempori atuu bukeako maramba-Do i Ue.

³⁶ Tewala seru atuu mewuatako inso i wawono Kema Mempori, mpelungka iramo to Isaraeli inso a sompo peratoado.

³⁷ Tewala seru atuu nahi pewuatako, nahi ira mpelungka ranta a oleo seru atuu mewuatako.

³⁸ Hangano i tempono meene, seru-Do i Ue kongko i wawono Kema Mempori, ka i tempono wongi domengkitao luwudo to Isaraeli api a laro nseru atuu, a sompo peratoado.