Peluarakoa 4 - Wunta Mempori

¹ Ka i'amba sumangki i Musa, ”Kana'umpe ba mansa nahi dompe'ala-ala aku ka nahi domerongeo pinauku, ka domansa mpotae: Ondae i Ue nahi Dopepopokita ndi omue?”

² Mesikeno Ira i Ue ndi Musa, ”Hapa anu kongko a ngkaemu atuu?” Sumangki i Musa, ipotae. ”Tuko.”

³ Pau-Do i Ue ndi Musa, ”Petendeakono atuu a wita.” Mansano ipetendeakono i Musa a wita, tuko atuu gagi ule, ka i'amba i Musa molai bintao.

⁴ Sine pau-Do i Ue ndi Musa, ”Weroo kaemu ka u'inio ikino.” Iweroo i Musa kaeno ka irakoo, ule atuu gagi tuko a ngkaeno.

⁵ ”Weweuomo atuu ka dompompe'ala-ala, nine Ondae i Ue, Ue Alado uempu'umiu, Ue Alano i Burahima, Ue Alano i Saki ka Ue Alano i Yako, umari Iramo mepopokita ndi omue.”

⁶ Mepau Ira mbo'u i Ue ndi onae, ”Winsoomo kaemu a laro lembamu.” Ka i'amba i Musa winsoo kaeno a laro lembano. Mansano lumuarakono, kaeno i'aluo haki ngkuli, mopute kana seru baku.

⁷ Umarino atuu mepau Ira i Ue, ”Wali winsoo kaemu a laro lembamu.” Iwinsoo i Musa kaeno a laro lembano, mansano lumuarakono, kaeno atuu gagi tompa kana kuli ngkoroino anu mehano.

⁸ ”Tewala nahi dompe'ala-alako ka nahi domperioo pe'oliwi anu kinohali-haliako amba-ambano, irakoa mpope'ala-alao pe'oliwi inso anu kinohali-haliako ko'orua.

⁹ Tewala nahi dompe'ala-alao mbo'u orua rupa anu kinohali-haliako andio, ka nahi domperorongeakono pinaumu, po'ala uwoi a ngkoro Nili, uwuo a wita anu motu'i. Uwoi inalamu ta gagi rea a wita motu'i atuu.”

¹⁰ Ka i'amba i Musa motae ndi Ondae i Ue, ”Tabea-Miu, Ue, ongkue andio, mompu'u i ndi'ipua, ka maupo umari-Miu mepau ndi ongkue, tetenaa-Miu andio, nahi kupande mpau, hangano ongkue mobea elo, nahi magasi mepau.”

¹¹ Sine pau-Do i Ue ndi onae, ”isemake weweuo elono mia, isemake anu weweuo mia bebe ke mobongo, weweuo mia mongkita ke morawu; komba Ongkueke, i Ue?

¹² Onaemo pu'uno, lakomo, Aku koa tumulungio elomu mepau ka paguruakomu, hapa anu ta pinaumu.”

¹³ Sine i potae i Musa, ”Tabea-Miu Ue, Ipontenamo isemamo koa anu Komiu tumenao.”

¹⁴ Tensilaomo tekuda-Do i Ue ndi Musa, onaemo ka Dopepau, ”Nde nahi kongkoke akamu i Haruni to Lewi atuu? Kuto'orio, nine onae pande mepau. Ka melungkaomo aiwa tepohawekomu, tewala ikitako, ta mawongko aroano.

¹⁵ Asalakono kau pepau ndi onae ka pauakono hapa anu ta pinaumu; Aku koa tumulungio elomu ka elono mepau. Aku koa paguruakomiu hapa anu ta wineweumiu.

¹⁶ Onae anu ta mepauakomu a tongku atuu. Gagi kanandio onae ta gagi puu mpepaumu ka omue ta rumekeko kana Ue Ala ndi onae.

¹⁷ Wawaomo tuko andio a ngkaemu, anu ta pakeamu mompokogagi petondoni anu kinohali-haliako.”

I Musa mekule i wita Mesiri

¹⁸ Ka i'amba i Musa mekule a mponino i Yitiro ka ipotae ndi onae, ”Ipo'inee akumo ka kupekule i wita Masiri, kumita ira pepaekompoku, ba damentuwu ira.” Ipotae i Yitiro ndi Musa, ”Lakomo, temoiko.”

¹⁹ Ondae i Ue umari Ira mepau ndi Musa i Midia, ”Pekulemo i wita Masiri, hangano luwuno mia anu mingki mepateko, memate iramo.”

²⁰ Umarino atuu i Musa umuluakono kombiano saru luwuno anano tama, ka iposawi ira a ngkalide ka ipekule i wita Masiri. Tuko-Do Ue Ala atuu i'inio a ngkaeno.

²¹ Pau-Do i Ue ndi Musa, ”Itempono ko mekule i wita Masiri, pewowoloo koa luwuno wineweu anu kinohali-haliako anu Ku peweengakonomo a ngkaemu, weweuo i arono i Pirao. Sine Aku mokomoteao aroano, kasi behe ira tongku atuu melako.

²² Gagi asalakono pauakono i Pirao: Kanandiomo pau-Do i Ue: I Isaraeli onaemo ana-Ku anu tama, ana-Ku anu aka;

²³ Onaemo ka Kupauakomu: Po'inee iramo ana-Ku atuu ka domelako, mpesomba ndi Ongkue. Sine tewala nahi ubehe ira, Aku mepateo ana akamu anu tama.”

²⁴ Sine a ntonga nsala, a mperatoado, hawe Ira i Ue mingki mepateo i Musa,

²⁵ Ka i'amba i Sipora umalao watu anu montaso kana piso, ka iseseio kuli untuno anuno anano, ka i'amba numangkiakono a ngkaruno i Musa, ka ipotae, ”Menteeano omue tamaku hangano rea andio.”

²⁶ Onaemo ka Dopo'ineeo i Ue i Musa, hangano tempo atuu, ipotae i Sipora, ”Tamaku merea”, hinao penggoeno ka tinindi.

²⁷ Mepau Iramo i Ue ndi Haruni, ”Lakomo i pada one tepohawekono i Musa.” Lumakoomo i Haruni ka tepohaweakono i torukuno Ue Ala, ka iwoo-wooo.

²⁸ Ka i'amba i Musa tumutuluakono i Haruni luwuakoano pau-Do i Ue anu pinauako ndi onae ka luwuno petondoni kinohali-haliako anu Dotenaakono ka iwineweu.

²⁹ Lumako iramo i Musa ka i Haruni pumpu ira luwu mia memotota'udo to Isaraeli.

³⁰ I Haruni pauo luwuakoano anu pinau-Do i Ue ndi Musa, ka moweweu petondoni anu kinohali-haliako i arodo tongkuno.

³¹ Onae pu'uno ka dompompe'ala-alamo tongku atuu. Mansado merongeo, nine Doperio iramo i Ue ka Dokitaomo marasaido, onaemo ka dompenggolontu mpesomba.