Peluarakoa 39 - Wunta Mempori

Moweweu sangkano sando mpesomba

¹ Inso a bana wungo motu'a, wungo mongura, motaha motu'a dompoweweu sangka pompelangkai pakea ba dompesomba a mpo'ianga mempori. Wineweu mbo'u sangka mempori pakeano i Haruni, kana petena-Do i Ue ndi Musa.

² Doweweuo lemba epo inso a bana wulaa, wungo motu'a, wungo mongura, motaha motu'a ka lena alusu anu kinoloro banano.

³ Dopaluo luwuno sibano wulaa, ka do'amba mempole-poleo gagi bana, anu sinula i olono bana wulaa, wungo motu'a, wungo mongura, motaha motu'a ka lena alusu, gagino sinula.

⁴ Doweweuo tutuwi owea anu sinombu a lemba epo atuu, tesombu i orua untuno lemba atuu.

⁵ Koloro tanggono a lemba epo atuu tepe'asa saru onae ka inso a nsawu anu mengkena: bana wulaa, wungo motu'a, wungo mongura, motaha motu'a ka lena alusu anu kinoloro banano, kana petena-Do i Ue ndi Musa.

⁶ Dopodedeo watu paramata kerisopara anu tinanggoako simpi wulaa, ngginori kana monggori pontondoni, menunu saru needo luwuno anano i Isaraeli.

⁷ Ka i'amba paramata atuu ninaa a orua tutuwi owea lemba epo gagi paramata petondoni mewowolo ira to Isaraeli, kana parenta-Do i Ue ndi Musa.

⁸ Doweweuo tutuwi rada, mengkena kana lemba epo, anu sinula inso a bana wulaa, wungo motu'a, wungo mongura, motaha motu'a ka lena alusu anu kinoloro banano.

⁹ Tutuwi rada atuu, mensiu opaa, wineweu orua lupi, ondauno asa otuwe mengkena ka maluano asa otuwe.

¹⁰ Do'atorao gagi opaa baresi paramata, a baresi amba-ambano: yasapisi motaha, kirisoli ka malakiti.

¹¹ A baresi ko'orua: watu rea, lasuaradi ka yasapisi molowulu.

¹² A baresi ko'otolu: ambara, aki ka kesubu.

¹³ A baresi ko'opaa: pirusu, kerisopara ka nepiri. Luwuno paramata atuu pinotakoako simpi wulaa.

¹⁴ Menunu saru needo luwuno anano i Isaraeli, paramata atuu hadiono hopulu ka orua, sompo paramata asa nee. Luwuno paramata atuu ngginori kana monggori sinsi pontondoni, sompo paramata asa nee inso a hopulu ka orua suku atuu.

¹⁵ A ntutuwi rada atuu wineweu mbo'u rante inso a wulaa mpena, kana koloro anu linisu.

¹⁶ Mpoweweu ira orua onggo wulaa ka orua mala-mala wulaa ka mala-mala orua atuu, pinasa a orua untuno tutuwi rada.

¹⁷ Dopasao orua rante wulaa linisu atuu a orua mala-mala i untuno tutuwi rada.

¹⁸ Ko'oruano untuno susua inso a orua rante linisu, pinasa a orua simpi atuu. Kanandiomo dopasao a ntutuwi owea lemba epo, i arono.

¹⁹ Doweweuo orua mala-mala wulaa ka dopasao a orua untuno tutuwi rada atuu, a wiwino i larono, anu me'aro a lemba epo.

²⁰ Wineweu mbo'u orua mala-mala wulaa ka pinasa a orua tutuwi owea lemba epo, i totono te'alaako i arono, umpeda a mpesombuano lemba epo ka koloro tanggono anu i wawono.

²¹ Ka i'amba tutuwi rada atuu saru mala-malano, dotanggoakono bana wungo motu'a a mala-malano lemba epo kai kongko mpiha tutuwi rada atuu i wawono koloro tanggono lemba epo ka nahi tepahe inso a lemba epo, kana parenta-Do i Ue ndi Musa.

²² Domeweweuo lemba meloe i bungkuno i totono lemba epo, luwuno sinula inso a bana wungo motu'a.

²³ We'uno i tongano lemba meloe i bungkuno atuu kana we'uno lemba sira, anu hinao wiwino lumimbuo kasi teberi.

²⁴ A lupino i totono lemba meloe atuu, wineweu wua delima inso a bana wungo motu'a, wungo mongura ka motaha motu'a anu kinoloro.

²⁵ Moweweu ira nggiri-nggiri inso a wulaa mpena ka ipinasa nggiri-nggiri atuu i olono wua delima, lumimbuo lupino lemba i bungkuno atuu, mpe'olo-olo saru wua delima atuu.

²⁶ Gagi hinao asa nggiri-nggiri ka asa wua delima mpe'olo-olo lumimbuo lupino lemba meloe i bungkuno anu pinake tewala moweweu pesombaa, kana parenta-Do i Ue ndi Musa.

²⁷ Doweweuo lemba meloe i larono inso a lena alusu anu hinoru tiano i Haruni ka luwuno anano,

²⁸ serubani inso a lena alusu, peboo ulu anu tekosi inso a lena alusu ka saluara inso a lena alusu anu kinoloro banano,

²⁹ ka peboo ntonga mbo'u inso a lena alusu anu kinoloro banano, inso a bana wungo motu'a, wungo mongura ka motaha motu'a, anu sinula, kana parenta-Do i Ue ndi Musa.

³⁰ Mpoweweu ira lempe inso a wulaa mpena peramba-ramba mempori a ulu ka monggori binuri i wawono kana nggorino sinsi pontondoni, ”mempori ndi Ondae i Ue.”

³¹ A lempe atuu dopasao koloro wungo motu'a ta pinetanggoako a mpeboo ulu i wawono, kana parenta-Do i Ue ndi Musa.

Poko'umariano Kema Mempori

³² Kanatuumo i pinoko'umari luwuno anggaa a Ngkema Mempori, Kema Tepotowoa atuu. To Isaraeli meweweuo montonda kana parenta-Do i Ue ndi Musa. Kanatuumo domeweweuo.

³³ Domewawao Kema Mempori atuu ndi Musa, tenda saru luwuno parewano, kai, dopi, keu montowea, karuno ka po'empehi karuno,

³⁴ ato inso a ngkuli bimba lakino anu pinarada motaha, ato inso a ngkuli alusu, sawu pelingo poborungi,

³⁵ burua po'iangano songka saru luwuno keu ponselano, ka ulono pesintuwua,

³⁶ meda saru luwuno parewano ka roti pesomba,

³⁷ hulu mekaru inso a wulaa mpena saru potudano luwuno huluno ka luwuno parewano ka lana pompokomewanta,

³⁸ meda pontunua pesomba inso a wulaa, lana po'urapi, dupa inso a rampa-rampa anu mo'ahi woono, sawu pelingo a mpewowa kema,

³⁹ meda pontunua pesomba inso a mala saru tarali malano, luwuno keu ponselano ka luwuno parewano, bolusa pewo'ohia saru empehino,

⁴⁰ sawu pelingo olotino kintala, karuno saru empehino, sawu pelingo tiano pewowa langkai kintala, kolorono ka pandorano ka luwuno parewano tiano anggaa mowangu Kema mempori, Kema Tepotowoa atuu,

⁴¹ sangka pompelangkai pakea moweweu pesombaa a mpo'ianga mempori, sangka mempori tiano sando mpesomba i Haruni ka sangkado luwuno anano pakeado mpopekakaako gagi sando mpesomba

⁴² Kana parenta-Do i Ue ndi Musa, kanatuumo domeweweuo to Isaraeli luwuno anggaa atuu.

⁴³ Ka i Musa kumitao luwuno anggaa atuu. Mentee ntu'u domeweweuomo kana parenta-Do i Ue. Kanatuumo domeweweuo. Ka i'amba rumonso ira i Musa.