Peluarakoa 38 - Wunta Mempori

Moweweu meda pesomba tinunu

¹ I Besale'eli moweweu meda pontunua pesomba inso a ngkeu akasia, olima hiku ondauno ka olima hiku maluano, gagi mensiu opaa mengkena ondauno ka maluano, sine mantandeno otolu hiku.

² Tandu-tanduno wineweu a opaa siuno. Tandu-tandu atuu tepe'asa saru meda pontunua pesomba ka inapiiako mala.

³ Onae moweweu luwuno parewano meda pontunua pesomba atuu: luwuno kawali, sikopa, loea kodei ponsiwui, sarampa ka polu pontunua halo. Luwuno parewa atuu wineweu inso a mala.

⁴ Meda pontunua pesomba atuu wineweu tarali kana mala inena, i totono wiwino ngkoloane hawe entonga mantandeno meda pontunua pesomba atuu.

⁵ I weweuo opaa mala-mala tinawa a opaa tompano mala inena atuu, po'iangano keu ponsela.

⁶ Keu ponsela meda pontunua pesomba atuu wineweu inso a ngkeu akasia ka inapiiako mala.

⁷ Keu ponsela atuu wininso a laro mala-mala a luwuno apano meda pontunua pesomba atuu, pe'inia kai pinokowawa meda pontunua pesomba atuu. Meda pontunua pesomba inso a dopi atuu wineweu mooa i larono.

Moweweu bolusa pewo'ohia

⁸ Iweweuo bolusa pewo'ohia ka empehino inso a mala anu te'inso a ntamido beine puu mpompekakaako anu mpo'angga i arono pewowa Kema Tepotowoa.

Moweweu kintalano Kema Mempori

⁹ I Besale'eli moweweu mbo'u kintala. I selatano kintala atuu, wineweu sawu pelingo po'oloti inso a lena alusu anu kinoloro banano, asa etu hiku ondauno.

¹⁰ Luwuno karuno rua pulu ka po'empehi karuno rua pulu mbo'u, luwuno inso a mala, sine kai a ngkaruno atuu ka luwuno ponsombuno inso a nsalaka.

¹¹ I utarano, wineweu sawu pelingo po'oloti asa etu hiku ondauno, luwuno karuno rua pulu ka po'empehi karuno atuu rua pulu mbo'u, luwuno inso a mala, sine kai a ngkaruno atuu ka luwuno ponsombuno inso a nsalaka.

¹² I sumooano oleo kintala atuu, wineweu sawu pelingo po'oloti lima pulu hiku, saru hopulu karuno ka hopulu po'empehi karuno atuu ka kai a ngkaruno atuu saru luwuno ponsombuno inso a nsalaka.

¹³ I sabaano oleo, sawu pelingo po'oloti lima pulu hiku,

¹⁴ sawu pelingo po'oloti i apano anu asa, hopulu ka olima hiku, saru karuno otolu ka po'empehi karuno otolu,

¹⁵ ka sawu pelingo po'oloti i apano anu susua hopulu ka olima hiku, saru otolu karuno ka otolu empehino karuno, mompombali pewowa langkai a ngkintala.

¹⁶ Luwuno sawu pelingo po'oloti anu lumimbuo kintala atuu, inso a lena alusu anu kinoloro banano.

¹⁷ Empehino luwuno karuno atuu inso a mala, luwuno kai a ngkaruno saru ponsombuno inso a nsalaka, apiino uluno karuno inso koa mbo'u a nsalaka. Luwuno karuno kintala atuu sinombuako ponsombu inso a nsalaka.

¹⁸ Sawu pelingo a mpewowa langkai kintala atuu sinula inso a bana wungo motu'a, wungo mongura, motaha motu'a ka inso a lena alusu anu kinoloro banano, rua pulu hiku ondauno, sine mantandeno ka maluano olima hiku, mengkena saru sawu pelingo olotino kintala atuu.

¹⁹ Opaa karuno ka opaa po'empehi karuno atuu inso a mala, luwuno kaino inso a nsalaka, apiino uluno karuno ka luwuno ponsombuno inso koa mbo'u a nsalaka.

²⁰ Luwuno pandorano Kema Mempori ka limbuno kintala, wineweu inso a mala.

Hadiono sangka mpowangu Kema Mempori

²¹ Ndiomo hadiono sangka anu pinake a Ngkema mempori, Kema po'iangano songka-Do Ue Ala, a parentano i Musa domeburio to Lewi i totono petewawano i Itamari, anano sando mpesomba i Haruni.

²² I Besale'eli, anano i Uri, anano i Huri, inso a nsuku Yehuda, weweuo luwuno petena-Do i Ue ndi Musa.

²³ Saru i Besale'eli kongko mbo'u i Aholiabi, anano i Ahisamaki inso a nsuku Dani, asa mia puu mpoweweu ka puu mposongka anggaa, asa mia puu mposula sawu inso a bana wungo motu'a, wungo mongura, motaha motu'a ka lena alusu.

²⁴ Luwuno wulaa anu pinake a mpelempano anggaa a mpo'ianga mempori, onaemo wulaa inso a mpesomba tinande, hadiono rua pulu ka osio talenta ka pitu etu ka tolu pulu sikala, montonda sikala a mpo'ianga mempori

²⁵ Salaka inso a bawaa anu teburi asa etu talenta ka asa nsowu pitu etu ka pitu pulu ka olima sikala montonda sikala a mpo'ianga mempori:

²⁶ asa beka ke entonga sikala montonda sikala a mpo'ianga mempori, a sompo mia anu binuri, anu tinuwuno rua pulu nta'u torea, hadiono nomo'etu ka tolu nsowu ka lima etu ka lima pulu mia.

²⁷ Asa etu talenta salaka, pinake moweweu luwuno po'empehi tinawa a mpo'ianga mempori ka luwuno po'empehi tinawa a ngkaruno sawu pelingo atuu. Asa etu po'empehi menunu saru asa etu talenta atuu, gagi asa talenta tiano asa po'empehi

²⁸ Inso anu asa nsowu pitu etu ka pitu pulu ka olima sikala, iweweuo luwuno kai a ngkaruno, inapii uluno karuno ka luwuno karuno ka monsombu luwuno karuno atuu.

²⁹ Mala inso a mpesomba tinande hinao pitu pulu talenta ka orua nsowu ka pato etu sikala.

³⁰ Inso a mala atuu, i weweuo luwuno po'empehi pewowano Kema Tepotowoa, meda pontunua pesomba inso a mala saru taralino ka luwuno parewano meda pontunua pesomba atuu,

³¹ ka luwuno po'empehi karuno lumimbuo kintala, luwuno po'empehi pewowa langkaino kintala atuu, luwuno pandorano Kema Mempori ka luwuno pandora lumimbuo kintala.