Peluarakoa 37 - Wunta Mempori

Moweweu burua po'iangano songka

¹ I Besale'eli moweweu burua po'iangano songka atuu inso a ngkeu akasia, orua ka entonga hiku ondauno, asa ka entonga hiku maluano, asa ka entonga hiku mantandeno.

² Burua po'iangano songka atuu inapiiako wulaa mpena inso i larono ka i bungkuno ka limbu sinimpiako wulaa.

³ Opaa mala-mala inso a wulaa tinawa wineweuako burua po'iangano songka atuu a opaa karuno, orua mala-mala i apano anu asa ka orua mala-mala i apano anu susua.

⁴ Iweweuo keu ponsela inso a ngkeu akasia, ka inapiiako wulaa.

⁵ Keu ponsela atuu, wininso i larono mala-mala i apano burua po'iangano songka, kai pinokowawa.

⁶ Iweweuo koa mbo'u ulo pesintuwua inso a wulaa mpena, orua ka entonga hiku ondauno ka maluano asa ka entonga hiku.

⁷ Iweweuo orua kerubi inso a wulaa anu pinalu a orua tompano ulo pesintuwuaa atuu,

⁸ asa kerubi i tompano i ndi'ai, ka asa kerubi i tompano raane. Orua kerubi atuu wineweu tepe'asa saru ulo pesintuwua a orua tompano.

⁹ Orua panino kerubi atuu tewile i wawono, borungio ulo pesintuwua atuu ka rupado tepo'aro. Rupado orua kerubi atuu, me'aro a ulo pesintuwua.

Moweweu meda roti pesomba

¹⁰ I Besale'eli moweweu meda inso a ngkeu akasia, orua hiku ondauno, asa hiku maluano ka mantandeno asa ka entonga hiku.

¹¹ Meda atuu inapiiako wulaa mpena ka linimbuako simpi wulaa.

¹² A limbuno meda atuu wineweu tengino asa pelengkae maluano ka tengino atuu sinimpiako wulaa.

¹³ Opaa mala-mala inso a wulaa tinawa wineweuako meda atuu ka luwuno mala-mala atuu pinasa i opaa siuno a opaa karuno.

¹⁴ Mala-mala atuu tepasa umpeda a ntengino meda gagi po'iangano keu ponsela, kai pinokowawa koa meda atuu.

¹⁵ Keu ponsela atuu wineweu inso a ngkeu akasia ka inapiiako wulaa, ka ia ngkeu atuu meda pinokowawa.

¹⁶ Onae moweweu parewa anu ta pinake a wawo meda atuu: sempeno, sangkirino, piala ka takeano anu pinake a mpesomba tinawa. Luwuno atuu wineweu inso a wulaa mpena.

Moweweu hulu mekaru

¹⁷ Iweweuo hulu mekaru inso a wulaa mpena; inso a wulaa pinalu iweweuo hulu mekaru atuu. Moiko karuno maupo sampano, lewekino saru palono ka bungano tepe'asa saru hulu mekaru atuu.

¹⁸ Onoo sampano meluarako inso i apano: otolu sampano hulu mekaru atuu inso i apano anu asa ka otolu sampano inso i apano anu susua.

¹⁹ Otolu lewekino kana bunga badama a sompo sampano i apano anu asa, saru palono ka bungano ka otolu lewekino anu mengkena a sampano anu susua saru palono ka bungano; kanatuu koa mbo'u iwineweu a onoo sampano anu meluarako inso a hulu mekaru atuu.

²⁰ A hulu mekaru atuu, hinao opaa lewekino kana bunga badama saru palono ka bungano.

²¹ Hinao mbo'u asa palono mo'asao sampano anu metaro amba-ambano anu meluarako inso a hulu mekaru atuu, asa palono a sampano anu metaro ko'orua ka asa palono a sampano anu metaro ko'otolu. Kanatuumo iwineweu a onoo sampano anu meluarako inso i tu'ai.

²² Palono ka sampano tepe'asa saru hulu mekaru atuu, ka luwuno wineweu inso a wulaa mpena anu pinalu, inso a asa wata wulaa anu mengkena.

²³ A hulu mekaru atuu, i weweuo opitu hulu saru sipino ka pontineaano, inso a wulaa mpena.

²⁴ Hulu mekaru atuu saru luwuno parewano, wineweu inso a asa talenta wulaa mpena.

Moweweu meda pontunua dupa

²⁵ Onae moweweu meda pontunua dupa inso a ngkeu akasia, asa hiku ondauno ka asa hiku maluano, gagi mensiu opaa mengkena ondauno ka maluano, sine mantandeno orua hiku ka tandu-tanduno tepe'asa saru meda pontunua dupa atuu.

²⁶ A wawono meda pontunua pesomba, lumimbuo luwuno apano ka tandu-tanduno, inapiiako wulaa mpena. Lumimbuo meda pontunua pesomba wineweu simpi wulaa.

²⁷ Onae moweweu orua mala-mala wulaa a meda pontunua dupa atuu i totono simpino. Mala-mala atuu wineweu a orua apano anu tepo'aro gagi po'iangano keu ponsela, kai pinokowawa meda pontunua pesomba.

²⁸ Keu ponsela atuu wineweu inso a ngkeu akasia ka inapiiako wulaa.

Moweweu lana po'urapi ka dupa

²⁹ Onae moweweu lana po'urapi anu mempori ka dupa ntu'u inso a luwuno rampa anu mo'ahi woono, wineweuno mia pande monsalo rampa.