Peluarakoa 36 - Wunta Mempori

¹ Kanatuumo dopo'angga i Besale'eli ka i Aholiabi, kanatuu koa mbo'u sompo mia anu hinao pandeno, anu Dopoweeakono i Ue pande ka ponto'ori, ranta ka doponto'ori mpoweweu luwuno anggaa mpowangu po'ianga mempori, kana perenta-Do i Ue.”

² Ka i'amba i Musa moboio i Besale'eli, i Aholiabi ka sompo mia anu pande mo'angga, anu Dopoweeakono i Ue pande i laro ngkoroino, sompo mia anu telelu aroano aiwa me'anggao anggaa atuu.

³ Ondae mentarimao inso ndi Musa luwuno pesomba pinesusua anu mewinawado to Isaraeli pakea a anggaa mowangu po'ianga mempori. To Isaraeli da kongkodo mpowawa pompowee a po'eheno aroado ndi Musa sompo mo'oru.

⁴ Ka i'amba luwuno mia pande anu me'anggao luwuno anggaa a mpo'ianga mempori, asa mia ka asa mia bintao anggaano anu kontongaano inanggano,

⁵ ka dompotae ndi Musa, ”Mewinawado palili hadioopo sekonopo anu kineredo mpoweweu anggaa kana parenta-Do i Ue.”

⁶ Ka i'amba i Musa metena ka ipinalele a luwuno pekemaa kanandio, ”Moiko tama ke beine siimo mbo'u imperokuhi mpowawa te'asa rupa gagi pesomba pinesusua a mpo'ianga mempori.” Kanatuumo dome'inonto palili mpowawa mbo'u pesomba.

⁷ Hangano sangka anu mehinawedo weweuno luwuno anggaa sompoomo, tendeano torea.

Moweweu Kema Mempori

⁸ Ka i'amba luwuno mia anu pande mo'angga, i olodo mia mpo'angga atuu, mpoweweu Kema Mempori inso a hopulu sawu tenda. Sangkano inso a lena alusu anu kinoloro banano ka bana wungo motu'a, wungo mongura, ka motaha motu'a. Sawu atuu domensulao megambara kerubi.

⁹ Ondauno sompo sawu tenda rua pulu ka oalu hiku ka maluano sompo sawu tenda opaa hiku. Luwuno sawu tenda atuu mengkena songkano.

¹⁰ Olima sawu tenda pinosombu asa ka anu susua, ka anu olima mbo'u, pinosombu asa ka anu susua.

¹¹ A nsawu anu pinosombu amba-ambano, i wiwino sawu tenda anu i tompano ntu'u, wineweu bolo-bolono anu kinoloro inso a nsawu wungo motu'a ka kanatuu koa mbo'u i wiwino sawu tenda anu i tompano ntu'u a nsawu pinosombu ko'orua.

¹² Lima pulu bolono wineweu tiano sawu tenda anu asa ka lima pulu mbo'u bolono a sawu tenda anu i tompano ntu'u a nsawu pinosombu ko'orua, gagi luwuno bolono atuu ntepopo'aro.

¹³ Wineweu lima pulu kai wulaa ka luwuno kai atuu onae pinake monsombuako orua tenda, gagi asa Kema Mempori.

¹⁴ Luwuno sawu tenda atuu wineweu inso a wulu bembe gagi atono kema anu borungio Kema Mempori, hopulu ka aasa sawu tenda wineweu.

¹⁵ Ondauno sompo sawu tenda, tolu pulu hiku ka maluano sompo sawu tenda opaa hiku. Hopulu ka asa sawu tenda atuu mengkena songkano.

¹⁶ Olima sawu tenda atuu sinombu gagi asa, ka onoo sawu tenda sinombu mbo'u gagi asa.

¹⁷ I wiwino asa sawu tenda anu i tompano ntu'u a nsawu sinombu amba-ambano, wineweu lima pulu bolono anu kinoloro ka lima pulu mbo'u bolono wineweu i wiwino asa sawu tenda a nsawu sinombu ko'orua.

¹⁸ Lima pulu kai mala wineweu ponsombu Kema atuu kai tepe'asa.

¹⁹ Kanatuu koa mbo'u borungino i wawono Kema atuu, wineweu inso a ngkuli bimba lakino anu pinarada motaha ka boru inso a ngkuli alusu i wawono mbo'u.

²⁰ A Ngkema Mempori atuu, wineweu dopi inso a ngkeu akasia anu pinontade moleo,

²¹ sompo dopi hopulu hiku ondauno ka maluano asa ka entonga hiku.

²² Sompo dopi hinao orua paso keu anu gagi pesombuano saru anu susua. Kanatuumo iwineweu luwuno dopino Kema Mempori.

²³ Rua pulu dopi wineweu i selatano Kema Mempori.

²⁴ Pato pulu po'empehi salaka wineweu i totono rua pulu dopi atuu, orua po'empehi i totono asa dopi, pentoroano orua paso keu ka orua po'empehi i totono sompo dopi petudano, pentoroano orua paso keuno.

²⁵ Kanatuu koa mbo'u i apano ko'orua Kema Mempori wineweu rua pulu dopi i utarano,

²⁶ saru pato pulu po'empehi inso a nsalaka: orua po'empehi i totono asa dopi ka orua empehino i totono sompo dopi petudano.

²⁷ I bungkuno Kema mempori, i sumooano oleo, wineweu onoo dopi.

²⁸ Orua dopi wineweu a orua siuno i bungkuno Kema Mempori.

²⁹ Orua dopi atuu pinotowo i totono, kanatuu koa mbo'u pinotowo i wawono a mala-mala anu asa atuu. Kanatuumo iwineweu orua dopi atuu a orua siuno.

³⁰ Gagi, oalu dopi saru po'empehi salaka hopulu ka onoo hadiono: orua po'empehi i totono asa dopi ka orua po'empehi i totono sompo dopi petudano.

³¹ Wineweu mbo'u keu montowea inso a ngkeu akasia: olima keu montowea a luwuno dopi i'apano anu asa Kema mempori,

³² olima keu montowea a luwuno dopi i apano anu susua Kema Mempori ka olima keu montowea a luwuno dopi i bungkuno Kema Mempori i somooano oleo.

³³ I tongano luwuno dopi atuu wineweu keu montowea, gagi montowea inso i tompano hawe i tompano.

³⁴ Luwuno dopi atuu inapiiako wulaa, luwuno mala-mala po'iangano luwuno keu montoweano, wineweu inso a wulaa ka luwuno keu montowea atuu inapiiako wulaa.

³⁵ Wineweu mbo'u pelingo inso a bana wungo motu'a, wungo mongura, motaha motu'a, ka lena alusu anu kinoloro banano. Pelingo atuu sinula megambara kerubi.

³⁶ A mpelingo atuu, wineweu opaa karuno inso a ngkeu akasia ka inapiiako wulaa, kaino inso a wulaa, ka i'amba pinoweweuako opaa po'empehi karuno inso a nsalaka tinawa.

³⁷ Wineweu mbo'u pelingo a mpewowano Kema atuu, anu sinula inso a bana wungo motu'a, wungo mongura, motaha motu'a ka lena alusu anu kinoloro banano,

³⁸ ka olima karuno saru kaino a ngkaruno atuu. Uluno ka luwuno ponsombuno inapiiako wulaa, ka olima po'empehi karuno atuu inso a mala.