Peluarakoa 35 - Wunta Mempori

Pepopoto'ori kai pinokomempori oleo Saba

¹ I Musa tumena ira luwudo bawaa Isaraeli mpepumpu. Ka i'amba motaeako ira, ”Ndiomo luwuno songka-Do i Ue anu ta tinonda ka wineweu.

² Onoo oleo tehineno moiko impo'angga anggaamiu, sine oleo ko'opitu, oleo Saba anu mempori ndi omiu, oleo penaa-naaa-Do i Ue. Sompo mia anu mo'angga anggaano oleo atuu, asalakono hinuku mate.

³ A oleo Saba, si mpopotuwu api maupo isua po'ianga miu.”

Pesomba pinesusua tiano Kema Mempori

⁴ Motae i Musa a luwuno bawaa Isaraeli, ”Ndiomo pau peparenta-Do i Ue:

⁵ Impo'alamo inso i olomiu pesomba pinesusua tia-Do i Ue. Sompo mia anu telelu aroano, mowawa gagi pesomba pinesusua tia-Do i Ue: wulaa, salaka, mala,

⁶ bana wungo motu'a, wungo mongura ka motaha motu'a, lena alusu, wulu bembe,

⁷ kuli bimba lakino anu pinarada motaha, kuli alusu, keu akasia,

⁸ lana pehulu, rampa-rampa weweua lana po'urapi ka weweua dupa anu mo'ahi woono,

⁹ paramata kerisopara ka paramata anu ta pinotako a lemba epo ka tutuwi rada.

¹⁰ Luwuno mia anu pande mo'angga ndi omiu asalakono dome'aiwa mpoweweu luwuno parenta-Do i Ue:

¹¹ Kema Mempori, tenda ka borungino, kaino, dopino, keu montoweano, karuno ka empehino karuno,

¹² burua po'iangano songka ka keu ponselano, ulo pesintuwua ka pelingo poborungi,

¹³ meda saru keu ponselano, ka luwuno parewano saru roti pesomba,

¹⁴ karuno hulu pompokomewanta, saru parewano, huluno ka lana pehulu,

¹⁵ meda pontunua pesomba dupa ka keu ponselano, lana po'urapi ka dupa inso a rampa mana mo'ahi, pelingo a mpewowano Kema Mempori,

¹⁶ meda pontunua pesomba tinunu saru tarali malano, keu ponselano ka saru luwuno parewano, bolusa pewo'ohia saru pentoroano,

¹⁷ pelingo po'oloti a kintala, karuno, empehino, ka pelingo a mpewowa langkai i kintala atuu,

¹⁸ pandorano Kema Mempori ka pandorano kintala ka kolorono,

¹⁹ sangka pompelangkai mompasilolonga pesombaa a mpo'ianga mempori, ka sangka mempori tiano sando mpesomba i Haruni ka sangkado luwuno anano anu sando mpesomba mpopekakaako.”

²⁰ Ka melako iramo luwu bawaa Isaraeli inso i arono i Musa.

²¹ Umarino atuu mehawe iramo sompo mia anu telelu aroano, mpowawa pesomba pinesusua anu moleo aroano ndi Ondae i Ue, poweweu Kema Tepotowoa, ka luwuno pesombaa i larono, ka sangka mempori.

²² Mehawe iramo sompo mia anu moleo aroano, tama maupo beine, mpowawa tole-tole enge, tole-tole biri, sinsi pontondoni ka enu-enu, ka luwuno peramba-ramba wulaa. Kanatuu koa mbo'u, sompo mia anu mompowee pesomba tinande inso a wulaa ndi Ondae i Ue.

²³ Kanatuu koa mbo'u sompo mia anu mowawa hapa hinado: bana wungo motu'a, wungo mongura, ka motaha motu'a, lena alusu, wulu bembe, kuli bimba lakino anu pinarada motaha ka kuli alusu.

²⁴ Sompo mia anu ta mompowee pesomba pinesusua inso a nsalaka ke mala, winawa pesomba atuu tia-Do i Ue, ka sompo mia anu hinao keu akasia, iwawao weweua luwuno parewa mpesomba.

²⁵ Sompo beine anu pande mongkoloroako kaeno, ka iwawao bana wungo motu'a, wungo mongura, ka motaha motu'a, ka lena alusu, anu kinolorono atuu.

²⁶ Luwuno beine anu pande ka telelu aroano, mongkoloro wulu bembe.

²⁷ Luwuno petewawa mpowawa paramata kerisopara ka paramata anu ta pinotako a lemba epo ka tutuwi rada,

²⁸ rampa-rampa ka lana pehulu, ka lana po'urapi ka dupa mo'ahi woono.

²⁹ Sompo tama ke beine, anu moleo aroano mowawa te'asa rupa tiano anggaa petena-Do i Ue ndi Musa ka iwineweu. To Isaraeli mewawao gagi pompowee a po'eheno aroado ndi Ondae i Ue.

Mia pande ka pesomba anu lulua

³⁰ Motae i Musa a nto Isaraeli, ”I mengkitaomo, Dotisoomo i Ue i Besale'eli anano i Uri anano i Huri, inso a nsuku Yehuda,

³¹ ka bukeakoomo pabawano Penaa-Do Ue Ala, saru monto'ori, mokonto'orio, pande mompewowolo ka mperupa-rupa ponto'orino,

³² kai poweweu mperupa-rupa sinongkapi anu ta inangga inso a wulaa, salaka ka mala,

³³ saru mo'aha watu paramata anu ta pinodede, monggori keu ka umanggao luwuno anggaa anu sinongkapi atuu.

³⁴ Ondae i Ue moweeakono mbo'u pande a ngkoroino kai pompaguru, kanatuu koa mbo'u ndi Aholiabi anano i Ahisamaki inso a nsuku Dani.

³⁵ Dopoweeako ira pande moweweu luwuno anggaa anu lano inanggano, puu mpopewowolo ka puu mpoweweu hinoru inso a bana wungo motu'a, wungo mongura, motaha motu'a, ka lena alusu, ka gagi mbo'u puu mponsula. Ondae moweweu mperupa-rupa anggaa ka moweweu mperupa-rupa anu ta sinongkapi.