Peluarakoa 34 - Wunta Mempori

Orua watu poburia songka anu wo'ohu

¹ Mepau Iramo i Ue ndi Musa, ”Pompa'omo te'orua watu mengkena anu amba-ambano. Aku burio ia orua watu buriano songka atuu luwuno songka anu teburi a watu anu amba-ambano, anu pinerawo-rawomu atuu.

² Umpeda meene pepatindamo, ka mo'oru porakemo a ntorukuno Sinai. Pentademo itahai me'aro ndi Ongkue a punsuno torukuno atuu.

³ Si hina maupo te'asa mia anu morake merongaakomu. Maupo te'asa mia si hina tengkita i asa torukuno atuu, maupo asa bawaa bembe bimba, ka sapi si dompokuri ewo a mpuu torukuno atuu.”

⁴ Ka i'amba i Musa mompa'o orua watu mengkena kana anu amba-ambano. Da mo'oru mewanguomo ka iporake a ntorukuno Sinai, kana petena-Do i Ue ndi onae. Orua watu buriano songka atuu iwawao a ngkaeno

⁵ Ondae i Ue metii a laro nseru, ka Dopentade saru i Musa itahai mebooliako nee-Do i Ue.

⁶ Ka Do'amba i Ue telalo i arono mebooli, ”Ue, Ue, Ue Ala puu pompehohawa, ondau sabara, anu langkai pompehohawa ka petenunu-Do,

⁷ anu nahi bali pompehohawa-Do a sowu-sowuno mia, anu mo'onini sala, pe'ewa ka hala, sine nahi Dopo'inee ira mia anu sala toola inso a mpohuku, anu mombalo salano luwuno ama, a ana ueno, hawe a inuleno anu ko'otolu ka ko'opaa.”

⁸ I Musa mansa menggolontuu i wita ka ipesomba.

⁹ Ipotae, ”Tewala mohawe aku pompehohawa i aro-Miu, oo Ue, Ikongkomi kamimo, oo Ue. Lano tongku andio me'ulu watu, sine I'oninio sala ka hala mami, ka Ipokogagi kamimo bawaa-Miu.”

¹⁰ Ka Do'amba mepau i Ue, ”Mentee ntu'u, Aku moweweu pedandia. I arodo luwuno tongkumu, Aku mompokogagi luwuno wineweu anu kinohali-haliako, anu napi hori gagi i asa wawontolino i olodo luwuno tongku. Luwuno tongku anu perongamiu, ira mengkitao pinokogagi-Do i Ue, hangano tedoa mongkokongiri hapa anu Aku mokogagio saru omue.

¹¹ Sine omue, pe'inimo a anu Kutenaakomu oleo andio. Kitao, Aku sumaari ira inso i aromiu, to Amori, to Kana'a, to Heti, to Perisi, to Hewi ka to Yebusi.

¹² Impetangkoro, si mpedandiako ira palili i wita anu komiu mpewinsokio atuu, kasi mentetanggoako.

¹³ Tendeano luwuno meda pontunuado pesomba impobangku ira, luwuno tugu lahumoado imerawo-rawoo, ka karuno lahumoado imentuehi ira,

¹⁴ si mpenggolontu mpesomba a anu pinesombaido susua, hangano Ondae i Ue meneeako ”Mosiri”, Ondae, onaemo Ue Ala anu mosiri.

¹⁵ Si mansa mpoweweu pedandia saru palili i wita atuu, hangano tewala mpososabo ira mpetonda a anu pinesombaido ka mpompesombaako pesomba a anu pinesombaido atuu, ba domansa me'olu komiu ka impetonda mpongkaa pesombado anu sinumbele.

¹⁶ Kanatuu koa mbo'u tewala mpo'alakomiu ana beinedo gagi kombiado anamiu tama, ana beinedo ira mponsosabo mpotonda a anu pinesombaido, ba mansa dompopandei ira anamiu tama mponsosabo ka mpetonda a anu pinesombaido.

¹⁷ Si poweweu anu pinesombai tinawa.

¹⁸ Oleo Langkai Roti Nahi Peragi asalakono imerame-rameo. Kana anu umariomo Kutenaakomu, opitu oleo tehineno asalakono impongkaa roti nahi peragi, a tempo anu pinakosi a wula Abi, hangano a wulamo atuu impeluarako inso i wita Masiri.

¹⁹ Luwuno anu pine'anaako amba-ambano inso a laro kompo, onaemo anu-Ku, kanatuu koa mbo'u inso a luwuno pinotuwumiu anu lakino, anu pine'anaako amba-ambano, inso a nsapi ke bimba.

²⁰ Sine sompo anano kalide anu pine'anaako amba-ambano, asalakono tolosiakono asa ana bimba. Tewala nahi utolosio, asalakono puduo we'uno. Sompo anamiu tama anu aka, asalakono tinolosi. Si hina mia aiwa me'aro ndi Ongkue moa ngkae.

²¹ Onoo oleo tehineno impo'angga, sine oleo anu ko'opitu asalakono impenaa-naa. Maupo tempo kopompadekoa ke tempo konsowia, asalakono i mpelangkaio oleo penaa-naaa atuu.

²² Oleo langkai Opitu Minggu, porame-ramea wua amba-ambano sumowi gandu, asalakono imeweweuo, kanatuu koa mbo'u oleo langkai Popumpua Wua Mpinopaho a mpepo'euano ta'u.

²³ Pentolu asa nta'u luwuno tama ndi omiu asalakono domelako mpesomba i aro-Do Ue Ala, Ue Alado to Isaraeli.

²⁴ Tewala Kusaari ira luwuno tongku inso i aromiu ka mokomaluao witamiu, nahina maupo te'asa mia ta mosisiriakono witamiu itempono impesomba i aro-Do i Ue, Ue Alamiu, pentolu ilarono asa nta'u.

²⁵ Si mpopesombaako reano pesomba sinumbele ndi Ongkue saru luwuno anu meragi. Pesomba sinumbele a oleo langkai Pasa, Si mpo'ineeo torea hawe mo'oru.

²⁶ Wua amba-ambano anu lalu moiko i witamiu asalakono imewawao a raha-Do i Ue, Ue Alamiu. Anano bembe si menahuo a laro uwoi uono ineno.”

²⁷ Mepau Iramo i Ue ndi Musa, ”Burio luwuno pau andio, hangano me'empehiako pau andio Aku mowutu pedandia saru omue ka to Isaraeli.”

²⁸ I Musa mo'ia i ra'ai saru Ondae i Ue, pato pulu oleo ka pato pulu wongi tehineno. Nahi pongkaa roti ka nahi po'inu uwoi. Onae burio a orua watu poburia songka atuu luwuno pau pedandia, Hopulu Songka.

²⁹ Ka i'amba metii i Musa inso i torukuno Sinai, saru orua watu buriano songka a ngkaeno. Tempono ipetii inso i torukuno atuu, nahi to'orio nine kuli rupano mewanta hangano umari mepau saru Ondae i Ue.

³⁰ Mansano i Haruni ka luwudo to Isaraeli mengkitao i Musa, tengkitaomo kuli rupano mewanta, onaemo ka domedoito me'umpedaa kono.

³¹ Sine mansano i Musa moboi ira, i Haruni ka luwuno petewawa bawaa me'aiwa ndi onae, ka i Musa mepauako ira.

³² Umarino atuu luwudo to Isaraeli aiwa me'umpeda, ka i'amba i Musa mohaweako ira luwuno parenta anu pinau-Do i Ue ndi onae i torukuno Sinai.

³³ Mansano umari i Musa mepauako ira, i tutuwiakono pesoumbu rupano.

³⁴ Sine sompo ipewinso i Musa me'aro ndi Ondae i Ue ta mepau saru Ondae, i'oninio pesoumbuno atuu ranta ka ipeluarako. Tempono ipeluarako ka ipauako ira to Isaraeli hapa anu ipinarentaako,

³⁵ to Isaraeli mengkitao rupano i Musa mewanta kuli rupano. Onaemo kai wali mokonao pesoumbuno a rupano ranta kai pewinso me'aro ndi Ondae i Ue ka ipepau saru Ondae.