Peluarakoa 33 - Wunta Mempori

Ondae i Ue montena Mala'eka-Do

¹ Mepau Iramo i Ue ndi Musa, ”Impelungkamo inso i ndi'ai, omue saru tongku anu winawamu mpeluarako inso i wita Masiri, a wita anu Kudandiomo mesumpa ndi Burahima, ndi Saki ka ndi Yako, kanandio: A inulemu Aku meweengakono wita andio.

² Aku montena asa mala'eka melempa i aromu anu ta sumaari ira to Kana'a, to Amori, to Heti, to Perisi, to Hewi ka to Yebusi.

³ Komiu mpewinso a wita anu hadio susu ka siu hoani. Sine nahi Aku melempa i olomiu, kasi Kupepatekomiu a nsala, hangano omiu tongku anu me'ulu watu, kasi Kuropu komiu a nsala.”

⁴ Mansado merongeo tongku atuu pau anu mongkokongiri atuu, mponsabangi iramo. Nahina maupo te'asa mia mompake peramba-ramba.

⁵ Mepau Iramo i Ue ndi Musa, ”Pauako ira to Isaraeli: Omiu tongku anu me'ulu watu, ande-andeno melempa Aku i olomiu maupo tesarai, manasa Kuropu komiu. Kanandio-andio imelolohio peramba-ramba miu, ka Aku mokomanasao hapa anu ta wineweu-Ku ndi omiu.”

⁶ Onaemo pu'uno to Isaraeli nami dompopake mbo'u peramba-ramba mompu'u inso i torukuno Hore.

Kema Tepotowoa ibungkuno pekemaa

⁷ Kanatuumo i Musa, wela umalao kema ka ipasao i bungkuno pekemaa, olai inso a mpekemaa atuu. Ineeakono Kema Tepotowoa. Sompo mia anu umungke Ira i Ue, ta lumako a Ngkema Tepotowoa atuu anu mo'ia olai inso a mpekemaa.

⁸ Sompo ilako i Musa a Ngkema Tepotowoa atuu, luwuno tongku pentade, sompo mia mentade a mpewowano kemano. Dompoporooo i Musa ranta ka ipewinso a laro Kema Tepotowoa atuu.

⁹ I tempono i Musa mewinso a laro Ngkema atuu, metiiomo seru-Do Ue Ala ka menaa-naa a mpewowano Kema atuu, ka Do'amba i Ue mepauakono i Musa.

¹⁰ Sompo domengkitao luwuno tongku atuu seru-Do Ue Ala menaa-naa a mpewowano Kema atuu, mpentade ira ka dompenggolontu mpesomba, sompo mia a mpewowa kemano.

¹¹ Ondae i Ue mepau ndi Musa tepopo'aro kana asa mia mepauakono walino. Umarino atuu mekuleomo i Musa a mpekemaa, sine i Yosua anano i Nunu, tetenaano, anu da mongura, nahi bintao Kema atuu.

I Musa i arono maramba-Do i Ue

¹² Motae i Musa ndi Ondae i Ue, ”Omiumo anu mepau ndi ongkue: ’Wawa iramo tongku andio melako!’ Sine nahi Ipauakune, isema anu Komiu tumenao merongaakune. Kahinaano mepau Komiu: ’Kuto'oriko saru neemu ka mohaweko mbo'u pompehohawa i aro-Ku.’

¹³ Kanandio-andio, tewala mohawe aku pompehohawa i aro-Miu, Ipauakune po'ehe-Miu ranta ka kuto'ori-Komiu, ka kukongko mpiha mohawe pompehohawa i aro-Miu. Ipewowoloo tongku andio bawaa-Miu.”

¹⁴ Ka i'amba mepau Ira i Ue, ”Ongkuemo anu kumongkomiko ka moweeko rodoa.”

¹⁵ Motae i Musa ndi Ondae, ”Tewala komba Omiu kumongkomi kami, si wawa kami mpelungka inso i ndi'ai.

¹⁶ Gagi kana'umpe ira mento'orio mia, nine mohawe akumo pompehohawa i aro-Miu, ongkue ka bawaa-Miu andio? Kombake hangano Omiu kumongkomi kami, ranta omami, ongkue ka bawaa-Miu pinesusua inso a luwuno tongku i wawontolino?”

¹⁷ Mepau Iramo i Ue ndi Musa, ”Maupo anu pinaumu andio Aku mokogagio, hangano omue mohawekomo pompehohawa i aro-Ku ka Kuto'orio koroimu saru neemu.”

¹⁸ Sumangki i Musa, ”Po'ineeomo ka Ipopokitao maramba-Miu ndi ongkue!”

¹⁹ Ka i'amba pau-Do i Ue, ”Aku mokogagio luwuno mewanta-Ku telalo i aromu, ka ta mebooliako nee-Ku Ue i aromu; Aku moweeakono pompehohawa a mia anu Kupoweeakono pompehohawa, ka Aku mehohawao mia anu pinehohawa-Ku.”

²⁰ Pau-Do mbo'u, ”Nahi komoko kitao rupa-Ku, hangano nahina mia anu kumita Aku ta tuwu.”

²¹ Ka i'amba pau-Do i Ue, ”Hinao po'ianga umpeda ndi Ongkue, i wawono torukuno watu atuu moiko pentadeamu.

²² Tempono itelalo maramba-Ku, Aku numaako i apino torukuno atuu ka Aku lumingoiakomu kae-Ku, ranta ka Kutelalo.

²³ Ka Ku'amba padiio kae-Ku ka kokumitao bungku-Ku, sine rupa-Ku nahi ta tengkita.”