Peluarakoa 31 - Wunta Mempori

Anggaado i Besale'eli ka i Aholiabi

¹ Mepau Iramo i Ue ndi Musa,

² ”Kitao, Kutisoomo i Besale'eli anano i Uri anano i Huri, inso a nsuku Yehuda.

³ Ku'buketiakonomo pabawano Penaa-Do Ue Ala, saru monto'ori, ponto'ori, pande mompewowolo ka mperupa-rupa ponto'orino,

⁴ kai poweweu sinongkapi anu ta inangga inso a wulaa, salaka ka mala,

⁵ saru mo'aha watu paramata anu ta pinodede, monggori keu ka moweweu mperupa-rupa anggaa.

⁶ Kupakosiomo mbo'u saru onae i Aholiabi anano i Ahisamaki, inso a nsuku Dani. Kuweeako iramo pande a luwudo mia mpande atuu, ranta ka dompokoweweuo luwuakoano anu umari Kutenaa komu:

⁷ Kema Tepohawea, burua po'iangano songka, ulo pesintuwua i wawono, ka luwuakoano parewano Kema atuu, onaemo:

⁸ meda saru parewano, karuno hulu inso a wulaa mpena saru luwuno parewano, meda pontunua pesomba dupa,

⁹ meda pontunua pesomba tinunu, saru luwuno parewano, bolusa pewo'ohia saru pentoroano,

¹⁰ sangka pesomba, moiko sangka mempori tiano sando mpesomba i Haruni, maupo luwuno anano, pakeado mpo'angga gagi sando mpesomba,

¹¹ lana po'urapi ka dupa inso a luwuno rampa anu mo'ahi woono tiano po'ianga mempori. Asalakono ka domeweweuo montonda kana anu Kutenaakomiu.”

Parenta mokomemporio oleo Saba

¹² Mepau Iramo i Ue ndi Musa,

¹³ ”Pauako iramo to Isaraeli: Impe'ihi laroomo, asalakono impelangkaio luwuno oleo Saba-Ku, hangano onaemo tondonino olono Ongkue ka omiu ranta hawe luwuno inulemiu, kai mento'orio nine Ongkuemo Ue, anu mokomempori komiu.

¹⁴ Asalakono impelangkaio oleo Saba, hangano oleo atuu mempori ndi omiu. Isemamo koa anu nahi pelangkaio, manasa hinuku mate, hangano sompo mia anu mo'angga aggaano oleo atuu, asalakono pinokotampula inso a tongkuno.

¹⁵ Onoo oleo tehineno moiko impo'angga, sine oleo anu ko'opitu asalakono hinao Saba, oleo penaa-penaaa, oleo mempori ndi Ondae i Ue. Sompo mia anu mo'angga oleo Saba, hinuku mate.

¹⁶ To Isaraeli asalakono mpekakaakono oleo Saba dompelangkaio oleo atuu, a luwuno inulemiu gagi pedandia anu nahina tampulaano.

¹⁷ Onaemo tondonino olono Ongkue ka to Isaraeli ranta nahina tampulaano, hangano onoo oleo tehineno Ondae i Ue mokogagio langi ka wawontolino, ka a oleo anu ko'opitu nami Dopo'angga ka Dopenaa-naa.”

I Musa montarima orua watu poburia songka

¹⁸ Mansa-Do umari mepau ndi Musa i torukuno Sinai, Ondae i Ue meweengakono ndi onae orua watu poburia songka, watu anu binuriako toniso-Do Ue Ala.