Peluarakoa 30 - Wunta Mempori

Meda pontunua pesomba dupa

¹ ”Omue asalakono moweweu meda pontunua pesomba, pontunua dupa. Asalakono uweweuo inso a ngkeu akasia,

² asa hiku ondauno ka asa hiku maluano, ranta kai mensiu opaa, sine mantandeno orua hiku ka tandu-tanduno asalakono tepe'asa saru meda pontunua pesomba atuu.

³ I wawono meda pontunua pesomba, luwuno apano limbu ka tandu-tanduno, asalakono apiiakono wulaa mpena. Limbu meda pontunua dupa atuu poweweuakono simpi wulaa.

⁴ Asalakono poweweu orua mala-mala wulaa tiano meda pontunua dupa atuu i totono simpino. A orua apano anu tepo'aro, pasao binansi atuu. Ka mala-mala atuu gagi po'iangano keu ponsela meda pontunua dupa, ka ipinokotande meda pontunua pesomba.

⁵ Asalakono poweweu keu ponsela atuu inso a ngkeu akasia ka apiiakono wulaa.

⁶ Meda pontunua dupa atuu asalakono naao i arono pelingo anu i arono burua pedandia, i arono ulo pesintuwua anu i wawono watu buriano songka, po'ianga Aku tepohaweakomu.

⁷ I wawono meda pontunua pesomba atuu, i Haruni asalakono montunu dupa mo'ahi woono. Sompo mo'oru tempono ipokomorinao luwuno hulu, asalakono kai tunuo.

⁸ Kanatuu koa mbo'u i Haruni mompokomelanga hulu i tempono ngkiniwia, asalakono kai tunuo gagi dupa anu kongko mpiha i aro-Do i Ue, ranta hawe ia inulemiu.

⁹ I wawono meda pontunua pesomba dupa atuu, si mpopesombaako dupa anu nahi mempori, ke maupo pesomba tinunu ka pesomba kaanga; kanatuu koa mbo'u si mpotawa pesomba tinawa i wawono.

¹⁰ I larono asa nta'u pohona i Haruni asalakono moweweu pesintuwua i wawono tandu-tanduno. Onae asalakono moweweu pesintuwua a meda pontunua pesomba atuu i larono asa nta'u pohona saru rea pesomba po'onini hala, pesomba pesintuwua ranta hawe ia inulemiu. Meda pontunua pesomba atuu tedoa mempori ndi Ondae i Ue.”

Pesomba pesintuwua a mpeburiado to Isaraeli

¹¹ Ondae i Uemepau ndi Musa,

¹² ”Tewala modoako hadiodo to Isaraeli, sompo mia asalakono mompesombaako doi pontolosi, hangano penaano ndi Ondae i Ue tempono domebinuri, kasihina pohuku ndi ondae i tempono peburia atuu.

¹³ Asalakono ndiomo anu ipesombaakono sompo-sompo mia anu mebinuri: entonga sikala montonda sikala a mpo'ianga mempori, anu mobeano rua pulu gera. Entonga sikalano atuu pesomba pinesusua ndi Ondae i Ue.

¹⁴ Sompo mia anu binuri, anu tinuwuno rua pulu nta'u kontahane, asalakono mompesombaako pesomba pinesusua ndi Ondae i Ue.

¹⁵ Mia mompoli nahi moiko mompesombaako torea ka mia mongkokolaro nahi moiko mompesombaako makura inso entonga sikala atuu tempono impompowee pesomba pinesusua atuu ndi Ondae i Ue, anu moweweu pesintuwua tiano penaamiu luwu-luwu.

¹⁶ Asalakono poruru doi pesintuwua inso a nto Isaraeli ka ipinake a mpesombaa i Kema Tepotowoa. Onaemo ta gagi pepopoto'ori a nto Isaraeli i aro-Do i Ue ka gagi pesintuwua tiano penaamiu luwu-luwu.”

Kusi pewo'ohia

¹⁷ Mepau Iramo i Ue ndi Musa,

¹⁸ ”Asalakono kau poweweu bolusa mala saru empehino inso a mala ta pewo'ohia. Asalakono kau naao i olono Kema Tepotowoa ka meda pontunua pesomba, ka i'amba inihiiako uwoi.

¹⁹ I Haruni ka luwuno anano asalakono mewo'ohiakono uwoi kaedo ka karudo, inso a bolusa atuu.

²⁰ Tewala dompewinsokio Kema Tepotowoa, asalakono koroido domewo'ohiakono uwoi atuu, kasi domemate. Kanatuu koa mbo'u ba dome'aiwa a meda pontunua pesomba atuu gagi petewawa a mpesombaa ka pontunu pesomba tia-Do i Ue.

²¹ Asalakono domewo'ohio kaedo ka karudo, kasi domemate. Onaemo pompakosi ndi ondae ranta nahina tampulaano, ndi Haruni ka luwuno inuleno.”

Lana po'urapi anu mempori

²² Mepau Iramo i Ue ndi Musa,

²³ ”Alaomo rampa-rampa anu tebiniki, mire me'uwoi lima etu sikala, keu mo'ahi woono entongano, rua etu ka lima pulu sikala, ka rampalemo anu lalu mo'ahi woono, rua etu ka lima pulu sikala,

²⁴ keu teja lima etu sikala, tinimba montonda sikala a mpo'ioanga mempori ka lana saitu asa hini.

²⁵ Luwuno atuu asalakono kau weweuo gagi lana po'urapi anu mempori, pesaloano anu memo'ahi woono wineweuno mia mpande rampa. Onaemo anu gagi lana po'urapi anu mempori.

²⁶ Kema Tepotowoa ka burua pedandia, asalakono urapiakono lana atuu,

²⁷ meda saru luwuno parewano, karuno hulu saru luwuno parewano, meda pontunua pesomba dupa,

²⁸ meda pontunua pesomba tinunu saru luwuno parewano ka bolusa pewo'ohia saru empehino.

²⁹ Asalakono kau pokomemporio luwuno atuu, ranta kai gagi tedoa mempori. Hapamo koa anu tedanggi saru luwuno atuu ta gagi mempori.

³⁰ Omue mbo'u, asalakono umurapio ka mokomemporio i Haruni ka luwuno anano, ka domegagi sando mpesomba-Ku.

³¹ Pauako iramo to Isaraeli: Onaemo andio anu gagi lana po'urapi anu mempori ndi Ongkue ranta hawe a luwuno inulemiu.

³² Lana atuu nahi moiko ipinake a mondeekinomo koa mia. Omiu nahi moiko impoweweu lana anu salono kanatuu. Lana atuu mempori kai gagi koa mempori ndi omiu.

³³ Mia anu moweweu salono kanatuu, ka ihahiakono a mia biasa asalakono pinokotampula inso a tongkuno.”

Dupa anu mempori

³⁴ Mepau Ira i Ue ndi Musa, ”Alaomo ba te'opia rupa rampa anu memo'ahi woono, inso a ngkeu hulu anu mo'ahi woono, kuli meti ka puluno rasamala, saru dupa ntu'u, luwuno temengkena hadiono.

³⁵ Luwuno atuu weweuomo gagi dupa, pesaloano anu memo'ai woono, wineweuno asa mia mpande rampa. Dupa atuu anu inohia, onaemo dupa ntu'u ka mempori.

³⁶ Asa ntia dupa atuu gilio ranta ka imotutu, ka u'amba numaao asa ntia i arono burua po'iangano songka i larono Kema Tepotowoa, a mpo'ianga Aku tepohaweakomu. Dupa atuu asalakono gagi tedoa mempori ndi omiu.

³⁷ Dupa anu wineweumu montonda salono kanatuu, sii poweweu tiano koroimu. Dupa atuu tia-Do i Ue ka mempori ndi omiu.

³⁸ Isemamo koa anu moweweu salono dupa kanatuu, kai woo woono, asalakono pinokotampula inso i olono tongkuno.”