Peluarakoa 29 - Wunta Mempori

Poronsoano i Haruni saru luwuno anano

¹ ”Ndiomo anu asalakono kau weweuo ndi ondae mokomempori ira ka domegagi sando mpesomba-Ku. Alaomo asa sapi lakino anu da mongura ka orua bimba lakino anu nahina tataano,

² roti nahi peragi ka roti bonggoli nahi peragi anu sinaloako lana ka roti monipi nahi peragi, anu hinahiako lana. Luwuno atuu asalakono weweuo inso a ntarigu anu moiko ntu'u.

³ Asalakono luwuno kau naao a laro asa dula kau pesombaakono luwu anu a laro dula atuu meronga sapi lakino ka orua bimba lakino atuu.

⁴ Asalakono kau wawao i Haruni saru luwuno anano a mpewowano Kema Tepotowoa, ka wo'ohiako ira uwoi.

⁵ Ka u'amba umalao ka moposangkaakono luwuno sangka atuu, ndi Haruni: Lemba meloe i larono, lemba meloe i bungkuno, lemba epo ka tutuwi rada. Asalakono tanggoakono i Haruni koloro tanggono lemba epo.

⁶ Pokonaakono peboo ulu a wawo uluno ka potakoo ramba-ramba wulaa anu mempori a mpeboo ulu atuu.

⁷ Umarino atuu, asalakono kau alao lana po'urapi kau siwuiakono a wawo uluno umurapio.

⁸ Ka u'amba wawa ira luwuno anano me'umpeda ka pokonaakono i larono lemba meloe ndi ondae.

⁹ Peboo ntonga, asalakono pokonaakono i Haruni ka a luwuno anano ka peboo ulu atuu, pokonaako ira, ranta ka domegagi sando mpesomba menunu saru pompakosi nahina tampulaano. Kanatuumo urapi ira i Haruni ka luwuno anano.

¹⁰ Ka u'amba wawao sapi laki i arono Kema Tepotowoa, ka do'amba i Haruni saru luwuno anano, menaao kaedo a wawo uluno sapi atuu.

¹¹ Sumbeleomo sapi atuu i aro-Do i Ue a mpewowano Kema Tepotowoa.

¹² Po'alamo tedei reano sapi atuu kau hahiakono tonisomu a ntandu-tanduno meda pontunua pesomba. Toreano rea atuu, uwuo i totono meda pontunua pesomba.

¹³ Umarino atuu alao luwuno taba anu tumutuwio ihi larono ka asa ntia ateno anu lalu moiko, orua wua horino ka tabano anu metako ndi onae. Tunuomo luwu a wawo meda pontunua pesomba.

¹⁴ Sine bauno sapi atuu saru kulino ka ta'ino, tunuomo kai pingko i bungkuno pekemaa. Onaemo pesomba po'onini hala.

¹⁵ Ka u'amba umalao asa inso a bimba lakino atuu. Ka do'amba i Haruni ka luwuno anano, menaao kaedo a wawo uluno bimba atuu.

¹⁶ Sumbeleomo bimba lakino atuu, alaomo reano ka siwuiakono lumimbuo meda pontunua pesomba.

¹⁷ Sampaomo bimba atuu montonda tia-tiano. Ka u'amba wo'ohio ihi kompono ka witino ka unaao saru luwuno batuno atuu ka uluno.

¹⁸ Ka i'amba luwuno bimba atuu, asalakono tunuo a wawo meda pontunua pesomba. Onaemo pesomba tinunu, pesomba anu mo'ahi woono ndi Ondae i Ue, pesomba anu tinunu a api tia-Do i Ue.

¹⁹ Alaomo bimba lakino anu ko'orua. I Haruni ka luwuno anano asalakono domenaao kaedo a wawo uluno bimba laki atuu.

²⁰ Sumbeleo bimba atuu ka po'ala reano tedei kau hahiakono tonisomu a lewe biri ngkoanano i Haruni ka luwuno anano, a ine ntoniso kae ngkoanado ka a ine ntoniso karu ngkoanado, toreano rea atuu siwuiakono lumimbuo meda pontunua pesomba.

²¹ Po'alamo tedei rea inso a meda pontunua pesomba ka tedei inso a lana po'urapi, ka u'amba tumawisiakono i Haruni ka a sangkano, a luwuno anano ka a sangkado. Hangano onae, memporiomo i Haruni ka sangkano kanatuu koa mbo'u luwuno anano ka sangkado.

²² Alaomo taba inso a bimba atuu, ikino anu mentaba, tabano anu tumutuwio ihi laro kompono, asa ntia ateno anu lalu moiko, orua wua horino ka taba anu metako ndi onae saru pa'a ngkoanano. Hangano bimba lakino atuu pesomba a poronsoa.

²³ Inso a dula anu me'ihi roti nahi peragi anu kongko i aro-Do i Ue, alao mbo'u asa roti, asa kukisi bonggoli anu sinaloako lana ka asa roti monipi.

²⁴ Naaomo luwuno a pelengkaeno i Haruni ka a pelengkaedo luwuno anano ka pesobaakono luwu gagi pesomba tinande i aro-Do i Ue.

²⁵ Umarino atuu asalakono alao luwu inso a ngkaedo ka tunuo a meda potunua pesomba, iwawono pesomba tinunu, gagi pesomba anu mo'ahi woono. Onaemo pesomba anu tinunuako api tia-Do i Ue.

²⁶ Alaomo mbo'u radano bimba lakino anu pinesombaako a poronsoano i Haruni ka upesombaakono gagi pesomba tinande i aro-Do i Ue. Onaemo tiamu.

²⁷ Kanandiomo upokomemporio radano bimba lakino gagi pesomba tinande ka pa'ano gagi pesomba anu pinesusua, anu pinesombako a poronsoano i Haruni ka luwuno anano.

²⁸ Onaemo tiano i Haruni ka luwuno anano, montonda pompakosi anu tinondado to Isaraeli ranta nahina tampulaano, hangano onaemo pesomba pinesusua. Pesombado to Isaraeli anu pinesusua asalakono inala inso a mpesomba tekaduduiado ka gagi pesombado anu pinesusua ndi Ondae i Ue.

²⁹ Sangka mempori anuno i Haruni, lembuiano ta gagi tiado luwuno anano. Tempono dome'inurapi ka merinonso, asalakono ka domempakeo.

³⁰ Opitu oleo tehineno sangka atuu asalakono ipakeo sando mpesomba euno i Haruni inso i olodo luwuno anano, anu mewinso a Ngkema Tepotowoa gagi petewawa mpesomba a mpo'ianga mempori.

³¹ Alaomo bimba lakino, pesomba a poronsoa atuu, ka imensakao bauno i aasa po'ianga mempori.

³² A mpewowano Kema Tepotowoa, i Haruni ka luwuno anano asalakono mengkaano bauno bimba lakino atuu ka roti anu a dula.

³³ Asalakono domengkaano luwu anu pinake a mpesomba pesintuwua, itempono domerinonso ka mempinokomempori. Sine mia biasa nahi moiko domengkaano, hangano luwuno atuu mempori.

³⁴ Tewala hinao torea inso a bauno pesomba poronsoa ka inso a roti atuu hawe mo'oru, anu torea atuu asalakono tunuo a api kai pingko. Anu torea atuu nahi moiko ikinaa, hangano luwuno atuu mempori.

³⁵ Kanandiomo uweweuo ndi Haruni ka a luwuno anano, tondao kana anu Kuparentaakomu. Asalakono opitu oleo tehineno uronso ira.

³⁶ Sompo oleo asalakono patindao asa sapi lakino gagi pesomba po'onini hala tiano mpoweweu pesintuwua. Meda pontunua pesomba atuu asalakono pokomemporiakono moweweu pesintuwua ndi onae. Asalakono urapio kai pokomemporio.

³⁷ Opitu oleo tehineno poweweuakono pesintuwua meda pontunua pesomba atuu. Asalakono pokomemporio meda pontunua pesomba atuu kai gagi tedoa mempori. Hapakoa anu dumanggio meda pontunua pesomba atuu ta gagi mempori.”

Pesomba mo'oru ka pesomba ngkiniwia

³⁸ ”Ndiomo anu asalakono upatindao a wawo meda pontunua pesomba te'atora sompo oleo: orua ana bimba tinuwuno asa nta'u.

³⁹ Bimba anu asa, asalakono patindao tempono mo'oru ka bimba anu susua, patindao tempono ngkiniwia.

⁴⁰ Meronga saru bimba anu asa atuu, asalakono kau patindao asa ntia hopulu efa tarigu anu moiko ntu'u, sinaloako saru asa ntia opaa hin lana inso a nsaitu anu pinokomotutu, ka patindao mbo'u asa ntia opaa hini anggoro gagi pesomba tinawa.

⁴¹ Bimba anu susua asalakono patindao tempono ngkiniwia. Mengkena kana pesomba kaanga ka pesomba tinawa tempono mo'oru, asalakono patindao gagi pesomba anu mo'ahi woono, aasa pesomba anu tinunuako api tia-Do i Ue.

⁴² Onaemo pesomba tinunu anu wineweu mpiha i olomiu ranta hawe a inulemiu a mpewowano Kema Tepotowoa i aro-Do i Ue. I ra'aimo Aku tepohaweakomu mepau ndi omue.

⁴³ I ra'aimo Aku tepohaweako ira to Isaraeli ka po'ianga atuu ta pinoko memporiako maramba-Ku.

⁴⁴ Aku mokomemporio Kema Tepotowoa ka meda pontunua pesomba atuu, ka Aku mokomemporio i Haruni ka luwuno anano ka domegagi sando mpesomba-Ku.

⁴⁵ Aku mo'ia i olodo to Isaraeli ka Aku gagi Ue Alado.

⁴⁶ Iramo mento'orio nine Ongkuemo Ue, Ue Alado, anu wawa iramo mpeluarako inso i wita Masiri, ka Kupo'ia i olodo, Ongkuemo Ue, Ue Alado.”