Peluarakoa 28 - Wunta Mempori

Sangkado sando mpesomba

¹ ”Wawao i Haruni akamu ka luwuno anano ndi omue inso i olodo to Isaraeli ka dompopekakaako gagi sando mpesomba ndi Ongkue, i Haruni saru i Nadabi, i Abihu, i Eleasa ka i Tamari, luwuno anano i Haruni.

² Omue asalakono poweweu sangka mempori tiano i Haruni, akamu ka imewanta ka maramba.

³ Omue asalakono pauako ira luwuno mia anu hinao ponto'orino, anu umariomo Kupokobukeako ira penaa ponto'ori ka dompoweweu sangka tiano i Haruni anu mokomemporio, kai pompekakaako gagi sando mpesomba ndi Ongkue.

⁴ Ndiomo sangka anu asalakono ira meweweuo: tutuwi rada, lemba epo, lemba meloe i bungkuno, lemba meloe i larono anu sinula, peboo ulu ka sulepe. Asalakono kanandiomo domeweweuo sangka mempori tiano i Haruni, akamu ka tiado luwuno anano, ka dompopekakaako gagi sando mpesomba ndi Ongkue.

⁵ Gagi asalakono ira mempo'ala wulaa, bana wungo motu'a, wungo mongura, motaha motu'a ka lena alusu.

⁶ Lemba epo atuu asalakono domeweweuo sinulaako bana wulaa, bana wungo motu'a, wungo mongura, motaha motu'a ka lena alusu anu kinoloro banano.

⁷ Asalakono hinao tutuwi owea anu sinombu a lemba epo atuu ka lemba epo asalakono sinombu i orua tapuno.

⁸ Koloro pontanggo anu kongko a lemba epo atuu asalakono wineweu tepe'asa saru onae ka inso a nsawu anu mengkena: bana wulaa, wungo motu'a, wungo mongura, motaha motu'a ka lena alusu anu kinoloro banano.

⁹ Omue asalakono mo'ala orua paramata kerisopara ka nggorio needo luwuno anano i Isaraeli a mparamata atuu,

¹⁰ onoo inso a needo a mparamata amba-ambano ka onoo mbo'u nee a mparamata ko'orua, montonda potudano hinaado.

¹¹ Mengkena kana puu mponggori paramata monggori sinsi pontondoni, asalakono kau nggorio needo luwuno anano i Isaraeli a orua paramata atuu. Asalakono paramata atuu tanggoakono simpi wulaa.

¹² Ka i'amba omue numaao orua paramata atuu a orua tutuwi oweano lemba epo gagi paramata pepopoto'ori a nto Isaraeli. I Haruni asalakono wawao needo i aro-Do i Ue a orua tutuwi oweano gagi pepopoto'ori.

¹³ Omue asalakono moweweu simpi wulaa,

¹⁴ ka orua rante inso a wulaa isa'a. Weweuo kana koloro anu linisu ka potakoo rante linisu atuu a simpi atuu.

¹⁵ Tutuwi rada po'alaa pompakosi omue asalakono weweuo mengkena kana lemba epo. Omue asalakono weweuo sinula inso a bana wulaa, wungoo motu'a, wungoo mongura, motaha motu'a ka lena alusu anu kinoloro banano.

¹⁶ Tadeno, asalakono ondauno ka maluano mengkena asa otuwe linupi orua.

¹⁷ Omue asalakono umatoraakono paramata opaa dede hadiono: yasapisi motaha, kirisoli ka malakiti a mpodedeno amba-ambano.

¹⁸ A dede ko'orua, watu rea, lasuaradi, yasapisi molowulu.

¹⁹ A dede ko'otolu, ambara, aki ka kecubu.

²⁰ A dede ko'opaa, pirusu, kerisopara ka nepiriti. Kanatuumo luwuno paramata atuu asalakono sinimpiako wulaa a laro mpodedeno.

²¹ Menunu saru needo luwuno anano i Isaraeli, paramata atuu asalakono hopulu ka orua hadiono, sompo paramata, asa nee. Luwuno paramata atuu asalakono ngginori kana sinsi pontondoni, sompo paramata asa nee inso a hopulu ka orua suku atuu.

²² Tiano tutuwi rada atuu, asalakono kau poweweu rante inso a wulaa mpena kana koloro anu linisu.

²³ Asalakono poweweu mbo'u orua mala-mala wulaa tiano tutuwi rada atuu ka orua mala-mala asalakono kau potakoo a orua tompano tutuwi rada.

²⁴ Asalakono kau potakoo orua rante wulaa linisu atuu, a orua mala-mala i tompano tutuwi rada.

²⁵ Orua tapuno susua inso a rante linisu atuu asalakono kau potakoo a orua simpi atuu. Kanandiomo upotakoakono a ntutuwi oweano lemba epo, i arono.

²⁶ Omue asalakono moweweu orua mala-mala wulaa ka potakoakono a orua tompano tutuwi rada atuu, a wiwi larono, anu me'aro a lemba epo.

²⁷ Asalakono kau poweweu mbo'u orua mala-mala wulaa ka omue potakoo a orua tutuwi owea lemba epo, a ntotono i arono umpeda sombuno lemba epo saru koloro onggono i wawono.

²⁸ Ka i'amba tutuwi rada atuu saru mala-malano asalakono inonggoako bana wungo motu'a a mala-mala lemba epo kai tutuwi rada atuu kongko mpiha i wawono koloro po'onggo lemba epo ka si tepahe inso a lemba epo.

²⁹ Kanatuumo i Haruni wawao a radano needo luwuno anano i Isaraeli anu kongko a tutuwi rada po'alaa pomputusi, tempono i pewinsokio po'ianga mempori kai kongko mpiha gagi tondoni pepopoto'ori i aro-Do i Ue.

³⁰ Asalakono naao Urimi ka Tumimi i larono tutuwi rada po'alaa pomputusi, kai kongko oruano a radano i Haruni tempono ipewinso me'aro ndi Ondae i Ue. Asalakono iwawao mpiha i Haruni a radano parewa po'alaa pomputusi atuu a nto Isaraeli, i aro-Do i Ue.

³¹ Omue asalakono moweweu lemba meloe i bungkuno i totono lemba epo, luwuno inso a bana wungo motu'a.

³² I tongano, asalakono hinao bolono pewinsoano ulu, anu wiwino sinula limbu. Bolono atuu kana we'uno lemba sira kasiteberi.

³³ A lupino itotono lemba atuu, asalakono kau poweweu wua delima inso a bana wungo motu'a, wungo mongura ka motaha motu'a, lumimbuo lupiano ka mpe'olo-olo saru nggiri-nggiri wulaa.

³⁴ Gagi hinao asa nggiri-nggiri wula ka asa wua delima, mpe'olo-olo lumimbuo pelupiano lemba i bungkuno atuu.

³⁵ I Haruni asalakono pakeo lemba meloe i bungkuno atuu tempono ipoweweu pesomba, ka unino nggiri-nggiri asalakono teronge tempono ipewinso a mpo'ianga mempori i aro-Do i Ue ka tempono ipeluarako. Tewala kanandio, onae nahi ta mate.

³⁶ Omue asalakono moweweu lempe inso a wulaa mpena ka unggorio i wawono kana monggori sinsi pontondoni, ”Mempori ndi Ondae i Ue.”

³⁷ Omue asalakono onggoakono koloro wungo motu'a lempe atuu a mpeboo ulu. Lempe atuu asalakono mo'ia i arono peboo ulu.

³⁸ Lempe atuu asalakono kongko a ra'ino i Haruni ka onae sumusuruo pokotompaano anu sala a luwuakoano pinesombaakodo to Isaraeli gagi pesombado anu mempori. Lempe atuu asalakono kongko mpiha a ra'ino, ka Dopekono ira i Ue.

³⁹ Omue asalakono mohoru lemba meloe i larono anu mepandiri inso a lena alusu, ka inso a lena alusu mbo'u weweuo peboo ulu ka asalakono kau weweo sulepe mengkena anu sinula.

⁴⁰ Kanatuu koa mbo'u luwuno anano i Haruni asalakono poweweu lemba meloe i larono, sulepe ka peboo ulu ka dontekita luwu mewanta ka maramba.

⁴¹ Luwuno atuu poposangkaakono i Haruni, akamu, saru luwuno anano. Ka u'amba umurapi ira, rumonso ira ka mokomempori ira ka domegagi sando mpesomba ndi Ongkue.

⁴² Poweweuako ira saluara lena anu tutuwio olongkarano. Saluara atuu asalakono inso a lompe hawe a mpa'a.

⁴³ I Haruni saru luwuno anano asalakono mempakeo tempono dompewinsokio Kema Tepotowoa ke i tempono domerangku a pontunua pesomba mpoweweu pesomba a mpo'ianga mempori, kasi domensusuruo gagi sala, ka domemate. Onaemo atuu pompakosi ranta nahina tampulaano ndi Haruni ka inuleno.”