Peluarakoa 27 - Wunta Mempori

Meda pontunua pesomba

¹ ”Omue asalakono moweweu pontunua pesomba inso a ngkeu akasia, olima hiku ondauno ka olima hiku maluano, gagi mensiu opaa mengkena ondauno ka maluano, sine mantandeno otolu hiku.

² Omue asalakono moweweu tandu-tanduno ko'opaano siuno. Tandu-tanduno atuu tepe'asa saru meda pontunua pesomba ka apiiakono mala.

³ Omue poweweu mbo'u ba te'opia kawali ponaapa awuno, sikopa, loea kodei ponsiwuino, sarampano ka polu pontunua halo. Luwuno parewa atuu asalakono weweuo inso a mala.

⁴ A meda pontunua pesomba atuu asalakono poweweu tarali kana mala inena, ka a mala inena atuu asalakono poweweu te'opaa mala-mala inso a mala a opaa tompano.

⁵ Omue asalakono numaao mala inena atuu i larono meda pontunoa pesomba itotono wiwino ngkoloane ranta tia oruano mantandeno meda pontunua pesomba.

⁶ Omue asalakono moweweu keu ponsela tiano meda pontunua pesomba atuu, keu ponsela inso a ngkeu akasia ka apiiakono mala.

⁷ Keu ponsela atuu asalakono wininso a laro mala-mala atuudo ka asalakono kongko i apano meda pontunua pesomba atuu i tempono meda pontunua pesomba atuu tinande.

⁸ Meda pontunua pesomba inso a dopi atuu asalakono weweuo mooa. Kana anu utinisoako ndi omue i wawo ntorukuno atuu, kanandiomo i wineweu pontunua pesomba atuu.”

Kintalano Kema Mempori

⁹ ”Omue asalakono moweweu kintalano Kema Mempori. I selatano kintala atuu asalakono wineweu sawu pelingo po'oloti inso a lena alusu anu kinoloro banano, asa etu hiku ondauno i apano anu asa atuu.

¹⁰ Luwuno karuno rua pulu ka empehino karuno atuu rua pulu koa mbo'u, luwuno asalakono inso a mala. Luwuno kai a ngkaruno atuu ka luwuno ponsombuno inso a nsalaka.

¹¹ Kanatuu koa mbo'u i utarano, a ondauno, asalakono hinao sawu po'oloti, ondauno asa etu hiku, luwuno karuno rua pulu ka empehino karuno atuu rua pulu koa mbo'u, luwuno inso a mala, ka luwuno kai a ngkaruno atuu ka luwuno ponsombuno asalakono inso a salaka.

¹² A maluano, i sumooano oleo kintala atuu, asalakono hinao sawu po'oloti, maluano lima pulu hiku, karuno hopulu ka empehino hopulu.

¹³ Maluano kintala atuu, i arono anu i sabaano oleo lima pulu hiku.

¹⁴ Hopulu ka olima hiku sawu po'oloti tiano i apano anu asa, saru otolu karuno ka otolu empehino,

¹⁵ ka hopulu ka olima hiku sawu po'oloti tiano i apano anu susua, saru otolu karuno ka otolu empehino.

¹⁶ Sine tiano pewowa langkai kintala atuu, opaa karuno ka opaa empehino, sawu po'oloti rua pulu hiku, anu sinula inso a bana wungo motu'a, wungo mongura, motaha motu'a ka inso a lena alusu anu kinoloro banano.

¹⁷ Luwuno karuno anu lumimbuo kintala atuu asalakono pinosombuako luwuno ponsombu inso a nsalaka, luwuno kaino inso mbo'u a nsalaka, sine empehino inso a mala.

¹⁸ Ondauno kintala atuu asalakono asa etu hiku, maluano lima pulu hiku ka mantandeno olima hiku. Sawu po'olotino asalakono inso a lena mopute anu kinoloro banano, ka luwuno empehino inso a mala.

¹⁹ Luwuakoano parewa tiano mperupa-rupa anggaa i Kema Mempori ka luwuno pandorano kintala, luwuno inso a mala.”

Lanano hulu

²⁰ ”Omue asalakono tumena ira to Isaraeli mpowawa ndi omue lana saitu inisa anu nahina salono pakea a hulu kai melanga mpiha hulu.

²¹ I larono Kema Tepotowoa i arono pelingo anu lumingoo burua songka, i Haruni ka luwuno anano patindao hulu atuu mompu'u ngkiniwia ranta hawe mo'oru i aro-Do i Ue. Onaemo atuu pompakosi anu tinonda ranta nahina tampulaano a nto Isaraeli hawe a inuledo.”