Peluarakoa 26 - Wunta Mempori

Kema mempori

¹ ”Kema Mempori atuu asalakono wineweu inso a hopulu sawu tenda. Tenda atuu wineweu inso: a lena alusu, anu kinoloro banano ka bana wungo motu'a, wungo mongura ka bana motaha motu'a. Tenda atuu asalakono sinulati megambara kerubi.

² Ondauno sompo tenda, asalakono rua pulu ka oalu hiku ka maluano sompo sawu tenda opaa hiku. Luwuno tenda atuu asalakono kai pengkena.

³ Olima sawu tenda asalakono sinombu asa ka anu susua, ka anu olima mbo'u pinosombu gagi asa.

⁴ A nsawu anu sinombu amba-ambano, a wiwino sawu tenda anu lalu itompano, asalakono poweweuakono bolo-bolono anu kinoloro inso a nsawu wungo motu'a, ka kanatuu koa mbo'u weweuo a wiwino sawu tenda anu lalu itompano a nsawu sinombu anu ko'orua.

⁵ Asalakono kau poweweu lima pulu bolono tiano sawu tenda anu aasa ka lima pulu mbo'u bolono sawu tenda anu itompano ntu'u a nsawu sinombu ko'orua, onaemo luwuno bolono atuu ntepopo'aro.

⁶ Asalakono poweweu lima pulu kai inso a wulaa ka ipinosombu sawu tenda anu asa saru anu susua mompake luwuno kai atuudo, gagi Kema Mempori atuu tepe'asa.

⁷ Omue asalakono moweweu hopulu ka asa sawu tenda inso a wulu bembe gagi atono kema anu borungio Kema Mempori.

⁸ Ondauno sompo sawu tenda andio tolu pulu hiku ka maluano sompo tenda opaa hiku. Hopulu ka asa tenda andio asalakono mengkena luwu.

⁹ Olima sawu tenda andio asalakono sombuo tesusua, ka onoo sawu tenda sinombu tesusua mbo'u, ka sawu tenda anu ko'onoo asalakono lupio orua, i arono Kema atuu.

¹⁰ I wiwino asa sawu tenda anu lalu i tompano a nsawu sinombu amba-ambano, asalakono poweweu lima pulu bolono anu kinoloro ka lima pulu mbo'u bolono i wiwino asa sawu a nsawu sinombu ko'orua.

¹¹ Omue asalakono moweweu lima pulu kai mala ka iwininso a bolo-bolono hieno ka i'amba tesombu kema atuu gagi asa.

¹² Toreano sawu tendano Kema atuu, tia oruano pino'inee tendoe i bungkuno Kema Mempori.

¹³ Toreano inso a ondauno sawu tenda atuu asa hiku i apano anu asa ka asa hiku i apano anu susua, pino'inee tendoe a orua apano Kema Mempori anu borungio apano anu asa ka apano anu susua.

¹⁴ Omue asalakono moweweu boru i wawono tenda borungino atuu inso a ngkuli bimba lakino anu pinarada motaha ka boru inso a ngkuli alusu i wawono mbo'u.

¹⁵ Omue asalakono poweweu dopi tiano Kema Mempori inso a ngkeu akasia anu pinontade moleo.

¹⁶ Sompo dopi hopulu hiku ondauno ka maluano asa ka entonga hiku.

¹⁷ A sompo dopi asalakono hinao orua paso anu gagi pesombuno saru anu susuano. Kanatuumo uweweuo luwuno dopino Kema Mempori.

¹⁸ Omue asalakono moweweu rua pulu dopi tiano Kema Mempori te'alaako i selata.

¹⁹ Omue asalakono moweweu pato pulu empehino i totono dopi rua pulu atuu inso a nsalaka, orua empehino i totono asa dopi pentoroano orua pasono.

²⁰ Omue asalakono moweweu mbo'u rua pulu dopi tiano apano i utara Kema Mempori,

²¹ ka pato pulu po'empehi inso a nsalaka: orua po'empehi i totono asa dopi ka orua po'empehi i totono sompo dopi petudano.

²² Tiano apano i bungkuno Kema Mempori, i sumooano oleo, asalakono poweweu onoo dopi.

²³ Orua dopi poweweu tiano orua siuno Kema Mempori i bungkuno.

²⁴ Orua dopi atuu pinosombu i totono ka iwawono pinosombu mbo'u a mala-mala anu asa atuu. Kanatuumo uweweu dopi orua atuu a orua siuno.

²⁵ Gagi, oalu dopi ka po'empehi salaka hopulu ka onoo. Orua po'empehi itotono asa dopi ka orua po'empehi i totono sompo dopi petudano.

²⁶ Asalakono poweweu mbo'u keu montowea inso a ngkeu akasia. Olima keu montowea tiano luwuno dopi i apano anu asa Kema Mempori,

²⁷ olima keu montowea tiano luwuno dopi i apano anu susua inso a Ngkema Mempori ka olima mbo'u keu montowea tiano luwuno dopi i bungkuno Kema Mempori, i sumooano oleo.

²⁸ Keu montowea anu i tongano dopi atuudo asalakono montowea inso i tompano hawe i tompano.

²⁹ Dopi atuudo asalakono lnapiiako wulaa, luwuno binansi po'iangano keu montowea atuudo, asalakono weweuo inso a wulaa ka luwuno keu montowea atuu asalakono inapiiako wulaa.

³⁰ Asalakono kanandiomo uwanguo Kema Mempori menunu potudano anu umariomo Kutisoakomu i wawo torukuno atuu.

³¹ Omue asalakono moweweu sawu pelingo inso a bana wungo motu'a, wungo mongura, motaha motu'a ka lena alusu anu kinoloro banano. Sawu pelingo atuu weweuo megambara kerubi.

³² Omue asalakono motakoo opaa karuno inso a ngkeu akasia, anu inapiiako wulaa mompake kai wulaa, i wawono opaa po'empehi salaka.

³³ Omue asalakono ndumoeo sawu pelingo atuu a ngkai ponsombu tenda atuu ka wawao burua songka i ra'ai, ibungkuno sawu pelingo atuu. Sawu pelingo atuu gagiomo sawu pelingomu, i olono po'ianga mempori ka po'ianga tedoa mempori.

³⁴ Omue asalakono numaao ulo pesintuwua i wawono burua songka a mpo'ianga tedoa mempori.

³⁵ Meda atuu asalakono naao i arono sawu pelingo ka karuno hulu atuu asalakono naao i apano selata Kema Mempori tepo'aro saru meda anu ninaa i apano utara.

³⁶ Omue asalakono moweweu mbo'u sawu pelingo a mpewowa Kema atuu, anu sinula inso a bana wungo motu'a, wungo monura, motaha motu'a ka lena alusu anu kinoloro banano.

³⁷ Omue asalakono moweweu olima karuno tiano sawu pelingo atuu inso a ngkeu akasia ka apiiakono wulaa, saru kai wulaa, ka tiano olima karuno atuu asalakono poweweu olima po'empehi inso a mala tinawa.”