Peluarakoa 25 - Wunta Mempori

Pontiso mowangu Kema Mempori Pesomba anu pinesusua

¹ Mepau Iramo i Ue ndi Musa,

² ”Pauako ira to Isaraeli, ka dompopumpu pesomba pinesusua ndi Ongkue. Asalakono impopumpu pesomba pinesusua ndi Ongkue inso anu telelu aroano.

³ Ndiomo pesomba pinesusua anu komiu mepumpuo inso ndi ondae: wulaa, salaka, mala,

⁴ bana wungo motu'a, anu wungo mongura ka motaha ntu'u, lena alusu ka wulu bembe,

⁵ kuli bimba laki anu pinarada motaha, kuli alusu ka keu akasia

⁶ lanano hulu, rampa-rampa weweua lana po'urapi ka weweua dupa anu mo'ahi woono,

⁷ paramata kerisopara ka paramata anu mempinotako a lemba epo ka a ntutuwino rada.

⁸ Asalakono ka dompoweweu po'ianga mempori, ka Kupo'ia i olodo.

⁹ Montonda luwuakoano anu Kutisoakomu gagi pandirino Kema Mempori ka luwuakoano parewano, kanandiomo imeweweuo.”

Burua Songka

¹⁰ ”Asalakono dompoweweu burua pedandia inso a ngkeu akasia, orua ka entonga hiku ondauno, asa ka entonga hiku maluano ka asa ka entonga hiku mantandeno.

¹¹ Asalakono apiiakono wulaa mpena inso i larono ka i bungkuno ka i wawono poweweuakono simpi wulaa lumimbuo.

¹² Asalakono poweweu te'opaa mala-mala wulaa tiano burua pedandia atuu ka potakoo a opaa karuno, orua mala-mala i apano anu asa ka orua mala-mala i apano anu susua.

¹³ Asalakono poweweu keu ponsela inso a ngkeu akasia ka apiiakono wulaa.

¹⁴ Keu ponsela atuu asalakono winsoo a laro mala-mala i apano burua pedandia atuu, hinaomo keu atuu, burua pedandia pinokotande.

¹⁵ Keu ponsela atuu asalakono mo'ia mpiha a laro mala-mala, si binuta.

¹⁶ Songka anu Aku weeakomu, asalakono naao a laro burua pedandia atuu.

¹⁷ Asalakono poweweu mbo'u ulo pesintuwua inso a wulaa isa'a, orua ka entonga hiku ondauno ka maluano asa ka entonga hiku.

¹⁸ Asalakono poweweu orua kerubi inso a wulaa pinalu a orua tapuno ulo pesintuwua.

¹⁹ Weweuomo asa kerubi i tapuno i ndi'ai ka asa kerubi i tapuno raane. Asalakono imeweweuo orua kerubi atuu me'asa saru ulo pesintuwua i wawono orua tapuno.

²⁰ Orua panino kerubi atuu asalakono tewile i wawono, borungio ulo pesintuwua atuu ka rupado tepo'aro. Rupado kerubi orua atuu me'aro a ulo pesintuwua.

²¹ Ulo pesintuwua atuu asalakono naao i wawono burua pedandia ka a laro burua pedandia atuu naao songka anu Aku weeakomu.

²² I ra'aimo Aku tepohaweakomu; inso i wawono ulo pesintuwua atuu i olono orua kerubi iwawono burua songka atuu, Aku mepauakomu mongkona luwuakoano anu Aku tumenaakomu ka domempinauako to Isaraeli.”

Meda ponaapa roti pesomba

²³ ”Asalakono poweweu meda inso a ngkeu akasia, orua hiku ondauno, asa hiku maluano ka asa hiku mantandeno.

²⁴ Asalakono apiiakono wulaa mpena ka poweweu simpi wulaa lumimbuo.

²⁵ Lumimbuo meda atuu asalakono poweweuakono tengino i wiwino asa pelengkae maluano ka simpi wulaa lumimbuo tengino atuu.

²⁶ Asalakono poweweua te'opaa mala-mala wulaa tiano meda atuu ka pasao i opaa siuno a opaa karuno.

²⁷ Mala-ala atuu asalakono tepasa umpeda tengino meda gagi po'iangano keu ponsela ka ipikotande koa meda atuu.

²⁸ Asalakono poweweu keu ponsela inso a ngkeu akasia ka apiiakono wulaa, ka keumo atuu pe'inia ba tatinande meda atuu.

²⁹ Asalakono poweweuakono sempe, sangkirino, takeano ka tonde mekaru, anu pinake a mpesomba tinawa. Luwuno atuu wineweu inso a wulaa isa'a.

³⁰ Asalakono ponaa mpiha roti pesomba i aro-Ku a wawo meda atuu.”

Karuno hulu inso a wulaa

³¹ ”Asalakono poweweu hulu mekaru inso a wulaa mpena anu pinalu. Moiko karuno maupo sampano, lewekino ka palono ka bungano asalakono me'asa saru hulu mekaru atuu.

³² Onoo sampano meluarako inso i apano. Otolu sampano hulu mekaru atuu inso i apano anu asa ka otolu sampano inso i apano anu susua.

³³ Otolu lewekino kana bunga badama a sompo sampano i apano anu asa, saru palono ka bungano, ka otolu lewekino anu mengkena, a sampano anu susua saru palono ka bungano. Kanandiomo weweuo a onoo sampano anu meluarako inso a hulu mekaru.

³⁴ A hulu mekaru atuu asalakono hinao opaa lewekino kana bunga badama saru palono ka bungano.

³⁵ Asalakono hinao mbo'u asa palono mo'asao sampano anu metaro amba-ambano anu meluarako inso a hulu mekaru atuu, asa palono a sampano anu metaro ko'orua ka asa palono a sampano anu metaro ko'otolu. Kanandiomo weweuo onoo sampano anu meluarako inso a hulu mekaru atuu.

³⁶ Palono ka sampano atuu asalakono me'asa saru hulu mekaru atuu ka luwuno atuu wineweu inso a wulaa mpena anu pinalu, inso a asa watu anu mengkena.

³⁷ A hulu mekaru atuu asalakono poweweu opitu hulu ka luwuno hulu atuu asalakono pinasa i wawono hulu mekaru atuu kai wantahio anu i arono.

³⁸ Sipino ka pontineano asalakono wineweu inso a wulaa isa'a.

³⁹ Hulu mekaru atuu saru luwuno parewano asalakono weweuo inso a wulaa mpena asa talenta.

⁴⁰ Ka pekokoongakono, ka uweweuo luwuakoano atuu montonda pandiri anu umariomo Kutisoakomu i wawo ntorukuno atuu.”