Peluarakoa 24 - Wunta Mempori

Pompokorosoa pedandia-Do i Ue ka to Isaraeli

¹ Mepau Iramo i Ue Ala ndi Musa, ”Porakemo pe'aro ndi Ongkue, omue ka i Haruni, i Nadabi ka i Abihu ka pitu pulu mia inso i olono luwudo mia memota'u to Isaraeli ka impenggolontumo mpesomba inso i olaiano.

² Sine butu koa i Musa anu umpeda ndi Ongkue, anu mehano si dome'umpeda, ka tongku atuu nahi moiko domporake saru onae.”

³ Haweomo i Musa pauako ira tongku atuu luwuno pau-Do i Ue ka luwuno atora; luwuno tongku atuu tepo'asa sangkido, ”Luwuno pau anu pinau-Do i Ue kami meweweuo.”

⁴ I Musa burio luwuakoano pau-Do i Ue atuu. Tisomono mo'oru onae mowangu pontunua pesomba a mpuu torukuno atuu, saru hopulu ka orua tugu menunu saru hopulu ka orua tongku Isaraeli.

⁵ Ka i'amba tumena ira mia mongura inso a tongku Isaraeli, ka dompopesombaako pesomba tinunu ka mposumbele ba te'opia sapi laki gagi pesomba tekaduduia ndi Ondae i Ue

⁶ Umarino atuu i Musa mo'ala asa ntia inso a rea atuu itawao a laro ba te'opia bolusa, asa ntia mbo'u itawisiakono pontunua pesomba atuu.

⁷ I'alao Wunta Pedandia atuu, ibasaako ira meroku i arodo tongku atuu ka dompotae, ”Luwuakoano pau-Do i Ue kami meweweuo ka mentondao.”

⁸ Ka i'amba i Musa umalao rea atuu, ka itawisiako ira bawaa ka ipotae, ”Ndiomo rea pedandia anu pinokoroso-Do i Ue saru omiu, me'empehiako luwuno songka-Do.”

⁹ Mporake iramo i Musa ka i Haruni, i Nadabi ka i Abihu saru pitu pulu mia inso i olono luwuno mia memota'u to Isaraeli.

¹⁰ Domengkita Ira Ue Alado to Isaraeli pelandaano karu-Do kana horo anu wineweu inso a watu sapiri ka mewantano kana langi anu nahi menseru.

¹¹ Sine nahi Dopotiio kae-Do humuku ira petewawado to Isaraeli. Tendeano dopoposoo Ira Ue Ala, ka dompongkaa ka mpo'inu.

I Musa i torukuno Sinai

¹² Mepau Ira i Ue ndi Musa, ”Porakemo pe'aro ndi Ongkue a wawo ntorukuno ka pesikorimo i ra'ai. Aku moweeakomu lempe watu anu me'ihiako songka ka petena, anu Kuburiomo ka domempinaguruako.”

¹³ Meronga saru i Yosua, pinerorohino, mentadeomo i Musa ka doporake a ntorukuno-Do Ue Ala atuu.

¹⁴ Sine a mia memota'u atuu ipotaeako ira, ”Imensikori kamimo i ndi'ai, ranta ka kipekule ndi omiu. Kombake i Haruni ka i Huri kongko ira ndi omiu? Isema hinao kara-karano, imelako ndi ondae.”

¹⁵ Tempono iporake i Musa a ntorukuno, seru tumutuwio torukuno atuu.

¹⁶ Maramba-Do i Ue mo'ia i wawo ntorukuno Sinai, ka seru tumutuwio torukuno atuu i larono onoo oleo. I oleo ko'opitu, Dopoboio i Musa inso a laro nseru atuu.

¹⁷ I arodo to Isaraeli, maramba-Do i Ue i punsuno torukuno tengkita kana api sumongkoo.

¹⁸ I Musa mewinso a laro nseru ka ipotilalo morake a ntorukuno atuu. Onae mo'ia a ntorukuno atuu pato pulu oleo ka pato pulu wongi.