Peluarakoa 23 - Wunta Mempori

Atora mongkona tiano mia ka oleo Saba

¹ ”Si pompalele lele anu nahi mentee; si tulungio mia anu sala gagi sakosii anu molengku.

² Omue si tonda-tonda ira mia hadio mpoweweu mosa'o, ka tewala gagi sakosii mongkona asa kara-kara, si tonda-tonda ira mia hadio mpopelengkuako songka.

³ Maupo a mia mongkokolaro, si po'alaako a laro kara-karano.

⁴ Tewala mohaweko sapino iwalimu ke kalideno anu tetadi, pompari-pari pokuleo pinotuwu atuu ndi onae.

⁵ Tewala ukitao kalideno mia mosa'oakomu tebangku idunsio patekeno, si nanta-nanta tulungio. Meronga saru onae potiio patekeno.

⁶ Si melinggeio tiado mia mongkokolaro i olomiu a laro kara-karano.

⁷ Olaiakono koroimu inso a mpegaupia. Mia anu nahina salano ka mia anu mentee si pepateo, nde mia anu moweweu mosa'o kanatuu, nahi Aku mo'ineeo.

⁸ Si pontarima pompowee nahi moleo, hangano pompowee nahi moleo mompokomorawu ka maupo molino pongkitano, iposuleo kara-karano mia anu mentee.

⁹ Si pokonsii ira mia mehawe, i mento'oriomo aroano mia hawe, nde maupo omiu ndi'ipua mia koa mbo'u mehawe i wita Masiri.

¹⁰ I larono onoo nta'u moiko uporawo inii a witamu ka sumowio wuano,

¹¹ sine ko'opitu nta'uno asalakono komo'ineeo ka bintao, mia mongkokolaro i olodo tongkumiu ka dompohawe koa kaanga. Hapa anu binintado po'ineeomo domengkaano kondehora a ntobu. Kanatuu koa mbo'u weweuo a lere anggoromu ka lere saitumu.

¹² I larono onoo oleo moiko upo'anggao anggaamu, sine oleo ko'opitu asalakono kau penaa-naa, ka dompenaa-naa sapi ka kalidemu ka anado atamu beine ka mia mehawe mpenaa-naa luwu.

¹³ Asalakono impekokoongakono luwuakoano anu pinau-Ku ndi omiu. Si mpopoboi neeno lahumoa, siimo iteronge nee atuu inso a wiwimu.”

Atora mongkona pesombaa ka oleo langkai

¹⁴ ”Pentolu i larono asa nta'u impoweweu popelangkai ndi Ongkue.

¹⁵ Oleo Langkai Roti Nahi Peragi asalakono impelangkaio. Kana anu umariomo Kutenaa komiu, i larono opitu oleo omiu asalakono impokaa roti nahi peragi ia tempo anu pinakosi a wula Abi, hangano a wula atuumo omiu mpeluarako inso i wita Masiri. Sine, mia anu mesomba ndi Ongkue, si aiwa moa ngkae.

¹⁶ Impelangkaio mbo'u rame-rame umari sumowi, wua amba-ambano inso a mpo'anggamu morawo inii i lere, ka rame-rame pompumpua wua pinopaho, i tempono upopumpu wua pinopaho a mpo'anggamu i lere ia pokotampulaano ta'u.

¹⁷ Pentolu i larono asa nta'u luwuno tama i olomiu asalakono aiwa mpesomba ndi Ondae Ue Ala.

¹⁸ Si pompesombaako rea mpesomba sinumbele ndi Ongkue saru hapamokoa anu meragi, ka tabano pesomba i oleo langkai-Ku, si torea hawe mo'oru.

¹⁹ Anu moiko ntu'u inso a wua amba-ambano witamu asalakono wawao a raha mpesombaa ndi Ondae i Ue, Ue Alamu. Si menahuo bauno ana bembe a uwoi uono ineno.”

Mesomba a lahumoa gagi masolaa

²⁰ ”Aku montena mala'eka melempa i aromiu, kumongkomi komiu a nsala ka wawakomiu a mpo'ianga anu Kupatindaomo.

²¹ Impepenteeo, imerongeo pinauno. Si me'ewaio, nde nahi ta umoninio halamiu, hangano nee-Ku kongko ndi onae.

²² Sine tewala mentee ntu'u imerongeo pinauno, ka imeweweuo luwuno anu pinau-Ku, Aku me'iwaliako ira iwalimiu, ka umewai ira anu umewai komiu.

²³ Hangano mala'eka-Ku ta melempa i aromiu ka wawa komiu a witado to Amori, to Heti, to Perisi, to Kana'a, to Hewi ka to Yebusi, ka Aku mokotampula ira.

²⁴ Si mpenggolontu mpelangkaio pinesombai susua ke mpesomba ndi onae, ka si mentondao wineweudo luwuno tongku atuu, sine imempokotampulao lahumoado, ka imerawo-rawoo luwuno tugu pelahumoaado.

²⁵ Sine omiu asalakono mpesomba ndi Ondae i Ue, Ue Alamiu, asalakono Ondae i Ue Ira rumonsoo kaangamiu ka inuamiu. Aku moko'olaio haki inso ndi omiu.

²⁶ I witamiu nahi ta hina beine anu te'onini ke nahi po'ule. Aku mokomelaio tinuwumiu.

²⁷ Doitoa ndi Ongkue Aku tumenao mese'elungi komiu. Aku sumiarawo ira luwuno tongku anu hinawemiu, ka Aku weweu ira luwuno iwalimiu mpewolili mempolai inso ndi omiu.

²⁸ Aku mompotola mbo'u hoani anu masii mese'elungi komiu, ka dosaari ira to Hewi, to Kana'a ka to Heti atuu inso i aromiu.

²⁹ Sine nahi Aku sumaari ira luwu ilarono asa nta'u, kasi tepo'ia wita atuu, ka kondehora nahi tetiangi hadio sumosanggoli komiu.

³⁰ Aku sumaari ira ntededei inso ndi omiu, ranta ka impe'ana ue, ka impokompetorokio wita atuu.

³¹ Aku patotoo tida wita miu inso a ntahi Teberau hawe a ntahi Pelisiti ka inso i pada one hawe i koro Eparata, nde Aku meweengako ira palili i wita atuu a ngkaemiu, ka imensaari ira inso ndi omiu.

³² Si mpoweweu pedandia saru ondae ke maupo saru lahumoado.

³³ Ondae nahi ira mpo'ia mpiha i wita miu, kasi dompokontehala komiu ndi Ongkue, hangano mpesomba a lahumoado, nde anu kanarau gagi winggaro ndi omiu.”