Peluarakoa 22 - Wunta Mempori

Songka mongkona pe'inia arataano pe'asa mia

¹ ”Tewala asa mia monako sapi ke bimba ka isumbeleo ke i'asao, asalakono i'euo, olima sapi euno asa sapi, ka opaa bimba euno asa bimba.

² Tewala asa mia monako hinawe kontongaano morongka, ka domentunduhio mia ranta kai mate, mia atuu nahi pepasua rea;

³ Sine tewala pompepatea atuu tegagi tempono sabaomo oleo, mia atuu mepasua rea. Mia monako asalakono umomowahio luwuno. Tewala nahi poko'owahio, onae asalakono inasa euno pinonakono.

⁴ Tewala anu pinonakono atuu sapi, kalide ke bimba, da hinawe ndi onae ka da tuwu, asalakono i'euo meluka orua.

⁵ Tewala asa mia mompakambi pinotuwu i lere ke i lere anggoro ka pinotuwu atuu ipotolao ka dompoitu-itu, ranta pinopaho a leredo mia susua pingko domengkaano, asalakono onae mompowee wua mpinopahono anu moiko ntu'u inso a lereno onaeno ke wua anu moiko ntu'u inso a lere anggorono gagi po'euno.

⁶ Tewala hinao api melanga ka ipesaki a laro rui, kai mo'ai gandu hinowu ke gandu anu napi sinowi, saru lereno, mia anu momposaki api atuu asalakono umeuo luwuno.

⁷ Tewala asa mia mompepenaa doi ke sangka a walino, kai pinonako i rahano walino atuu, mia monako mo'owahi euno meluka orua, tewala hinawe.

⁸ Tewala mia monako atuu nahi hinawe, umbu raha atuu asalakono lumako me'aro ndi Ondae Ue Ala ka mokomengkaao nine nahi leluo kaeno umalao arataano walino.

⁹ Sompo ilarono teposisalaa, moiko mongkona sapi, kalide, bimba, sangka, ke sangka hapamokoa anu tetadi, tewala asa mia motae, ”Ndio anuku!”, kara-karado mia orua ira atuu asalakono winawa i aro-Do Ue Ala. Isema anu pinokonsala-Do Ue Ala, asalakono mo'owahi euno meluka orua a mpe'asa miano.

¹⁰ Tewala asa mia mompepenaa kalide a walino ke sapi ke bimba ke pinotuwu hapamo koa ka pinotuwu atuu mate, ke binelai ke hinao wawao nahina mia kumitao,

¹¹ I olodo mia orua ira atuu asalakono inala sumpa i aro-Do i Ue nine nahi komba onae umalao pinotuwuno walino. Anu me'umbuo pinotuwu atuu asalakono tumarimao sumpa atuu, ka siimo ihina po'owahi euno.

¹² Sine tewala mentee ntu'u pinotuwu atuu ipo'ineeo ka ipinonako, asalakono onae mo'owahi euno ia mia anu me'umbuo.

¹³ Tewala pinotuwu atuu mentee ntu'u iperangkamio kondehora lambaha, asalakono iwawao mopokitao. Siimo ipo'owahi euno.

¹⁴ Tewala asa mia monsabo asa pinotuwuno inso a walino, ka pinotuwu atuu binelai ke mate, tempo atuu nahi kongko ueno i tu'ai, asalakono i'euo luwuno.

¹⁵ Sine tewala anu me'umbuo kongko i tu'ai, siimo i'owahio euno. Tewala pinotuwu atuu sinewa, owahino euno tewinsoomo a nsewano.

¹⁶ Tewala asa mia mompopandei asa da ana beine anu napi pesambora, ka ipe'asa mpoturiakono, asalakono ikombiao ka ipo'owahi kowei.

¹⁷ Tewala amano beine atuu mentee ntu'u nahi behe meweengakono anano ndi onae, asalakono kongko i'owahiakono doi menunu langkaino kowei da ana beine.”

Atora mongkona hala anu mokoburu

¹⁸ ”Asa mia beine pande sihiri si po'ineeo tuwu.

¹⁹ Maupo isema anu mewowaliako pinotuwu, manasa onae ta hinuku mate.

²⁰ Isema anu mompesombaako pesomba a pinseombai susua sangkadio ndi Ondae i Ue, asalakono pinokotampula.”

Atora mongkona mia anu nahi pompoli

²¹ ”Mia hawe si pokonsiio ke komiu me'akalao, hangano maupo i ndi'ipua mia komiu mehawe i wita Masiri.

²² Asa mia tuwua beine ke nana'ote nahina amano, si pokonsiio.

²³ Tewala mansa impokonsii ira, ka mepetulungi ira ndi Ongkue, manasa Aku rumongeo pepetulungido.

²⁴ Tekuda-Ku ta tensila ka Aku mepateakomiu ponai, gagi beinemiu ira megagi tuwua beine ka luwudo anamiu gagi nahina amado.

²⁵ Tewala omue mompesaboako doi a asa mia inso a bawaa-Ku, mia mongkokolaro i olomiu, si poweweu kana mia mpopebungaako doi ndi onae, si mpo'ema bungano ndi onae.

²⁶ Tewala mansako mo'ala lemba meloeno pe'asa miamu gagi pe'inia, asalakono pokuleo ndi onae napi sumoo oleo,

²⁷ hangano butu koa onae hawuno, sangka anu metako a ngkoroino. Hapa mbo'u pakeano moturi? Tewala mepetulungi ndi Ongkue, Aku rumongeo hangano Ongkue andio puu pompehohawa.”

Mperupa-rupa pepopoto'ori mongkona memporia

²⁸ ”Si totonaa Ira Ue Ala kasi tutundali ira petewawa tongkumiu.

²⁹ Si tekolupe mompesombaako wua gandumu ka uwoi anggoromu. Anamu tama anu amba-ambano asalakono pesombaakono ndi Ongkue.

³⁰ Kanatuu koa mbo'u weweuo a mpinotuwu: sapi ka asa bawaa bembe bimbamu. Opitu oleo tehineno anano amba-ambano moiko ipo'ia a ineno, sine a oleo ko'oalu asalakono pesombaakonomo ndi Ongkue.

³¹ Omiu megagi mia pinokomempori ndi Ongkue. Si mpokaa bauno pinotuwu pinerangkamino kondehora lambaha a ntonga mpada, sine imentendeako ira dahu.”