Peluarakoa 21 - Wunta Mempori

Atora mongkona tiado ata to Ibarani

¹ ”Ndiomo luwuno atora anu asalakono kopauako ira.

² Tewala omue mo'oli asa mia atado to Ibarani, asalakono ka ipo'angga ndi omue onoo nta'u tehineno, sine a nta'u ko'opitu moikoomo ipeluarako gagi mia maradeka, ka nahi po'owahi hapa-hapa.

³ Tewala onae hawe asa-asano, ipeluarako asa-asano koa mbo'u. Tewala hinao kombiano, po'ineeomo ipeluarako saru onae.

⁴ Tewala anu me'atao moweeakono kombiano, ka beine atuu me'anako ana ntama ke beine, beine atuu saru anano ipe'ue ira mpiha anu me'atao, ka ata tama atuu asalakono meluarako asa-asano.

⁵ Sine tewala ata atuu motae: ’Kupehohawa komiu anu me'ata aku, beineku ka luwuno anaku, nahi kubehe meluarako gagi mia maradeka,’

⁶ asalakono mia me'atao wawao ndi Ondae Ue Ala, kai wawao a mpewowa ke a ngkaruno pewowa, ka anu me'atao atuu dumuhuakono a lewe birino, ka ata atuu asalakono mo'angga ndi onae asa ntinuwuno.

⁷ Tewala asa mia mo'asa anano beine gagi ata, beine atuu si peluarako kana peluarakono ata tama.

⁸ Tewala beine atuu ibinikio gagi kombia pinekaria, nami behe mbo'u anu me'atao, asalakono anu me'atao umeheakono itinolosi. Anu me'atao nahina pabawano ta umasao a tongku susua, hangano ilinggeio dandino a beine atuu.

⁹ Tewala anu me'atao tumantuio beine atuu tiano anano anu tama, asalakono anu me'atao weweuo kana ana beine.

¹⁰ Tewala anu me'atao mo'ala mbo'u asa beine, gagi samburueno, si kurangio kaanga tiano, sangka ka ipewowaliakono beine amba-ambano.

¹¹ Tewala anu me'ueo nahi weweuo anu otolu rupa atuu ndi onae, beine atuu moiko ipeluarako, nahi po'owahiako doi maupo tedei.”

Atora mongkona pe'inia tinuwuno pe'asa mia

¹² ”Isema anu montunduhi mia ranta mate, manasa onae hinuku mate.

¹³ Sine tewala pompepatea atuu nahi tinanga, tendeano Dopo'ineeo Ue Ala kaeno kai weweuo, Aku montisoakomu asa po'ianga ta polaiano.

¹⁴ Tewala asa mia tensila aroano tekuda a mpe'asa miano, ranta kai pepateakono tinoo mosa'o, omue asalakono umalao mia atuu maupo inso a pontunua pesomba-Ku, kai hinuku mate.

¹⁵ Isema anu montunduhi amano ke ineno, manasa onae hinuku mate.

¹⁶ Isema anu mompolaisako pe'asa miano, ke i'asaomo, ke hinawe da kongko ndi onae, manasa onae hinuku mate.

¹⁷ Isema anu montutundali amano ke ineno, manasa onae hinuku mate.

¹⁸ Tewala mia me'u'ua ka anu asa montunduhiako watu pe'asa miano ke tidu, maupo nahi mate, pe'asa miano mompemahaki ka ipepombole a mpoturia,

¹⁹ tewala da mokompewangu mbo'u ka mokompelempa-lempa metuko a maluaano, mia anu montunduhi atuu nahi gagi hinuku. Butu onae asalakono kai owahio mia anu pinokomasolano tempono nahi po'angga, ranta kai tompa.

²⁰ Tewala asa mia montunduhiako tuko atano tama ke beine, ranta kai mate a ngkaeno, manasaomo pinombaloako ata atuu.

²¹ Sine tewala ata atuu da tuwu asa ke orua oleo, siimo ipinombaloako, nde ata atuu lano anudo.

²² Tewala mia mpe'u'ua ka ihina asa mia mentia anu kona ntunduhi ka ite'onini sine nahina mobelano, mia atuu manasa ta dinenda menunu po'emano tamano beine atuu. Asalakono i'owahio montonda pomputusido puu mpobitara.

²³ Sine tewala beine atuu mohawe mobela anu susua, omue asalakono motuntu penaa ineuako penaa,

²⁴ mata ineuako mata, ngisi ineuako ngisi, kae ineuako kae, karu ineuako karu,

²⁵ moloba ineuako moloba, mobela ineuako mobela, kamba ineuako kamba.

²⁶ Tewala asa mia montunduhi matano atano tama ke beine ka imasola, mia atuu asalakono motolao atano gagi mia maradeka, euno matano.

²⁷ Tewala irontahio ngisino atano tama ke ngisino atano beine, onae asalakono motolao ata atuu gagi mia maradeka, euno ngisino.

²⁸ Tewala asa sapi lakino morumpai mia, tama ke beine ranta kai mate, sapi atuu asalakono winunoako watu ranta kai mate ka bauno si kinaa, sine ueno sapi atuu nahi gagi hinuku.

²⁹ Sine tewala sapi atuu mararuomo iperumpai, ka ueno umariomo pinopoto'oriako, sine nahi behe umukoo, tewala sapi atuu morumpai tama ke beine ranta kai mate, sapi atuu asalakono winunoako watu ranta kai mate ka ueno asalakono hinuku mate.

³⁰ Sine tewala doi pontolosi pinopotembiako anu me'umbuo sapi, asalakono i'owahio luwu anu i pinopotembiako ndi onae gagi tolosino penaano.

³¹ Tewala anu rinumpaino asa ana ntama ke beine, anu me'umbuo asalakono hinuku montonda atora anu mengkena.

³² Sine tewala sapi atuu morumpai asa ata tama ke beine, anu me'umbuo asalakono mo'owahi tolu pulu sikala salaka a anu me'atao ata atuu, ka sapi atuu asalakono winunoako watu ranta kai mate.

³³ Tewala asa mia mo'ungkahi tutuwino sumuru, ke mongkeke sumuru, ka nahi tutuwio, kai hina sapi ke kalide tedonta ilarono,

³⁴ anu me'umbuo sumuru atuu asalakono ta umowahio euno ka ipoweakono doi a mia anu me'umbuo pinotuwu, sine pinotuwu anu mate atuu gagi tiano.

³⁵ Tewala sapino asa mia morumpai sapino mia susua ranta kai mate, sapi anu tuwu atuu asalakono inasa, doino pinetia ka pinotuwu anu mate atuu pinetia mbo'u.

³⁶ Sine tewala sapi atuu teto'ori mararuomo iporumpai, sine anu me'umbuo nahi behe umukoo, asalakono anu me'umbuo umeuo luwu, sapi ineuako sapi, sine sapi anu mate atuu gagi tiano.”