Peluarakoa 20 - Wunta Mempori

Hopulu Songka

¹ Umarino atuu, Ondae Ue Ala mepau,

² ”Ongkuemo Ue, Ue Alamu, anu wawakomiu mpeluarako inso i wita Masiri, inso a ntepe'ataa.

³ Si hina ndi omiu ue ala anu susua i aro-Ku.

⁴ Si mpoweweu lahumoa anu mengkena hapamo koa anu i langi i wawono, ke anu i tolino i totono, ke anu mpo'ia a laro uwoi itotono tolino.

⁵ Si mpelangkaio ke mpesomba ndi onae nde Ongkue Ue, Ue Alamu, onaemo Ue Ala anu mosiri, anu mombaloakono halano amano a anano, hawe a inuleno anu ko'otolu ka ko'opaa inso a luwuno mia anu umewai Aku.

⁶ Sine Aku mopokitao pompehohawa-Ku a nsowu-sowuno mia, ndi ondae anu mpehohawa Aku ka anu mpe'ini a luwuno songka-Ku.

⁷ Si mempauo nee-Do i Ue, Ue Alamu, mondeenomo koa, nde Ondae i Ue mokonsalao mia anu pauo nee-Do mondeenomokoa.

⁸ Impewowoloo ka impokomemporio oleo Saba.

⁹ Onoo oleo tempomiu mpo'angga ka umanggao luwuakoano anggaamu.

¹⁰ Sine oleo ko'opitu onaemo oleo Saba-Do i Ue, Ue Alamu. Si mpo'angga hapamo koa anggaamu, moiko omiuke anamu tama, ke anamu beine ke atamu tama, ke atamu beine, ke pinotuwumu, ke mia mehawe a laro kotamu.

¹¹ Nde onoo oleo Ondae i Ue mokogagio langi ka wawontolino, tahi ka luwuno ihino, ka menaa-naa Ira a oleo ko'opitu. Onaemo pu'uno Ondae i Ue rumonsoo oleo Saba ka mokomemporio.

¹² Pelangkai ira amamu ka inemu, kai melai tinuwumu a wita anu Doweeakomu i Ue, Ue Alamu ndi omue.

¹³ Si pompepate.

¹⁴ Si ponsosabo.

¹⁵ Si ponako.

¹⁶ Si gagi sakosii megaupi a mpe'asa miamu.

¹⁷ Si mosisiriakono rahano pe'asa miamu, si mosisiriakono kombiano, atano tama, ke beine, sapino ke kalideno, ke hapamokoa anu hinao a mpe'asa miamu.”

To Isaraeli medoito a pepopokita-Do i Ue

¹⁸ Luwuno tongku atuu mensakosiio rundu bote, koliki pesosangki, tawuwua me'uni ka torukuno me'ahu. Medoito iramo tongku atuu mpondidi-ndidi ka mpentade ola-olai.

¹⁹ Dompotaeakono i Musa, ”Omuemo koa mepau ndi omami kami mperorongeakono. Siimo Ondae i Ue Ala anu mepau ndi omami, kasi kimemate.”

²⁰ Sine ipotaeako ira i Musa tongku atuu, ”Si medoito, nde hawe-Do Ue Ala aiwa umarahako komiu ka dumoitoako Ira kongko mpiha a laro matamu ka simpoweweu hala.”

²¹ Tongku atuu mpetade ola-olai, sine i Musa lumako umpeda a nseru mo'ito po'ianga-Do Ue Ala.

Atora mongkona lahumoa ka pontunua pesomba

²² Mepau Iramo i Ue ndi Musa, ”Kanandiomo pauako ira to Isaraeli: Imensakosiiomo, nine Ongkue mepau ndi omiu inso i langi.

²³ Si mpoweweu lahumoa pesombaamiu mpongkenao saru Ongkue; inso a nsalaka ke inso a wulaa, si mpoweweu.

²⁴ Asalakono impoweweu pontunua mpesomba ndi Ongkue inso a wita ka impesombaakonomo i wawono, pesombamiu anu tinunu ka pesomba tekaduduiamiu, bembe bimba ka sapi. Sompo po'ianga anu Kutisoakomu, gagi po'ianga impelangkaio nee-Ku, Aku hawe ndi omiu rumonso komiu.

²⁵ Sine tewala mpoweweu komiu pontunua pesomba ndi Ongkue inso a watu, si mpowangu inso a watu anu pina'o, nde tewala ime'anggaakono pa'o, pontunua pesomba atuu nahi mempori.

²⁶ Kasi pewuatako a ensa, lumako i wawono pontunua pesomba ndi Ongkue, kasi tekita anu i olo ngkaramu.”