Peluarakoa 2 - Wunta Mempori

I Musa pine'anaako ka kinadudui

¹ Asa mia tama te'inso a inuleno i Lewi mongkombia asa beine to Lewi;

² ka i'amba beine atuu mentia ka ipe'anaakono asa ana ntama. Mansano kumitao motae nana'ote atuu tekosi, iwunio otolu wula tehineno.

³ Sine nahi pokowunio tehine mbo'u, onaemo ka i'alao burua tole, iwaluakono panti saru pulu beta'i, ipokoturio nana'ote atuu ilarono ka inaao burua atuu i olono ewo teberau i wiwino koro Nili.

⁴ Akano anu beine mentade ola-olai ta kumitao, hapa anu ta gagi ndi onae.

⁵ Haweomo beine anano i Pirao ta medolo i koro Nili, puu mpopekakaakono melempa-lempa i wiwi ngkoro Nili. Ikitao burua i'olono ewo teberau atuu, ka itenao atano beine umalao.

⁶ Mansano umungkahio, ikitaomo nana'ote tama anu kontongaano mengese. Ipehohawao nana'ote atuu ka ipotae, ”Manasa andio anado to Ibarani.”

⁷ Mesikenoomo akano nana'ote atuu a beine anano i Pirao, ”Tewala ipemoikoo, aku lumako mompoboiakomiu asa beine to Ibarani mompo'uoakomiu nana'ote andio.”

⁸ Sumangki beine anano i Pirao ndi onae, ”Lakomo.” Ka i'amba lumako ana beine atuu moboio ineno nana'ote atuu.

⁹ Motaeomo anano i Pirao, ”Wawaomo nana'ote andio ka upo'uoakune, ka aku moweeko tambomu.” Ka i'amba beine atuu umalao nana'ote atuu ka ipo'uoo.

¹⁰ Mansano nana'ote atuu langkaiomo, iwawaomo a beine anano i Pirao, anu tumandeo gagi anano, ka ineeakono i Musa, nde ipotae, ”Hangano ongkue wuatakono inso a uwoi.”

I Musa molai lumako wita Midia

¹¹ Tempo atuu, mangalitauomo i Musa, onae meluarako tepohaweako ira pepaekompono ta kumitao domedinadai mpo'angga. Ka ikitao asa to Masiri tumunduhio asa to Ibarani, asa mia te'inso ia pepaekompono atuu.

¹² Onae mengkikita ngkoraane ngkoramai, mansano kumitao nahina mia, ipepateo to Masiri atuu, ka iwunio wata ngkoroino a laro one.

¹³ Mansano tisomono meluarako mbo'u, ihaweo orua ira to Ibarani kontongaado me'u'ua. Isikenoo anu moweweu sala atuu, ”Tembio ka utunduhio walimu?”

¹⁴ Sine sumangki, ”Isema anu tumandeko gagi petewawa ka puu mpobitara ndi omami? Hapake tinoomu, komepate aku kana pompepatemu to Masiri atuu?” I Musa gagi doito, nde ipewowoloo, ”Asalakono anu gagi atuu teto'oriomo.”

¹⁵ Mansano rumongeo i Pirao mongkona anu gagi atuu, mo'ungkeomo akala ta mepateo i Musa. Sine i Musa molai inso ndi Pirao ka ihawe i wita Midia, ka ipentoro-toro a wiwi nsumuru.

¹⁶ Sando mpesomba i Midia atuu hinao opitu ira anano beine. Me'aiwa ira mpontambu uwoi umihiio dula pinotuwu ta mopo'inu ira asa bawaa bembe bimbano amado.

¹⁷ Mehawe ira puu mpompakambi sumaari ira, sine i Musa mentade tumulungi ira ka mompopo'inu asa bawaa bembe bimbado.

¹⁸ Mansado mehawe ndi Rehueli, amado, mesikenoomo, ”Tembio oleo andio kai ronga mpekule?”

¹⁹ Mesangki ira, ”Asa to Masiri tumulungi kami inso a ponsosanggolido puu mpompakambi, ka onae montambuakami uwoi, hadio ntu'u tia mami ka mompo'inu ira asa bawaa bembe bimba.”

²⁰ Ipotaeako ira anano, ”Isuaomo? Tembio ka i mebintao mia atuu? Poboiomo ka ipongkaa.”

²¹ I Musa inehekoa mo'ia i raha atuu, ka i'amba i Rehueli, mopokombiaakono i Musa, i Sipora, anano.

²² Beine atuu me'anaako asa ana ntama, ka i'amba i Musa numeeakono nana'ote atuu i Geresoo, nde ipotae, ”Gagi akumo mia hawe i wita susua.”

I Musa Dotenao i Ue

²³ Tehine umari atuu mateomo mokole i wita Masiri. Sine to Isaraeli mpe'anaiki ira hangano pompe'ata. Mpeboo-booli ira, hangano pompe'ata atuu ka peboolido mpepetulungi, hawe ndi Ondae Ue Ala.

²⁴ Ondae Ue Ala rumongeo peboolido, onaemo ka Dorambeo pedandia-Do saru i Burahima, i Saki ka i Yako.

²⁵ Ondae Ue Ala mensiroi ira to Isaraeli atuu, ka Doperio ira.