Peluarakoa 19 - Wunta Mempori

Ondae i Ue mepopokita i torukuno Sinai

¹ Oleo amba-ambano wula ko'otolu umarido mpeluarako to Isaraeli inso i wita Masiri, mehawe ira i pada one Sinai.

² Mansado mpelungka inso i Rapidi, mehawe iramo i pada one Sinai, ka dompekema i pada one atuu. I ra'ai dompekema to Isaraeli i arono torukuno atuu.

³ Ka i'amba i Musa mewuatako me'aro ndi Ondae Ue Ala, ka Ondae i Ue mebooli ndi onae inso i torukuno atuu, ”Kanandiomo pauako ira inuleno i Yako ka pauako ira to Isaraeli:

⁴ Omiu isa'a mengkitao anu wineweu-Ku a nto Masiri, ka ba kana'umpe Kutande komiu a wawo mpanino kongka wawa komiu ndi Ongkue.

⁵ Gagi kanandio-andio, tewala mentee ntu'u komiu mpoperorongeako pau-Ku ka mpe'ini a mpedandia-Ku, komiu megagi tongku pinehohawa-Ku inso i olodo luwuno tongku, nde asa wawontolino andio Ongkue me'ueo.

⁶ Komiu tewinso gagi sando mpesomba ka tongku anu mempori ndi Ongkue. Onaemo andio luwuno pau anu kopauako ira to Iaraeli.”

⁷ Umarino atuu haweomo i Musa ka ipoboi ira luwuno mia memota'u to Isaraeli ka ipauako ira i arodo luwuno pau mpetena-Do i Ue ndi onae.

⁸ Luwuno tongku atuu mesangki mperonga-ronga, ”Luwuno anu pinau-Do i Ue kami meweweuo.” Ka i'amba i Musa mohaweo sangkido tongku atuu ndi Ondae i Ue.

⁹ Mepau Iramo i Ue ndi Musa, ”Onaemo pu'uno, Aku aiwa ndi omue a laro nseru anu mokapa, ka domerongeo tongku atuu ba Kupepau ndi omue, ka inso i ra'ai iramo mpe'ala-alako mpiha.” Tempono i Musa pauako Ira i Ue paudo tongku atuu,

¹⁰ Mepau Ira i Ue ndi Musa, ”Lakomo tepohaweako ira tongku atuu; pokomempori iramo oleo andio ka tisomo; asalakono domelomboo sangkado.

¹¹ Rangkuomo oleo ko'otolu impepatindamo, nde oleo ko'otolu Aku metii i arodo luwuno tongku andio i torukuno Sinai.

¹² Onaemo pu'uno asalakono poweweuako ira tida lumimbu ira tongku atuu ka pauako ira: Imetangkoroo koroimiu si mporake a ntorukuno atuu ke dumanggio tida, nde ba isemamokoa anu dumanggio torukuno atuu, asalakono onae hinuku mate.

¹³ Maupo kaeno isema simedanggio mia atuu, manasa winunoako watu ke pinana; ke pinotuwu maupo mia, nahi ta pino'inee tuwu. Tewala tawuwua unino melai, moikoomo domporake i torukuno atuu.”

¹⁴ Metiiomo i Musa inso i torukuno tepohaweako ira tongku atuu. Ipokomempori ira tongku atuu ka dompolombo sangkado.

¹⁵ Ipotaeako ira i Musa tongku atuu, ”Impepatindamo rangkuomo oleo anu ko'otolu, kasi mpewowaliako beine.”

¹⁶ Umarino atuu gagiomo a oleo ko'otolu mo'oru, rundu, koliki ka seru mokapa i wawo ntorukuno saru unino tawuwua anu tedoa meroku, onaemo ka dompondidi-ndidi, luwuno mia anu kongko a mpekemaa.

¹⁷ I Musa wawa ira tongku atuu mpeluarako inso a mpekemaa tepohaweako Ira Ue Ala ka dompentade a puu torukuno.

¹⁸ Asa torukuno Sinai me'ahu, hangano Ondae i Ue metii i wawono a laro api. Ahuno membombo kana ahu api polabua, ka torukuno atuu reende.

¹⁹ Unino tawuwua kotehi-tehineno komero-merokuno. I Musa mepau, Ondae Ue Ala sumangki a laro rundu.

²⁰ Umarino atuu Ondae i Ue metii a wawo ntorukuno Sinai, a punsuno torukuno atuu. Ka Do'amba i Ue moboio i Musa i punsuno torukuno atuu. Ka i Musa morake lumako i wawono.

²¹ Mepau Ira i Ue ndi Musa, ”Petiimo, pauako ira ntu'u tongku atuu, siimo dompotilalo umpeda ndi Ondae i Ue mingki mpengkita-kita, ka ta hadio inso ndi ondae anu mate.

²² Kanatuu koa mbo'u sando mpesomba anu me'aiwa umpeda ndi Ondae i Ue asalakono dompokomemporio koroido, kasi Doropu ira.”

²³ Ka i'potae i Musa ndi Ondae i Ue, ”Nahi ira mporake tongku atuu a ntorukuno Sinai andio, nde Omiu isa'a anu pauakami, kanandio: Impoweweumo tida lumimbuo torukuno andio ka ipauomo nine mempori.”

²⁴ Mepau Ira i Ue ndi onae, ”Lakomo, petiimo, ka u'amba mewuatako saru i Haruni, sine luwuno sando mpesomba ka palili nahi moiko dompotilalo mporake umpedaako Ira i Ue, kasi Doropu ira.”

²⁵ Metiiomo i Musa tepohaweako ira tongku atuu ka ipauako ira luwuno ndi ondae.