Peluarakoa 18 - Wunta Mempori

I Yitiro tepohaweakono i Musa

¹ I Yitiro, sando mpesomba i Midia, ponino i Musa, rumongeo mongkona anu wineweu-Do Ue Ala ndi Musa ka a nto Isaraeli, bawaa-Do, ba kana'umpe Dowawa iramo to Isaraeli mpeluarako inso i wita Masiri.

² Ka i'amba i Yitiro, ponino i Musa, wawao i Sipora, kombiano i Musa, anu ndi'ipua itenao i Musa ka ipekule,

³ ka orua ira anano tama. Anu asa meneeako i Geresomi, nde ipotae i Musa, ”Gagi akumo mia hawe i wita susua,”

⁴ ka anu susua meneeako i Eliese, nde ipotae, ”Ondae Ue Ala amaku anu tumulungi aku ka kumadudui aku inso a mponaino i Pirao.”

⁵ Itempono i Yitiro, ponino i Musa, saru anano ka kombiano i Musa hawe ndi onae i pada one a mpekemaano umpeda torukuno-Do Ue Ala,

⁶ onae montena mia pauakono i Musa, ”Ongkue i Yitiro, ponimu ka beinemu saru orua ira anamu aiwa ndi omue.”

⁷ Ka i'amba meluarako i Musa tumotowoo ponino, mesomba ka iwoo-wooo. Ondae mambe pesisikeno mongkona teweweuno singge mia, ka do'amba mewinso a laro ngkema.

⁸ Umarino atuu, i Musa tumutuluakono ponino luwuakoano anu wineweu-Do i Ue ndi Pirao ka a nto Masiri hangano to Isaraeli, kanatuu koa mbo'u luwuno masusaa anu pinembasaido to Isaraeli a nsala ka ba kana'umpe Ondae i Ue kumadudui ira.

⁹ Mawongko aroano i Yitiro rumongeo luwuakoano wineweu-Do i Ue anu moiko a nto Isaraeli itempono Dokadudui ira inso a ngkaedo to Masiri.

¹⁰ Ipotae i Yitiro, ”Unde-unde Ira i Ue, anu kumadudui komiumo inso a ngkaedo to Masiri ka i Pirao. Dokaduduiomo tongku andio inso a ngkaedo to Masiri.

¹¹ Kanandio-andio kuto'oriomo, nine Ondae i Ue lalu langkai pabawa-Do sekonopo luwuno lahumoa, ka Doweweu ira kanatuu hangano to Masiri mpopelangka-langkai iramo ndi ondae.”

¹² Umarino atuu i Yitiro, ponino i Musa, mompesombaako pesomba tinunu ka ba opia pesomba sinumbele ndi Ondae Ue Ala. I Haruni ka luwuno mia memota'u Isaraeli me'aiwa mpongkaa mperonga-ronga saru ponino i Musa i aro-Do Ue Ala.

Pompotoroa petewawa

¹³ Tisomono i Musa mentoro mobitara kara-kara i olodo tongku atuu, ka tongku atuu mpentade ira i arono i Musa, mompu'u mo'oru hawe ngkiniwia.

¹⁴ Itempono ponino i Musa kumitao luwuno anu wineweuno a tongku atuu, motaeomo, ”Hapa anu wineweumu a tongku atuu? Tembio ka ibutu asa-asamu mentoro mobitara, sekono luwuno tongku atuu mpentade ira i aromu mompu'u mo'oru hawe ngkiniwia?”

¹⁵ Sumangki i Musa ndi ponino, ”Hangano tongku andio me'aiwa ndi ongkue mpopesikenoako pontiso inso ndi Ondae Ue Ala.

¹⁶ Tewala hinao kara-kara i olodo, me'aiwa ira ndi ongkue ka ongkue bitarao kara-kara i olodo anu asa mia ka anu susua, ongkue koa mbo'u pauako ira luwuno pompakosi ka songka-Do Ue Ala.”

¹⁷ Sine sumangki ponino i Musa, ”Anu wineweumu atuu nahi moiko.

¹⁸ Kotedoa mokendo, moiko omue, maupo tongku saru perongamu, hangano anggaa atuu tedoa mobea, nahi kopolio umanggao asa-asamu.

¹⁹ Kanandio-andio perorongeakono pauku, aku moweeakomu patudu ka Ondae Ue Ala Ira kumongkomiko. Gagimo anu mohaweo kara-karado tongku andio ndi Ondae Ue Ala ka wawao luwuno bitara ndi Ondae Ue Ala,

²⁰ paguruako ira luwuno pompakosi ka songka, ka gau ntumuwu ka pauako ira sala ntuwua anu ta tinondado, ka anggaa anu ira me'anggao,

²¹ Maupo kanatuu inso a luwuno tongku andio asalakono po'ungke mbo'u mia anu timama ka doito ndi Ondae Ue Ala, mia anu pine'ala-ala ka anu mosa'oakono pompowee nahi moleo. Potoro ira i olodo tongku andio gagi petewawa asa nsowu mia, petewawa asa etu mia, petewawa lima pulu mia ka petewawa hopulu mia.

²² Ondae asalakono mpepatinda mpobitara kara-kara i olodo tongku andio te'ipia mokoa. Luwuno kara-kara anu langkai, asalakono domewawao ndi omue, sine luwuno kara-kara anu monongko, domebitarao ondaedo. Bakanandio, tembiamu monongkoomo ka ondae saru omue imentembio mperonga-ronga.

²³ Tewala uweweuo kanandio kana petena-Do Ue Ala ndi omue, asalakono upolio umanggao, ka luwuno mia andio ira mpekule memawongko.”

²⁴ Iperorongeakono i Musa luwuno pinauno ponino ka iweweuo luwuakoano anu ipauakono.

²⁵ Te'inso a luwudo to Isaraeli, i Musa mobiniki mia timama ka ipotoro ira gagi petewawa a tongku atuu, gagi petewawa asa nsowu mia, petewawa asa etu mia, petewawa lima pulu mia ka petewawa hopulu mia.

²⁶ Te'ipia mokoa domengkinere mpobitara kara-kara i olodo tongku atuu. Kara-kara anu mobea, domewawao ndi Musa, sine kara-kara anu monongko, domebitarao ondaedo.

²⁷ Umarino atuu, i Musa mo'ineeo ponino lumako, mekule i witano.