Peluarakoa 17 - Wunta Mempori

Bawaa to Isaraeli umara-arahako Ira i Ue i Masa ka i Meriba

¹ Inso i pada one Sini, mpelungka iramo luwu bawaa Isaraeli. Mpelempa inso a mperatoa lumako a mperatoa menunu kana songka-Do i Ue. Onaemo ka dompekema i Rapidi, sine i ra'ai nahina uwoi ta inuado.

² Gaagi, dompegagaakono i Musa, ka dompotae, ”Powee kamimo uwoi, ka kimpo'inu.” Sine ipotae i Musa ndi ondae, ”Tembio ka impegagaakune? Si me'ara-arahako Ira i Ue?”

³ I ra'ai tongku atuu memokoranga. Tongku atuu mpewuruki iramo ndi Musa ka dompotae, ”Tembio kau wawa kami mpeluarako inso i wita Masiri? Nde komepate kami ke, luwuno ana mami ka pinotuwu mami ka kimemateako mokoranga?”

⁴ Ka i'amba i Musa mebo-booli ndi Ondae i Ue, ipotae, ”Hapa anu ta wineweuku ia tongku andio? Nahi tehine mbo'u ira mewunoakune watu!”

⁵ Mepau Iramo i Ue ndi Musa, ”Pelempamo i arodo tongku atuu ka powawa perongamu ba te'opia mia i olodo mia memota'u to Isaraeli; wawo mbo'u a ngkaemu tuko anu pinakemu mowombaako koro Nili ka lakomo.

⁶ I ra'ai aku mentade i aromu a wawo watu i torukuno Hore. Wombakio watu i torukuno atuu ka inso i larono ta meluarako uwoi, ka dompo'inu tongku atuu.” Kanatuumo iweweuo i Musa i arono matado mia memota'u to Isaraeli.

⁷ Po'ianga atuu nineeako Masa ka Meriba, hangano to Isaraeli mpegaga ka dome'ara-arahako ira i Ue dompotae, ”Ndio Ira koa ke i Ue i oloto?”

Poponangido to Isaraeli a nto Amale

⁸ Mewahe iramo to Amale mpeteaako ira to Isaraeli i Rapidi.

⁹ Ipotae i Musa ndi Yosua, ”Pobinikimo ba te'opia mia anu ira mentonda kita, ka mpeluarako mpetea umewai ira to Amale, tisomo aku mentade i punsuno pongku wita saru tuko-Do Ue Ala a ngkaeku.”

¹⁰ Kanatuumo iweweuo i Yosua kana pinauno i Musa ndi onae ka ipetea umewai ira to Amale; sine i Musa, i Haruni ka i Huru mpewuatako a punsuno pongku wita.

¹¹ Ka gagiomo, tewala i tandeo i Musa kaeno, memoroso irapo to Isaraeli, sine tewala ipotiio kaeno, memoroso irapo to Amale.

¹² Sine mokendoomo kaeno i Musa. Onaemo ka dopo'ala watu, donaao i totono, ka ipentoro i wawono. I Haruni ka i Huru tumumboo orua kaeno, i manggali ka i koana, gagi kaeno tetande mpiha ranta kai sumoo oleo.

¹³ Kanandiomo i Yosua inangiako ira ponai to Amale ka sorodaduno.

¹⁴ Mepau Ira i Ue ndi Musa, ”Luwuno andio burio a wunta kai gagi pepopoto'ori, ka poporongeakono i Yosua, nine Aku umoninio pinewowolodo mongkona to Amale inso i wawo ntolino.”

¹⁵ Ka i'amba i Musa mowangu pontunua pesomba ka ineeakono, ”Ondaemo i Ue poponangiku!”

¹⁶ Nde Dopotae, ”Kae i wawono poponangi-Do i Ue! Ondae i Ue metea umewaio Amale ranta a inuledo.”