Peluarakoa 16 - Wunta Mempori

Pompowee Manna ka atorano oleo Saba

¹ Mansado mpelungka inso i Elimi, luwuno bawaa Isaraeli mehawe iramo i pada one Sini, anu mo'ia i olono Elimi ka torukuno Sinai, ia oleo anu kohopulu ka olima wula ko'orua, insono dompeluarako te'inso i wita Masiri.

² I pada one atuu mpewuruki ira luwuno bawaa Isaraeli ndi Musa ka ndi Haruni;

³ ka dompotaeako ira, ”Aa! Laluopo Dopepate kamimo i Ue i wita Masiri, tempo atuu mpentoro kami mpotaroi kawali bukeako bau ka mpokaa roti ranta lalembula! Sekonopo i wawa kami mpeluarako hawe i pada one andio komiu mepate ira luwuno bawaa andio hangano mokoninggoa.”

⁴ Ka Do'amba mepau i Ue ndi Musa, ”Aku mompotiiakomiu usa roti te'inso i langi; gagi sompo oleo tongku atuu ira mpeluarako mpobini kaangado sompo tiano asa oleo, ka Ku'arahako ira, ba ira koa mentuwu menunu songka-Ku ke naahi.

⁵ I oleo ko'onoo, ba mponahu ira anu winawado mpekule, ta meluka orua hadiono sekonopo anu bininido sompo oleo.”

⁶ Umarino atuu, motae iramo i Musa ka i Haruni a luwudo to Isaraeli, ”Ngkiniwia andio komiu mento'orio nine Ondaemo i Ue anu wawakomiu mpeluarako inso i wita Masiri.

⁷ Ka tempono mo'oru komiu mengkitao maramba-Do i Ue, nde Dorongeomo pewuruki miu ndi Ondae. Nde isemake omami andio, ka impewuruki ndi omami?”

⁸ Ipotae mbo'u i Musa, ”Ba lano Ondae i Ue anu moweeakomiu bau i tempono ngkiniwia ka roti kai melalembula i tempono mo'oru, hangano Dorongeomo i Ue pewuruki miu ndi Ondae, isemake omami andio? Pewuruki miu atuu komba ndi omami sine ndi Ondae i Ue!”

⁹ Ipotae i Musa ndi Haruni, ”Pauako iramo luwuno bawaa Isaraeli ka dome'aiwamo umpeda i aro-Do i Ue nde Dorongeomo pewurukido.”

¹⁰ Kontongaano mepau i Haruni a luwuno bawaa Isaraeli, mpewolili ira te'aro i pada one, domengkitaomo maramba-Do i Ue a laro nseru.

¹¹ Ka Do'amba mepau i Ue ndi Musa,

¹² ”Kurongeomo pewurukido to Isaraeli; pauako iramo: Tempono ngkiniwia komiu mpongkaa bau ka mo'oru komiu memowohi mpongkaa roti, onae ka imento'oriomo, nine Ongkuemo Ue, Ue Alamiu.”

¹³ Tempono owowa oleo manu-manu puru mpenee tumutuwio pekemaa atuu, ka mo'oru hinao tontoru mpe'api-api lumimbuo pekema atuu.

¹⁴ Mansano pingko tontoru, tengkitaomo i wawono pada one hinao anu alusu, monipi kana karansa, alusu kana tontoru anu baku i tolino.

¹⁵ Tempono domengkitao to Isaraeli, mpesisikeno ira pada ondaedo, ”Hapa atuu?” Hangano nahi domento'orio ba hapa atuu, sine i potaeako ira i Musa, ”Onaemo andio roti gagi kangamiu anu Doweeakomiu i Ue.

¹⁶ Kanandiomo songka-Do i Ue: Imempobinimo, sompo mia montonda kinereno. Singge mia mo'ala montonda ihino kemano, asa gomeri asa mia, montonda hadiodo.”

¹⁷ Kanandiomo wineweudo to Isaraeli: mpopumpu kaangado, hinao anu hadio, hinao anu tedei.

¹⁸ Sompo mia mopumpu montonda kinereno, nde mansano sina'uako gomeri, anu mopompu hadio, nahi torea ka mia anu mopumpu tedei, nahi makura.

¹⁹ Ipotaeako ira i Musa, ”Nahina te'asa mia anu mompetorea hawe mo'oru.”

²⁰ Sine hinao anu nahi behe rumongeo i Musa, onaemo ka dompetoreao hawe mo'oru, gagiano me'ule ka mewoo mana moboo. Onaemo kai tekuda i Musa ndi ondae.

²¹ Sompo mo'oru dompobini, montonda kineredo; sine mansano mokula oleo, roti atuu loono.

²² I oleo ko'onoo dompobini roti atuu meluka orua hadiono, orua gomeri tiano asa mia. Onaemo ka domelako luwudo petewawa bawaa mempauakono i Musa.

²³ lpotae i Musa, ”Onaemo anu tinoo-Do i Ue: Tisomo onaemo oleo penaa-naaa, oleo saba anu mempori ndi Ondae i Ue. Roti anu ta tinunu, imentunuomo, ka hapa anu ta ninahu miu, imenahuomo; ka luwuno toreano moikoomo i menaao hawe mo'oru.”

²⁴ Domenaao hawe mo'oru, kana anu iparentaako ira i Musa. Sine roti atuu nahi mewoo mana moboo ka nahi me'ule.

²⁵ Motae mbo'u i Musa, ”Imengkaanomo atuu i oleo andio, nde oleo andio oleo saba, oleo-Do i Ue. Oleo andio nahi komiu mpohawe a mpada.

²⁶ Onoo oleo tehineno impobini, sine oleo ko'opitu oleo saba, nahi tahina roti atuu.”

²⁷ Sine i oleo ko'opitu hinao inso a tongku atuu anu meluarako ta mobini, nahi dompohawe.

²⁸ Onaemo ka Dopepau i Ue ndi Musa, ”Hawe te'ipia nahi mentondao parenta-Ku ka songka-Ku?

²⁹ Impepenteeo, Ondae i Ue weeakomiumo oleo saba atuu ndi omiu. Onaemo pu'uno i oleo ko'onoo Dopoweeakomiu roti tiano orua oleo. Impo'iamo a mpo'iangamiu sompo mia, maupo te'asa nahina meluarako inso a mpo'iangano i oleo ko'opitu atuu.”

³⁰ Onaemo ka dompenaa-naa tongku atuu a oleo ko'opitu.

³¹ To Isaraeli meneeakono roti atuu ”manna”; mopute nggorino kana ketumbara ka namino kana kukisi sinaloako siu hoani.

³² Ipotae i Musa, ”Kanandiomo songka-Do i Ue: Impo'alamo roti te'asa gomeri ka imenaao tiado inulemiu, ka domengkitao roti anu Kuweeakomiu gagi kaangamu i pada one, tempono Kuwawakomiu mpeluarako inso i wita Masiri.”

³³ Ka i'amba motae i Musa i Haruni, ”Alaomo asa kusi, naaomo roti manna i larono asa gomeri buke ka ininaa i aro-Do i Ue ta pinekaria tiado inuleto.”

³⁴ Kana songka-Do i Ue ndi Musa, kanatuumo kusi atuu inaao i Haruni i arono burua pedandia po'iangano songka-Do Ue Ala ka ipinekaria.

³⁵ To Isaraeli mpongkaa roti manna pato pulu nta'u tehineno, ranta ka domehawe a wita po'iangado. Dompongkaa manna atuu ranta ka domehawe a ntida wita Kana'a.

³⁶ Asa gomeri mengkena asa ntia hopulu efa.