Peluarakoa 15 - Wunta Mempori

Penanino i Musa ka Isaraeli

¹ Itempono atuu i Musa saru to Isaraeli mpenaniako mpenani andio ndi Ondae i Ue, ”Aku menani ndi Ondae i Ue, nde Ondae maramba ka poponangi, ngara ka anu mesawikio Dopetadiako ira a laro ntahi.

² Ondae i Ue rosoku ka penaniku, Ondae gagi pongkaduduiku. Ondae Ue Alaku, ku'unde-unde Ira, Ondae Ue Alado amaku, kupelangkai Ira.

³ Ondae i Ue tadulako mpeteaa; Ondae i Ue, onaemo nee-Do.

⁴ Karetano i Pirao ka sorodaduno Dopetadiako ira a laro ntahi; luwuno petewawa sorodadu anu tebiniki Dopotondu ira a laro ntahi Teberau.

⁵ Bombano tahi malua kuma'uwi ira; kana watu, domentondu a uwoi ondalo.

⁶ Kae ngkoana Miu, Ue, maramba a laro mpabawa Miu. Kae ngkoana Miu, Ue, mokoropuo iwali.

⁷ Saru mpoponangi-Miu anu langkai Iropu ira anu umewaiko-Miu; Ipotolao tekuda-Miu, kana langano api, kumaa ira kana seami.

⁸ Hangano pepuurino penaa-Miu uwoi mebomba langkai; waaano uwoi mentade maleo kana binunto; lolowi baaku i tonga-tongano tahi.

⁹ Potaedo iwali: ’Aku lumampui ira ka humawe ira, aku tumia-tiao pinomuru; Aku motolao tekudaku ndi ondae, aku butao ponaiku; kaeku ta mokoropu ira!’

¹⁰ Omiu mepuuriakono lompiu-Miu, tahi kuma'uwi ira; kana tima domentondu a laro uwoi anu mongkokongiri.

¹¹ Isema kana Omiu i olodo pinesombai susua, O Ue? Isema kana Omiu, maramba a laro mempori-Miu, ntengiri hangano wineweu-Miu tepalele, anu moweweu kinohali-haliako?

¹² Itaangakono kae ngkoana-Miu; tolino tumele ira.

¹³ A pompehohawa-Miu i taate ira bawaa anu tinolosi-Miu; Hangano roso-Miu i taate ira hawe a mpo'ianga-Miu anu mempori.

¹⁴ Luwuno tongku merongeo, mpondidi-ndidi ira; mpondende umalu ira palili i wita Pelisiti.

¹⁵ Tempo atuu maroaomo domempopauo a tongku Edomi, Medanggara iramo anu mempabawa i Moabi; luwuno palili wita Kana'a mpondidi-ndidi.

¹⁶ Doitoa ka mongkokongiria umalu ira, Hangano rosono kae-Miu mansa ira merodo kana watu, ranta bawaa-Miu mpe'asatowaako, oo Ue, ranta bawaa anu tinolosi-Miu mpe'asatowaako.

¹⁷ Iwawa ira ka Ipekaria ira a wawo ntorukuno-Miu; a mpo'ianga anu gagi po'iangaa-Miu, o Ue; a mpo'ianga mempori, anu winanguno kae-Miu, o Ue.

¹⁸ Omiu Ue moparenta ranta nahina tampulaano.”

¹⁹ Mansano ngarano i Pirao saru karetano ka miano anu mpesawi a ngara mentondu a ntahi, onaemo ka Doweweuo i Ue uwoi ntahi mepokule kuma'uwi ira, sine to Isaraeli mpelempa a motu'iano a ntonga ntahi.

²⁰ Ka i'amba i Miria, nabi beine atuu, pepaekompono beine i Haruni, mo'ala rebana, pentade iramo luwuno beine mentondao mpotingko rebana saru mo'ende-ende.

²¹ I Miria tumondao penanido to Isaraeli, ”Aku menani umunde-unde Ira i Ue, nde Ondae maramba poponangi; ngara ka miano Dopetadiako ira a ntahi.”

I Mara ka i Elimi

²² I Musa wawa ira to Isaraeli mpelungka inso i tahi Teberau, ka domelako i pada one Suri; otolu oleo dompelempa i pada one atuu nahi dompowahe uwoi.

²³ Mehawe iramo i Mara, sine nahi moiko dompo'inu uwoi i Mara atuu, hangano mopa'i. Onaemo pu'uno po'ianga atuu domeneeakono Mara.

²⁴ Onaemo ka dompewuruki tongku atuu ndi Musa, dompotae, ”Kami mpo'inu hapa?”

²⁵ Mebo-booliomo i Musa ndi Ondae i Ue, ka Ondae i Ue tumisoakono asa mpole keu. Ipewunoakono i Musa keu atuu a laro uwoi, uwoi atuu gagi mo'ahi dome'inuo. I ra'aimo Dopoweeako ira i Ue luwuno songka ka atora. I ra'aimo Do'arahako ira,

²⁶ Pau-Do i Ue, ”Ipompe'ala-alamo ndi Ongkue Ue, Ue Alamiu ka impoweweu anu moiko a mpongkita-Do, imerongeo luwuno songka-Ku ka tumondao songka-Ku, asalakono nahi Aku mo'ineeo haki hapamo koa metako ndi omiu, kana anu pinotii-Ku a nto Masiri; nde Ongkuemo Ue anu mokotompako.”

²⁷ Umarino atuu mehawe iramo i Elimi; i ra'ai hinao hopulu ka orua mata uwoi ka pitupulu keu koroma, ka mpekema iramo i wiwino uwoi atuu.