Peluarakoa 14 - Wunta Mempori

I Pirao lumampui ira to Isaraeli

¹ Mepau Iramo i Ue ndi Musa, kanandio,

² ”Pauako ira to Isaraeli, ka dowali mpepokule ka mpekema i arono Pi-Hahiro, i olono Migido ka tahi; asalakono ka impekema i arono Ba'ala-Seponi i wiwi ntahi.

³ Ta motae i Pirao, ’Mebulalingo iramo to Isaraeli atuu i wita andio, pada one kumadu ira.’

⁴ Aku mokomoteao aroano i Pirao, kai lampui ira. Aku mokomengkaao maramba-Ku ndi Pirao ka a luwuno sorodaduno, ka domento'orio koa to Masiri, nine Ongkuemo Ue.” Onaemo ka domeweweuo.

⁵ Mansano pinauako mokole i wita Masiri, nine to Isaraeli atuu mpolai iramo, tebaliomo aroano i Pirao saru luwuno pegawaino a tongku atuu, ka dompotae, ”Hapake anu wineweuto andio, ranta ka tompo'inee ira to Isaraeli melako inso a mpope'ataato?”

⁶ Onaemo ka ipatindao karetano ka iwawa ira palilino melako.

⁷ Iwawa ira luwu kareta i Masiri tewinso saru nomo'etu kareta anu tebiniki pe'ulaado tadulako sorodadu.

⁸ Ondae i Ue mokomoteao aroano i Pirao, mokole Masiri atuu, onaemo ka ilampui ira to Isaraeli. Sine to Isaraeli mpelempa ira mpiha kae-Do i Ue kumongkomi ira.

⁹ Sorodadu to Masiri saru luwuno ngara ka karetano i Pirao ka mia mpesawi a ngara lumampui ira, ka dohawe ira a mpekemaado i wiwi ntahi, umpeda Pi-Hahiro i arono Ba'ala-Seponi.

¹⁰ Mansano umpedaomo i Pirao, mpewolili iramo to Isaraeli, domengkita iramo to Masiri aiwa tumonda ira. Onaemo to Isaraeli ka domedoito ntu'u, ka dompebooli ndi Ondae i Ue.

¹¹ Ka dompotae ndi Musa, ”Nde nahina pekaburua i wita Masiri, onaekoa kau wawa kami memate i pada one andio? Hapa tinoomu wawa kami mpeluarako inso i wita Masiri?

¹² Lano mpotae kamimo ndi omue i wita Masiri, si sosanggoli kami, po'ineeomo kimpo'angga a nto Masiri. Nde moikoopo kimpo'angga a nto Masiri, sekonopo mate i pada one andio.”

¹³ Sine ipotaeako ira i Musa to Isaraeli atuu, ”Si medoito, ikongko memoroso, komiumo mengkitao pongkadudui-Do i Ue anu Ira weeakomiu oleo andio; nde to Masiri anu kinitamiu oleo andio, nami komiu hori kumita ira mbo'u.

¹⁴ Ondae i Ue Ira meteaakomiu, ka omiu impenoro-noromo koa.”

To Isaraeli mpe'asatowaako i Tahi Teberau

¹⁵ Mepau Iramo i Ue ndi Musa, ”Tembio kau pebooli kanandio ndi Ongkue? Tena iramo to Isaraeli ka domelako.

¹⁶ Kanandio-andio tandeo tukomu, taangakono kaemu a wawo ntahi ka ponsiao uwoino, gaagi to Isaraeli ira mpelempa itonga-tongano tahi a motu'iano.

¹⁷ Sine lano Aku mokomoteao aroado to Masiri, ranta ka domelampui ira to Isaraeli, nde Aku mopokitao maramba-Ku ndi Pirao ka a luwuno sorodadu, kareta ka mia anu mpengara.

¹⁸ Gagi iramo mento'orio to Masiri, nine Ongkuemo Ue, i tempono Kupopokitao maramba-Ku ndi Pirao, karetano ka mia anu mpengara.”

¹⁹ Umarino atuu, mala'eka-Do Ue Ala anu se'eluno melempa i arodo sorodadu Isaraeli, melimba melempa i bungkudo. Tondonino a nseru melimba inso arodo ka mentade i bungkudo.

²⁰ Kandiomo tondonino a nseru atuu mentade i olodo sorodadu to Masiri ka sorodadu to Isaraeli. Ka tondonino a nseru atuu mompokowongi mpusu, sine a nsusuano tondonino a nseru atuu wantahio wongi, onaemo kanahi dompokotepo'umpedakono anu susua asa wongi atuu.

²¹ Ka i'amba i Musa tumangaakono kaeno a wawo ntahi, ka asa wongi atuu Ondae i Ue mepuuriakono angi anu tedoa magasi inso i sabaano oleo monsuao uwoi ntahi atuu gagi wita motu'i. Kanatuumo i teponsua uwoi atuu.

²² Ka do'amba to Isaraeli mpelempa i tonga-tongano tahi anu motu'i; i manggali ka i koanado uwoi atuu gagi bentedo.

²³ To Masiri lumampui ira, luwuno ngarano i Pirao, karetano ka mia mpesawi a ngara tumonda lembui ira hawe a tonga ntahi.

²⁴ Mansano umpeda meene, Ondae i Ue anu a tondonino api ka a nseru atuu mensiroi ira sorodadudo to Masiri, ka Dosiarawo ira.

²⁵ Doweweuo bolano karetado melempa tintihere ka mobea lakono, onae ka dompotae to Masiri, ”Aiwa kato mpolai binta ira to Isaraeli, nde Ondaemo i Ue anu me'iwaliako ira to Isaraeli umewai kita.”

²⁶ Mepau Iramo i Ue ndi Musa, ”Taangakono kaemu a wawo ntahi, ka ipepokule uwoi kuma'uwi ira to Masiri, karetado ka mia anu mpengara.”

²⁷ Onaemo kai taangakono i Musa kaeno a wawo ntahi, mansano umpeda meene mepokuleomo uwoi ntahi a mpo'iangaano, ka to Masiri atuu mempolai inso i arono uwoi atuu. Kanatuumo Ondae i Ue metadiako ira to Masiri a tonga ntahi.

²⁸ Uwoi atuu mepokule ka kuma'uwio kareta ka mia mpengara saru luwuno sorodaduno i Pirao, anu tumonda ira to Isaraeli atuu a ntahi. Te'asa mia nahina anu tuwu.

²⁹ Sine to Isaraeli mpelempa a motu'iano a tonga ntahi, i manggali ka i koanado uwoi atuu gagi bentedo.

³⁰ Kanatuumo oleo atuu Dokadudui Ira i Ue to Isaraeli inso a ngkaedo to Masiri. To Isaraeli kumita ira to Masiri anu memate, nterampe i wiwi ntahi.

³¹ Mansado mengkitao to Isaraeli, wineweu-Do i Ue anu mongkokongiri a nto Masiri, medoito iramo tongku atuu ndi Ondae i Ue. Ka i'amba dompompe'ala-ala ndi Ondae i Ue ka ndi Musa, tetenaa-Do atuu.