Peluarakoa 12 - Wunta Mempori

Mongkona pompelangkai pasa

¹ Mepau Iramo i Ue ndi Musa ka ndi Haruni i wita Masiri,

² ”Wula andio tumondonio pompu'uano luwuakoano wula ndi omiu; onaemo wula ko'aasa a mpodoamiu wula sompo ta'u.

³ Pauako iramo luwuno bawaa Isaraeli: Ia tanggala hopulu wula andio, asalakono sompo mia mo'ala asa ana bimba tiano sompo sombori, montonda pepe'etuado.

⁴ Sine tewala tedei lahi miano asa nsombori, moiko domperonga-ronga saru pehori rahado mposumbele asa ana bimba, montonda hadiono mia; anu domentasereo sompo dompetiao montonda tekonano asa mia.

⁵ Moiko impo'ala ana bimba ke bembe, sine asalakono anu nahina tataano, lakino, metinuwu asa nta'u.

⁶ Bimba ke bembe atuu, asalakono imponsiao hawe tanggala hopulu ka opaa wula andio; ka i'amba luwuno bawaa Isaraeli mpepumpu mposumbele tempono ngkiniwia.

⁷ Ka i'amba inala reano tedei kai hinahiako a orua karuno pewowa ka pontoweano i wawono, a luwuno raha po'iangaado mengkaano.

⁸ Bauno asalakono rinarami ka i'amba kinaa a wongi koa atuu saru roti anu nahi peragi ka inahu mopa'i.

⁹ Si mengkaano momata ke anu ninahu uwoi; tendeano rinarami ia api, luwuno saru uluno ka witino ka ihi larono.

¹⁰ Si mpopetorea bauno ke hapanomo koa hawe mo'oru. Tewala hinao anu torea hawe mo'oru, imentunuo ranta ka ipingko.

¹¹ Kanandio ba imengkaano: Impeboo ntonga, mpesandala ka tuko ia ngkae; Imempari-pario mengkaano. Onaemo Pasa pompelangkaimiu ndi Ondae i Ue.

¹² Nde ia wongi andio Aku melempa sumompoo wita Masiri, Aku mepate ira luwuno ana amba-ambano, moiko anano mia hawe anano pinotuwu, ka luwuno lahumoado to Masiri Aku humuku ira. Ongkuemo Ue.

¹³ Rea atuu gagi tondonino raha po'iangamiu. Tewala Kukitao rea atuu, Aku lumalokomiu. Gaagi nahi tahina pohuku matea ndi omiu tempono Kuhukuo wita Masiri.

¹⁴ Oleo andio ta gagi oleo pepopoto'ori ndi omiu. Asalakono impelangkaio oleo atuu gagi oleo langkai-Do i Ue hawe a inulemiu. Kanatuumo sompo ta'u asalakono impelangkaio mpiha gagi pompakosi.

¹⁵ Opitu oleo tehineno imempokaa roti anu nahi peragi. Oleo ko'aasa ragi anu kongko a laro rahamiu imentadio, nde i larono opitu oleo atuu, isema mia anu mongkaa hapamo koa anu meragi, mia atuu linuarako inso a bawaa Isaraeli.

¹⁶ Moiko i oleo amba-ambano, kanatuu koa mbo'u oleo ko'opitu, impoweweu tepumpua mempori. Ia orua oleo atuu, nahi moiko impo'angga hapamo koa sangkadio mpopatinda kaangamiu oleo atuu.

¹⁷ Gagi asalakono impelangkaio Oleo Langkai Roti Nahi Peragi, nde ia oleo atuu Kuwawao pebaresimiu mpeluarako inso i wita Masiri. Asalakono ka impelangkaio oleo atuu ranta hawe a inulemiu. Onaemo pompakosi ranta nahina tampulaano.

¹⁸ Ia wula ko'aasa, tanggala hopulu ka opaa wula atuu tempono ngkiniwia, asalakono impokaa roti nahi peragi, hawe ia tanggala rua pulu ka asa wula atuu tempono ngkiniwia.

¹⁹ Opitu oleo tehinenio kasihina ragi i rahamiu, nde mia anu mongkaa hapamokoa anu meragi, asalakono mia atuu linuarako inso a bawaa Isaraeli, moiko mia hawe maupo to Isaraeli.

²⁰ Si mpokaa hapamo koa anu mompake ragi; ba isuamokoa impo'ia impokaamo roti anu nahi peragi.”

²¹ Ka i'amba moboi ira i Musa luwuno mia memota'u to Isaraeli, ka ipotaeako ira, ”Imelakomo mpo'ala bembe ke bimba tiamiu asa mpinu'u ka imensumbeleomo ana bimba Pasa.

²² Imempo'ala te'asa nte'u hisopi, kai emoo a rea anu ninaa a bolusa, ka rea atuu pahihio a orua karuno pewowa ka a montoweano i wawono. Wongi atuu, nahina maupo te'asa mia ndi omiu meluarako inso a laro raha hawe mo'oru.

²³ Ka Ondae i Ue melempa sumompoo humukuo luwuno wita Masiri. Itempono Dokitao rea a orua karuno pewowa ka montoweano iwawono atuu, Ondae i Ue Ira lumaloo pewowa atuu ka nahi Dopo'ineeo mala'eka pompepate mewinso a laro raha humuku komiu.

²⁴ Omiu saru luwuno anamiu asalakono imeweweuo songka andio ranta nahina tampulaano.

²⁵ Tewala mehawe komiumo ia wita anu Ira weeakomiu i Ue ndi omiu, kana anu pinau-Do asalakono imeweweuo pesomba andio.

²⁶ Tewala mpesikeno ira anamiu ndi omiu, ’Hapa pengkonaano pesomba andio ndi'omiu?’

²⁷ Asalakono imempauako ira: Onaemo atuu pesomba Pasa melangkai ira i Ue, anu lumaloo rahado to Isaraeli i wita Masiri, tempono Dohuku ira to Masiri, sine ndi ontae tetolosi luwuno rahato.” Onaemo ka dompenggolontu to Isaraeli mpesomba.

²⁸ Melako iramo to Isaraeli, ka domeweweuo kana petena-Do i Ue ndi Musa ka ndi Haruni, kanatuumo domeweweuo.

Pohuku kohopulu: Ana amba-ambano mate To Isaraeli mpeluarako te'inso i Masiri

²⁹ Itempono ntonga wongi Ondae i Ue mepate ira ana amba-ambano i wita Masiri, mompu'u inso a ana amba-ambano i Pirao, anu mentoro a ngkadera poparentaano hawe a ana amba-ambano mia tinabua, anu mpo'ia a laro kineke pohukua, saru luwuno pinotuwu anu pine'anaako amba-ambano.

³⁰ Ka i'amba mewangu i Pirao wongi atuu saru luwuno pegawaino ka luwudo to Masiri. Ka terongeomo ponsabangia i wita Masiri, hangano luwuno raha hinao mia mate.

³¹ Wongi atuu i Pirao moboi ira i Musa ka i Haruni, ka ipotae, ”Impeluarakomo luwu inso ndi omami ka imebintao wita mami, ka imelakomo mpesomba ndi Ondae i Ue, kana po'emamiu.

³² Imewawa ira luwu pinotuwumiu, sapi, asa bawaa bembe bimbamiu, kana pinaumu atuu, sine imelakomo ka impekakai po'emaakune ngkuda ura tiaku.”

³³ To Masiri mbo'u dumadai ira to Isaraeli, ka dompopari-pari melako mebintao witado, nde dompotae, ”Kasi komba kimemate luwu.”

³⁴ Ka i'amba tongku atuudo menaao tarigu sinalo anu napi pinonaako ragi a mposaloa anu tinongo a laro nsawu ka domentandeo a oweado.

³⁵ To Isaraeli meweweuo mbo'u kana pinauno i Musa, mpo'ema ira inso a nto Masiri sangka wulaa, salaka saru sawu.

³⁶ Ondae i Ue moweeako ira to Masiri aroa pompehohawa, onae ka do'ihiiako ira po'emado to Isaraeli atuu. Kanatuumo wineweudo to Isaraeli rumontu ira to Masiri.

³⁷ Umarino atuu, mpelungka iramo to Isaraeli melako inso i Ra'amase te'aro i Sukoti, tama anu mpelempa ngkaru bara'ura nomo'etu nsowu mia nahi tedoa nana'ote ka kombiado.

³⁸ Hadio mia inso a tongku susua anu mpetonda ndi ondae ka tedoa hadio pinotuwudo, asa bawaa bembe bimba ka sapi.

³⁹ Tarigu sinalo anu mewinawado inso i wita i Masiri, domentunuo gagi roti bonggoli anu nahi peragi. Tarigu sinalo atuu nahi pinonaako ragi hangano mensinaari ira inso i wita Masiri ka mpodadusi ira, nami domente'alu popatinda kaangado.

⁴⁰ To Isaraeli mpo'ia i wita Masiri pato etu ka tolu pulu nta'u tehineno.

⁴¹ Umarino pato etu ka tolu pulu nta'u, kona i oleo atuu, mpeluarako iramo luwu baresino bawaa-Do i Ue inso i wita Masiri.

⁴² Wongi atuu Ondae i Ue dumagai ira ka tumaate ira a mpelempado mpeluarako inso i wita Masiri. Wongi atuu nahi ira mengkolupeo to Isaraeli mpedagai ndi Ondae i Ue ranta a inuledo.

Potilalono songka pompelangkai Pasa

⁴³ Mepau Iramo i Ue ndi Musa ka ndi Haruni, ”Ndiomo songka mongkona Pasa: Mia mehawe si dompokaa bauno bimba pesomba Pasa.

⁴⁴ Sine ata anu inoli, tewala umariomo tinindi ka i'amba moiko ipongkaa.

⁴⁵ Mia mehawe ka mia mentinambo si domengkaano.

⁴⁶ Bauno ana bimba Pasa atuu asalakono kinaa i laro asa raha; si mpowawa bauno maupo tedei meluarako inso i laro raha; maupo wuku si mempuduo.

⁴⁷ Asalakono luwuno bawaa Isaraeli mpelangkaio.

⁴⁸ Sine tewala hinao mia hawe, rodoomo mo'ia ndi omiu ka ineheno melangkaio Pasa ndi Ondae i Ue, asalakono luwuno tama pe'asa rahano mpetindi, umari atuu moikoomo dompetonda mpelangkaio Pasa. Ondae gagi iramo bawaa Isaraeli. Sine mia anu nahi petindi, si dompongkaa.

⁴⁹ Asa koa atora anu ta tinonda, moiko to Isaraeli maupo mia mehawe anu merodo iramo ndi omiu.”

⁵⁰ Luwudo to Isaraeli mpoweweu kanatuu. Kana songka-Do i Ue ndi Musa ka ndi Haruni, kanatuumo domeweweuo.

⁵¹ I oleomo atuu Ondae i Ue wawa ira baresido to Isaraeli mpeluarako inso i wita Masiri.