Peluarakoa 11 - Wunta Mempori

Pepopoto'ori mongkona pohuku pokotompa

¹ Mepau Iramo i Ue ndi Musa, ”Aku mompokohina mbo'u asa pohuku ndi Pirao ka a nto Masiri, umari atuu ta mo'ineekomiu inso i ndi'ai. Tempono ipo'ineekomiu, onae ta sumaarikomiu ntu'u inso i ndi'ai.

² Pauako iramo to Isaraeli, ka dompo'ema sangka wulaa ka salaka, singge mia moiko tama ka beine mo'ema a pehori rahano.”

³ Onaemo ka Doweweu ira i Ue to Masiri mpe'aroa a nto Isaraeli atuu; laanopo i Musa onae asa mia anu tedoa pinelangkai i wita Masiri, moiko a mpegawaino i Pirao maupo a mpalili.

⁴ Ipotae i Musa, ”Kanandio pau-Do i Ue: Tempono ntonga wongi, Aku melempa i olodo to Masiri.

⁵ Luwuno ana aka i wita Masiri ira memate, mompu'u inso a ana amba-ambano i Pirao anu mentoro a ngkadera poparentaano hawe a ana amba-ambano ata beine anu mpo'aropi watu pogilia, kanatuu koa mbo'u luwuno anano pinotuwu anu amba-ambano.

⁶ Ka tamo teronge ponsabangia anu tedoa mongkokongiri asa wawo wita Masiri, kana anu napi hori gagi ka nahi ta hori mbo'u gagi.

⁷ Sine ndi ondae to Isaraeli, te'asa mokoa dahu nahi ta mosia mohopa, moiko a mia ka a mpinotuwu, kai mento'orio, nine Ondae i Ue moweweu teposisinggeno to Masiri ka to Isaraeli.”

⁸ Ipotaeakono i Musa i Pirao, ”Luwuno pegawaimu ira me'aiwa mpenggolontu ndi ongkue, ka dompotae: ’Peluarakomo, omue saru luwuno palili anu mentondako!’ Umarino atuu, aku meluarako.” Meluarakoomo i Musa anu tensila tekudano bintao i Pirao.

⁹ Mepau Iramo i Ue ndi Musa, ”Nahi ta merorongeakomu i Pirao, kai tetiangi hadiono petondoni kinohali-haliako anu wineweu-Ku i wita Mesiri.”

¹⁰ Doweweuomo i Musa ka i Haruni luwuakoano petondoni kinohali-haliako i arono i Pirao. Sine Ondae i Ue mokomoteao aroano i Pirao, onaemo ka nahi eheako ira to Isaraeli melako inso ia witado.