Peluarakoa 10 - Wunta Mempori

Pohuku ko'oalu: kosume

¹ Mepau iramo i Ue ndi Musa, ”Lakomo pe'aro ndi Pirao, nde Kupokomoteaomo aroano ka aroado pegawaino, nde Aku mopokitao petondoni kinohali-haliako ndi ondae,

² ka omue tumutuluako ira ana uemu, kana'umpe kupemae-maeako ira to Masiri ka petondoni hapa anu kinohali-haliako Kupopokitaako ira ndi ondae, nde ka imento'orio koa, nine Ongkuemo Ue.”

³ Lumako iramo i Musa ka i Haruni me'aro ndi Pirao ka dopotae ndi onae, ”Kanandiomo pau-Do i Ue, Ue Alado to Ibarani: Da tehine ke, ka u'amba me'urumako i aro-Ku? Potola iramo bawaa-Ku ka domelako mpesomba ndi Ongkue.

⁴ Nde tewala u'onto ira bawaa-Ku melako, tisomo Aku mopotii kosume a wita poparentaamu;

⁵ kosume atuu ta tumutuwioo wawo wita, onae ka nami tekita wita; kosume atuu ira mengkaano kai pingko anu da tebinta toreano dumunsio usa uwoi watu, ka maupo keu anu tuwu i tonga mpada ta pingko domengkaano kosume.

⁶ Kosume atuu ta buke a laro rahamu, a rahado luwuno pegawaimu, ka a luwuno rahado to Masiri, kana anu napi dohori mpongkita amamiu ka uempu'umiu, insono domehina i tolino ranta hawe oleo andio.” Ka i'amba i Musa mewolili meluarako bintao i Pirao.

⁷ Umarino atuu mpotae iramo pegawaino i Pirao ndi onae, ”Hawe te'ipia mia andiodo ira megagi oho ndi ontae? Potola iramo mia atuudo melako mpesomba ndi Ondae i Ue, Ue Alado! Nde ba domekongko mpiha mpo'ia, Masiri andio tampula?”

⁸ Ka i'amba i Pirao wali moboi ira i Musa ka i Haruni, ka ipotaeako ira, ”Imelakomo, ka impesombamo ndi Ondae i Ue, Ue Alamiu, sine, i sema luwu anu ta lumako?”

⁹ Sumangki i Musa, ipotae, ”Luwu mami, maupo mia anu mongura ka mia mota'u, saru nana'ote mami tama ka beine ka pinotuwu mami, asa bawaa bembe bimba ka sapi mami, nde kami mpoweweu pompelangkai ndi Ondae i Ue.”

¹⁰ Sine ipotaeako ira i Pirao, ”Po'ineeomo Ondae i Ue kumongkomikomiu tewala aku motolakomiu saru nana'ote ka kombiamiu. Mengkaaomo, tinoomiu mosa'o!

¹¹ Naahi! Moiko koa i melako, sine butu koa tama ka mpesombamo ndi Ondae i Ue, nde onae anu inehemiu.” Umarino atuu sinaari ira inso i arono i Pirao.

¹² Mepau iramo i Ue ndi Musa, ”Tandeo kaemu a wawo wita Masiri ka domehawe kosume buketio wita Masiri mengkaano luwuakoano pinopaho a wita, anu da tebinta hangano usa uwoi watu atuu.”

¹³ Onaemo kai tandeo i Musa tukono a wawo wita Masiri, ka Ondae i Ue mompotii umangi anu mepuuri inso i sabaano oleo telalo i wita atuu, asa oleo ka asa wongi, ka umpeda meene umangi atuu mowawaomo kosume.

¹⁴ Mehawe iramo kosume tedoa hadio buketio luwuno wita Masiri. Se'eluno napi hori hina kosume anu kanandio hadiono ka umarino andio nahi ta hori hina mbo'u anu kanantuu.

¹⁵ Wita atuu gagi mo'ito i tutuwio kosume; pinopaho, wua ngkeu ka luwuno anu tuwu a wita ka melewe, binintano usa uwoi watu atuu, piingko domengkaano kosume. Onaemo ka nami hina mbo'u anu molowulu a mpinopaho ke keu anu tuwu a mpada asa wawo wita Masiri.

¹⁶ Mompari-pariomo i Pirao moboi ira i Musa ka i Haruni ka ipotae, ”Tehala akumo ndi Ondae i Ue, Ue Alamiu, ka ndi omiu.

¹⁷ Onaemo pu'uno, pohona mbo'u andio i oniniakune halaku ka ipekakaimo ndi Ondae i Ue, Ue Alamiu atuu, ka Dopoko'olaio matea andio inso ndi ongkue.”

¹⁸ Meluarakoomo i Musa bintao i Pirao ka ipekakai ndi Ondae i Ue.

¹⁹ Onaemo ka Dobalio i Ue umangi mepuuri inso i sabaano oleo, gagi inso i sumooano oleo anu tedoa magasi mowawa kosume ka metadiako ira a laro ntahi Teberau: maupo te'asa kosume nahina tebinta i wita Masiri.

²⁰ Sine Ondae i Ue mokomoteao aroano i Pirao, onae ka nahi eheako ira to Isaraeli melako.

Pohuku ko'osio: worikidi

²¹ Mepau Iramo i Ue ndi Musa, ”Tandeomo kaemu kontahane i langi, kai gagi worikidi tumutuwio wita Masiri, gaagi worikidi atuu tedoa dompemarasaio.”

²² Onaemo ka itandeo i Musa kaeno kontahane i langi, ka gagiomo worikidi tumutuwio wita Masiri otolu oleo tehineno.

²³ Mia nami dontepokita ka i larono otolu oleo, nahina mia anu meluarako inso a mpo'iangaano, hangano worikidi. Sine a mpo'iangado to Isaraeli, mewine.

²⁴ Ka i'amba i Pirao moboio i Musa ka ipotae, ”Imelakomo, ka impesomba ndi Ondae i Ue, beine ka nana'ote, moiko dompetonda, butu asa bawaa bembe bimba ka sapimiu asalakono imebintao, sine anamiu ka kombiamiu moiko domentondakomiu.”

²⁵ Sine i potae i Musa: ”Tewala kanatuu, ipoweeakami pinotuwu ta pesomba mami anu sinumbele ka pesomba anu tinunu kami mempatindao tia-Do i Ue, Ue Alamami.

²⁶ Kami melako saru pinotuwu mami, nahina anu ta tebinta maupo te'asamo koa, nde inso a mpinotuwu atuu kami mpo'ala pesomba mami, ka napi kimento'orio ba pinotuwu anu isua kami mpesombaako tewala napi kimehawe ndiraane.”

²⁷ Sine Ondae i Ue mokomoteao aroano i Pirao, onaemo ka nahi eheako ira.

²⁸ Onaemo ka ipotae i Pirao ndi Musa, ”Lakomo inso ndi ongkue! Kasi hori mbo'u kitao rupaku, nde tewala horiko mbo'u kumitao rupaku, asalakono komate.”

²⁹ Ka i'amba motae i Musa, ”Menteentuu nineemiu! Nahi aku hori mbo'u kumitakomiu!”