Obaja 1 - Wunta Mempori

Pompau anu ta gagi mongkona pohuku tiano Edomi 1-16

¹ Pongkitano i Obaja. Ndiomo pau-Do Ue Ala mongkona Edomi. Kimerongeomo lele inso ndi Ondae i Ue, ka asa mia tinena inoliwiomo i tongano luwuno tongku saru pe'oliwi, ”Impentademo, aiwa kato melako mpeteaakono Edomi.”

² ”Menteeano, Aku weweuko kodei i olodo luwuno tongku, omue kotedoa tinetewehi.

³ Pompelangka-langkaino aroamu popandeikomo, oo, omue anu mo'ia a luwuno aano watu, a mpo'iangamu anu mantande; omue anu motae i laro aroamu: ’Isemake anu polio motii aku i tolino?’

⁴ Maupo upenee mantande kana singko, tendeano maupo senomu ninaa i olodo luwuno anano wula, inso i ra'ai mbo'u Aku motiiko,” kanandiomo pau-Do i Ue.

⁵ Tewala temponomo wongi mia monako ke mia morontu hawe ndi omue, maupo kana'umpe omue isolangiko, ipepateko kombake ta monako montonda hadiono anu kinereno? Tewala puu mpo'opu wua anggoro hawe ndi omue, kombake ira mpobinta tore-toreano inopudo?

⁶ Inuleno i Esau tedoa pinaresa, arataano anu tewuni tedoa inungke!

⁷ Hawe a tompa tida omue domensaariko wali-walimu; omue pinopo'oo, domenagiko sambe'emu. Ondae anu mpe'asa mpongkaa saru omue mpota'oakomu oho. Mongkona atuu nahi pokonto'orio.

⁸ Kombake i tempo atuu, kanandiomo pau-Do i Ue, Aku mokotampulao luwuno mia pande mosongka inso i Edomi, ka monto'ori inso a mentorukuno Esau?

⁹ Luwuno mbo'u puu mpeteamu, hei Temani, ira medoito, ranta luwuno mia i mentorukuno Esau tampula pinepate.

¹⁰ Hangano pobobarasaia a mpepaekompomu i Yako, tataa ta lumimbuko, ka omue kopinokotampula mpiha.

¹¹ I tempono upentade i olaiano, kontongaado mia susua mentandeo pompolino Yerusale ka mia mehawe mpewinsokio mpewowa langkaino ka mpotendeakono undi, omue mbo'u kana asa mia inso i olodo atuu.

¹² Si pe'uru-uruo pepaekompomu, a oleo urasa'ono, si po'undeako ira to Yehuda a oleo mateado; ka si hadio mpau a oleo masukaraano.

¹³ Si pewinso a mpewowa langkaido bawaa-Ku a oleo urasa'odo, ka si pemonongkoo masolaa anu umaluo a oleo urasa'ono; ka si rontuo pompolino a oleo urasa'ono.

¹⁴ Si pentade a sampanga komokotampula ira mia anu mentola, ka si peweengako ira miano anu mentola a oleo masukaraa.

¹⁵ Hangano oleo-Do i Ue rangkuomo umaluo luwuno tongku. Kana anu wineweumu, kanandiomo ta wineweu ndi omue, wineweumu ta mepokule umaluo ulumu omuemu.

¹⁶ Menteeano, kana ime'inuomo tekuda-Ku iwawo torukuno-Ku anu mempori, kanandio koa mbo'u luwuno tongku ira mpo'inu nahi dompenaa-naa; tendeano ira mpompeguu inua, ranta ka domegagi kana-kana nahi domekongko.

Tolaano bawaa-Do i Ue i Sioni 17-21

¹⁷ Sine i torukuno Sioni ta hina mia anu tepotola; torukuno atuu ta gagi po'ianga mempori, ka inuleno i Yako ta mpe'ueo mbo'u witado.

¹⁸ Inuleno i Yako ta gagi api ka inuleno i Yusupu gagi langano api, sekono inuleno i Esau megagi tu'ono gandu; ira mentunuo ka mengkaano ka ipingko luwu, ka nahina maupo te'asa mia anu tola inso i olodo inuleno i Esau, hangano Ondae i Ue mepau Iramo kanandio.

¹⁹ Luwuno to Nege ira mpe'ueo mentorukuno Esau, ka luwuno to Sepela ira mpe'ueo witado to Pelisiti. Ira mpe'ueo wita Eparai ka wita Samaria, ka suku Benami ira mpe'ueo wita Gileadi.

²⁰ Sorodadu Isaraeli inso a mia mentinadi ira mpe'ueo witado to Kana'a hawe i Sarapati. Luwuno to Yerusale anu mewinawa a laro pontadia anu kongko i Separadi, ira mpe'ueo luwuno kota i Nege.

²¹ Luwuno anu mpongkadudui ira mpewuatako a wawo Torukuno Sioni ira mebitarao mentorukuno Esau; ka poparentaa atuu ta gagi tia-Do i Ue.