Nehemia 9 - Wunta Mempori

Mangakua hala ka petenunu a pompehohawa-Do i Ue 9:1-37

¹ Ia oleo korua pulu ka opaa wula atuu, to Isaraeli mpepumpu ka mempuasa saru mpopokona sawu po'inombo ka wita a ulu.

² Inuledo to Isaraeli mponsuao koroido inso a luwuno mia hawe. Mpentade ira ka domemangakuakono hala ka salado uempu'udo.

³ Kontongaado mpentade a mpo'iangado, binasaomo wunta Taura-Do i Ue, Ue Alado, i larono asa ntia opaa oleo, sekono asa ntia opaa oleo mbo'u, mempauo mangakudo ka mpenggolontu mesombai Ira i Ue, Ue Alado.

⁴ I Yesua, i Bani, i Kadimieli, i Sebania, i Buni, i Serebia, i Bani ka i Kenani mentade i wawono ensa po'iangado luwuno to Lewi. Ka dompebooli meroku ndi Ondae i Ue, Ue Alado.

⁵ Motaeomo i Yesua, i Kadimieli, i Bani, i Hasabineya, i Serebia, i Hodia, i Sebania ka i Petahia, luwuno to Lewi atuu, ”Impewangumo, unde-unde Iramo Ue Alamiu, inso i ndi'ipua hawe nahina tampulaano. Inunde-undeomo nee-Miu anu maramba, anu pinelangkai wawoio luwuno po'unde-unde ka pompelangkai!”

⁶ ”Butu Omiumo Ue! Ipokogagiomo langi, langi iwawono luwuno langi, saru luwuno sorodaduno, ka tolino saru luwuno anu kongko i wawono, ka tahi saru luwuno anu kongko i larono. Omiu anu motuwu ira luwuno atuu ka sorodaduno langi mesombai Komiu.

⁷ Omiumo Ue, Ue Ala anu binikiomo i Burahima ka wawao meluarako inso i Uri-Kasidimi ka moponeeo i Burahima.

⁸ Ihaweo aroano metenunu ndi Omiu ka Komiu mowutu pedandia saru onae, Komiu weeako ira inuleno witado to kana'a, to Heti, to Amori, to Perisi, to Yebusi ka to Girigasi. Umariomo I'ihiio dandi-Miu, hangano mentee Komiu.

⁹ Ikitao marasaido uempu'umami i Masiri ka rumongeo peboolido i Tahi Teberau.

¹⁰ Ipopokitaomo luwuno petondoni ka luwuno anu kinohali-haliako i arono i Pirao ka luwuno pegawaino saru luwuno palili i witano, hangano Omiu tumo'orio pompelangka-langkaido ndi ondae uempu'umami. Kanandiomo Iweweuo nee-Miu telele kana anu mengkaa oleo andio.

¹¹ Iponsiao tahi i arodo, ranta kadompokosaki telalo a motu'iano i tonga-tongano tahi. Sine luwuno anu lumulu ira Ipetadiako ira a uwoi anu ondalo kana watu a uwoi anu mongkokongiri.

¹² Saru seru-Miu Iwawa ira tempono meene, ka saru api-Miu tempono wongi wantahio sala anu linalodo.

¹³ Metii Komiu a wawo ntorukuno Sinai ka mepau saru ondae inso i langi. Ipoweeako ira luwuno atora anu moleo, luwuno songka anu mentee saru luwuno pompakosi ka luwuno parenta anu moiko.

¹⁴ Ipauako ira mbo'u oleo Saba-Miu anu mempori ka moweeako ira luwuno parenta, luwuno pompakosi ka songka-Miu molalo i Musa, tetenaa-Miu.

¹⁵ Iweeako iramo roti inso i langi kai tetadi mokoninggo ka Ipoluarakoako ira uwoi inso a nturukuno watu kai tetadi mokoranga. Itena ira mbo'u mpewinso ka mpetorokio wita anu saru sumpa Komiu weeako ira.

¹⁶ Sine ondae, uempu'umami atuu mpompelangka-langkai, memotea ulu, ka nahi domentondao luwuno parenta-Miu.

¹⁷ Nahi dobehe mentondao parenta-Miu ka nahi dompewowoloo wineweu anu kinohali-haliako anu umariomo Iweweuo i olodo. Memotea ulu ira tendeano mpedada ira mpekule a ntepe'ataa i Masiri. Sine Omiumo Ue Ala anu mo'ampuni, mompehohawa, sabara, ka nahi otu-otu pompehohawa-Do. Nahi hori binta ira.

¹⁸ Tamoako tempono dompoweweu ana nsapi tinawa ka dompotae, ’Ndiomo Ue Alamiu anu wawa komiu mpeluarako inso i Masiri’, ka mpoweweu anu tedoa mosa'o,

¹⁹ nahi Ibinta ira i pada one, hangano pompehohawa-Miu anu langkai. Seru-Miu nahi pelimba inso i wawodo tempono meene anu wawa ira a mpelempaa, kanatuu koa mbo'u api-Miu tempono wongi anu wantahio sala anu linalodo.

²⁰ Iweeako ira penaa-Miu anu moiko ka paguru ira. Ka mana-Miu mbo'u nahi ontoo domengkaano ka Ipoweeako ira uwoi kai tetadi mokoranga.

²¹ Pato pulu nta'u tehineno Ipoweeako ira kaanga i pada one. Nahina makurado, sangkado nahi mo'unsa, ka karudo nahi kamba.

²² Iweeako ira luwuno poparentaa ka tongku, ka tumiao gagi wita poparentaa, ranta ka dompetorokio witano i Sihoni, mokole i wita Hesiboni ka witano i Ogo, mokole i wita Basani.

²³ Ipokogagio anado kana hadiono anano wula i langi. Iwawa ira a wita anu Itenaako ira uempu'udo kadompewinsokio ka mpetorokio.

²⁴ Ka i'amba nana'ote atuudo mpewinsokio ka mpetorokio wita atuu. Ipokompetuudu ira to Kana'a i arodo, palilino wita atuu ka meweengakono luwuno mia atuu saru luwuno mokoledo ka luwuno tongku i wita atuu a ngkaedo, kai luwuno mia atuu doweweu ira montonda po'eheno aroado.

²⁵ Luwuno kota mebente dompoko'alao ka wita anu mewalo. Domerontuo luwuno raha anu bukeako mperupa-rupa sangka masuli olino, luwuno sumuru anu kineke, lere anggoro ka lere saitu saru luwuno keu anu mewua tedoa hadio. Mpongkaa ira memowohi ka gagi mewalo. Hadio ntu'u pepotuwudo, hangano pompehohawa-Miu anu langkai.

²⁶ Sine dome'ewaio parenta-Miu ka me'ewai Komiu. Dompebungkuio songka-Miu ka mpepate ira nabi-Miu anu mopoto'oriako ira kadompepokule ndi Omiu. Mpoweweu ira anu tedoa mosa'o.

²⁷ Ka i'amba meweengako ira a ngkaedo luwuno iwalido anu mokomasukara ira. I tempono masusaa mpebooli ira ndi Omiu ka Irongeo inso i langi. Hangano pompehohawa-Miu anu langkai, Ipoweeako ira mia anu kumadudui ira inso a ngkaeno iwalido.

²⁸ Nahi tehine mansado merodo, mpoweweu ira mbo'u mosa'o i aro-Miu. Ipeweengako ira mbo'u a ngkaedo luwuno iwalido anu mokonsii ira. Ka do'amba wali mpebooli ndi Omiu ka Irongeo inso i langi. Mararu Ipotola ira hangano pompehohawa-Miu.

²⁹ Ipopoto'oriako ira kadompepokule a songka-Miu, sine mpompelangka-langkai ira ka nahi dobehe mentondao luwuno parenta-Miu saru me'ewaio luwuno atora-Miu anu moweeako ira tuwua a mia anu weweuo. Domentandeo oweado nahi domebehe, memotea ulu ira ka nahi dobehe merongeo.

³⁰ Sine, mapata'u-ta'u mauru Komiu ndi ondae. Penaa-Miu mopoto'oriako ira molalo luwuno nabi-Miu, sine nahi domperioo, ranta ka Ipeweengako ira a ngkaedo luwu tongku i asa wawontolino.

³¹ Sine hangano pompehohawa-Miu anu langkai, nahi ropu ira ka nahi binta ira. Menteeano Omiumo Ue Ala anu puu pompehohawa.

³² Kanandio-andio, oo Ue Alamami, Ue Ala anu tedoa langkai, moroso ka mongkokongiri, anu me'ini a mpedandia ka metenunu mompehohawa, Ikitaomo luwuno masusaa anu pinembasaimami, luwuno mokole ka petewawamami, luwuno sando mpesomba ka nabimami, saru uempu'umami, luwuno bawaa-Miu, mompu'u tempo luwuno mokole i Asuri hawe oleo andio.

³³ Moleo Komiu a luwuakoano anu umalu kami. Menteano metenunu Komiu a wineweu-Miu ka omamimo anu mpoweweu hala.

³⁴ Luwuno mokole ka petewawamami, luwuno sando mpesomba saru uempu'umami nahi domeweweuo songka-Miu. Nahi domperioo luwuno parenta-Miu ka luwuno pepopoto'ori-Miu anu Iweeako ira.

³⁵ A mpotorodo gagi mokole, nahi dompesomba ndi Omiu, maupo Ipoweeako iramo hadio moikoa ka mompatindaako ira wita anu molue ka mewalo. Nahi dontepidi inso a luwuno wineweudo anu mosa'o.

³⁶ Ikitaomo, kanandio-andio omami andio ata. Mentee, omami andio ata a wita anu Iweeako ira uempu'umami ka kimperapio hasilino ka luwuno pompolia.

³⁷ Wita atuu moluarako hadio hasilino tiado luwuno mokole anu pinakosi-Miumo ndi omami, hangano luwuno halamami. Domempabawaio koroimami ka pinotuwumami montonda po'eheno aroa, ranta omami a laro masukaraa langkai.”

Wunta pedandia 9:38–10:39

³⁸ Me'empehiako luwuno andio kami mpoweweu pedandia moroso, anu binuri ka luwuno petewawamami, to Lewi saru luwuno sando mpesomba mponaakono petondoni.