Nehemia 6 - Wunta Mempori

Mo'ungke sala mepateo i Nehemia 6:1-14

¹ I Sanibala, i Tobia ka i Gesyemi to Ara atuu, saru luwuno iwalimami anu susua merongeo nine umariomo kuwali wanguo rereno bente, ranta nami hina mbo'u anu mebolo, maupo hawe i tempo atuu luwuno pewowa langkai napi kupasao tondono.

² Ka i'amba i Sanibala ka i Gesyemi mbo'u montena mia ndi ongkue saru pe'oliwi, ”Aiwa tompoweweu tepotowoa mperonga i Kepirimi, i Lembono Ono!” ka hinaano mpontoo ira mensolangi aku.

³ Ka ku'amba montena mia ndi ondae saru sangkino, ”Ongkue tekonai mo'aropi anggaa langkai ranta nahi kupoko'aiwa! Tembioke anggaa andio kai asalakono te'onto hangano aku bintao ka lumako ndi omiu?”

⁴ Hawe pepanto dompotena mia mowawa pe'oliwi kanatuu ndi ongkue ka kupoweeako ira sangkino anu mengkena.

⁵ Ka i'amba anu kopelimano, i Sanibala montena asa miano ndi ongkue saru pe'oliwi anu mengkena a laro wunta nahi tinongo a ngkaeno.

⁶ A wunta atuu teburi, ”Hinao lele angi i olodo tongku ka ipokomenteeo i Gasimu nine omue saru luwuno to Yahudi mpotoo ira me'ewa ka onaemo pu'uno kauwali wanguo bente. Ndio mbo'u montonda lele atuu inehemu gagi mokoledo.

⁷ Tamoako utiso iramo nabi kadomempaleleo mongkona omue i Yerusale, kanandio, ’Hinao asa mokole i Yehuda!’ Kanandio-andio lele kanatuu ira rumongeo mokole. Onaemo pu'uno, aiwamo tonteriso mperonga!”

⁸ Sine montena aku mia ndi onae saru sangkino, ”Mongkona anu pinaumu atuu nahi hori hina. Luwuno atuu butu lele nahi mentee inso ndi omue!”

⁹ Menteeano luwudo inehedo mpokodoito kami, pinewowolodo, ”Ira mpo'ineeo anggaa atuu ranta nahi pinoko'umari.” Sine ongkue me'o'osu aku ntu'u tompaano rosoku.

¹⁰ Ka i'amba lumako aku a rahano i Semaya anano i Delaia anano i Mehetabe'eli, hangano nahi poko'aiwa. Ipotae, ”Aiwa totepotowo a Raha-Do Ue Ala, a laro po'ianga mempori ka kumunsio luwuno tondono, hangano hinao mia ta hawe mepateko. Wongi andio ira mehawe mpepateko.”

¹¹ Kusangkio, ”Kana'umpeke mia kana ongkue andio ta molai? Mentee koake mia kana ongkue andio mewinso a laro po'ianga mempori ka kongko tuwu? Nahi aku lumako!”

¹² Kuto'orio ntu'u nine Ondae Ue Ala nahi Dotenao. Ipauo pe'oliwi-Do i Ue atuu ndi ongkue hangano i'owahio i Tobia ka i Sanibala.

¹³ Onae inowahi kakugagi doito ka ku'amba moweweu kanandio, ranta kakutehala. Hangano kanandio hinaomo pesalaado mpokomosaoo neeku ranta kadompokotata aku.

¹⁴ Oo Ue Alaku, Ipewowoloomo hapa anu wineweuno i Tobia ka i Sanibala; saru wineweuno nabi beine Noaja ka luwuno nabi susua anu ineheno mokodoito aku!

Powangua bente pinoko'umari ka podagaia i Yerusale 6:15–7:3

¹⁵ Bente atuu umari winangu a ntanggala rua pulu ka olima wula Eluli, lima pulu ka orua oleo tehineno.

¹⁶ Mansado merongeo luwuno iwalimami mongkona atuu, luwuno tongku petengi-tengimami gagi medoito. Tedoa ira memongkoko'ii ka mpokonto'orio nine anggaa atuu wineweu saru pepokowali-Do Ue Alamami.

¹⁷ I tempo mbo'u atuu luwuno mia pinemota'u Yehuda mpo'oliwi hadio wunta ndi Tobia ka domentarimao luwuno wunta inso ndi onae.

¹⁸ Menteeano hadio mia i Yehuda te'onggoako sumpa saru onae, hangano onae ponino i Sekania anano i Araki, ka i Yohanani anano, umalao anano i Mesula anano i Berekia gagi kombiano.

¹⁹ Domempopauo mbo'u luwuno moikono i Tobia i aroku ka mpohaweo luwuno pinauku ndi onae. I Tobia mbo'u mo'oliwi hadio wunta anu mokodoito aku.