Nehemia 5 - Wunta Mempori

Kabaratado palili ka pohaweno i Nehemia 5:1-13

¹ Teronge tedoa ira mengkabarata palili ka luwuno kombiado a mpe'asa to Yahudido.

² Hinao anu motae, ”Omami hadio kami saru ana ntama ka ana beinemami; asalakono kakimpohawe gandu, ka kimpongkaa ka mentuwu.”

³ Hinao mbo'u anu motae, ”Bonde ka lere anggoro ka raha, kimpegadeakono kakimpohawe gandu i tempono mokoninggoa.”

⁴ Hinao mbo'u motae, ”Omami asalakono mponsabo doi po'owahimami sima'ulu anu pinokonado mokole a bonde ka lere anggoromami.

⁵ Kanandio-andio, maupo omami andio mpe'asa rea ka ihi, saru luwuno pepaekompo pe'asa tongku ka luwuno anamami mpengkena koa saru luwuno anado, sine mansa kimpo'inee ira ana ntama ka ana beinemami gagi ata. Tamoako ba opia ira ana beinemami mansa kimpo'inee ira dompe'ue ira mia. Nahi kimpokompoweweu hapa-hapa, hangano bonde ka lere anggoromami a ngkaedomo mia susua.”

⁶ Rumongeo kabaratado ka luwuno lele atuu, gagi aku tekuda ntu'u.

⁷ Mansano kupewowoloo moi-moiko, kukuahako ira mia memota'u ka anu mempabawa. Kupotaeako ira: ”Omiumo isa'a mpo'ala riba inso a luwuno pepaekompomiu!” Umarino atuu kuweweuo terisoa langkai a bawaa ndi ondae.

⁸ Kupotaeako ira, ”Omami wela mpe'usaha ka kimpokotolosi ira pe'asa nto Yahudi anu inasa a luwuno tongku susua. Sine omiu tendeano me'asa ira pepaekompomiu, ka dome'inasa mbo'u ndi omami!” Mansa mengkomino hangano nahi dompoko'ewai ira.

⁹ Mepau aku mbo'u, ”Nahi pototono hapa anu wineweumiu atuu! Kombake asalakono imentuwu a laro doitoako Ira Ue Alato, kai ntetempu inso a mpopepaukiakodo tongku susua, luwuno iwalito?

¹⁰ Ongkue mbo'u, luwuno pepaekompoku ka miaku mposabo kamimo doi ka gandu ndi ondae. Po'ineeomo tomempahihio pasuado atuu!

¹¹ Oleo mbo'u andio pokuleako iramo bonde, lere anggoro, lere saitu ka rahado. Pasuado mbo'u imempahihiomo, onaemo doi saru gandu, anggoro ka lana anu pinesaboakomiu ndi ondae!”

¹² Mesangki ira, ”Kami koa mempokuleo ka nahi ta tinuntu hapa-hapa inso ndi ondae. Kami koa meweweuo kana anu iparentaa kami!” Umarino atuu kupoboi ira sando mpesomba ka tumena ira mia atuudo mpesumpa ka dome'ihiio dandido.

¹³ Ongkue mbo'u metapisakono lupino lembaku kakupotae, ”Kanatuumo sompo mia anu nahi ihiio dandi andio, Ira tumapisakono Ue Ala inso a rahano ka hinaweno a mpe'iseino. Kanandiomo i tinapisako ka gagi mongkokolaro.” Luwuno bawaa mpotae, ”Ami,” ka do'amba umunde-unde Ira i Ue. Palili mbo'u umihiio dandino atuu.

I Nehemia nahi po'ungke tiano koroino 5:14-19

¹⁴ Mompu'u kupinotoro gagi bupati i wita Yehuda inso a nta'u korua pulu hawe a nta'u kotolu pulu ka orua poparentaano i Aritahasasita, i larono hopulu ka orua nta'u, ongkue ka luwuno pepaekompoku nahi kihori mpo'ala kaanga anu gagi tiano bupati

¹⁵ Luwuno bupati se'eluno anu mese'elungi aku tedoa mokomobea ira palili. Luwuno bupati atuudo mpo'ala inso a mpalili pato pulu sikala salaka ilarono asa oleo tamoako kaanga ka anggoro. Tamoako miado mokonsii ira palili. Sine, nahi kupoweweu kanatuu hangano kudoitoako Ira Ue Ala.

¹⁶ Kupo'asaomo aroaku a anggaano bente atuu, maupo nahi kupohawe bonde. Luwuno miaku pinumpu i ra'ai butu hangano anggaa atuu.

¹⁷ To Yahudi ka luwuno anu mempabawa hadiono asa etu ka lima pulu mia, mpentoro mperonga a medaku, sangkadio ondae anu mehawe ndi omami inso a luwuno tongku petengi-tengimami.

¹⁸ Sompo oleo kupinatindaako asa sapi, onoo inso a asa bawaa bembe bimba anu tebiniki ka ba opia manu-manu ka mperupa-rupa anggoro anu hadio ntu'u sompo hopulu oleo. Sine i larono luwuno atuu, nahi kupo'ema kaanga anu gagi tiano bupati, hangano anggaa atuu tedoa mokomobea ira palili.

¹⁹ Ipewowolo aku, oo Ue Alaku, a moikoaku, hangano luwuno anu kuweweuako ira palili andio.