Nehemia 4 - Wunta Mempori

Petangkoro a mia anu nahi pe'eheo powangua 4:1-23

¹ Mansano rumongeo i Sanibala nine kontongaamami wali mpowangu bente, tesingkaomo tekudano ka tedoa mosa'ono. Ipasinggiri ira to Yahudi,

² ka ipotae i arodo pepaekompono ka sorodadu Samaria, ”Hapake menteeano anu wineweudo to Yahudi anu molema andio? Nde hinaoke anu pinokorosodo? Nde ira mpowawa pesombadoke? Nde ira koa mpoko'umario i larono asa oleo? Nde ira wali mpotuwu ira watu inso a howuno anu terawo anu pingkoomo mo'ai?”

³ Ka i'amba motae i Tobia to Amoni anu umpeda ndi onae, ”Maupo dowali mewanguo, sine tewala asa dahu ntobu mewuatako i wawono, tehoaomo rere watudo.”

⁴ Oo, Ue Alamami, Irongeomo kana'umpe kimempinokongkodei. Iposuleako ira ponggari-nggarido a wawo uludo ondaedo ka Ipeweengako ira kana pinomuru i wita po'iangado mia mentinawa.

⁵ Siimo Itutuwiako Ira salado ka halado si oninio inso i aro-Miu, hangano mpoweweu ira luwuno anu mompokomosa'o aroa i arodo luwuno mia anu kontongaado mpowangu.

⁶ Sine, kimewanguo mpiha bente hawe entonga mantandeno ka ranta kaitepotowo tompano, hangano luwuno tongku mpo'angga tompaano aroado.

⁷ Mansano rumongeo i Sanibala ka i Tobia saru to Ara ka to Amoni ka to Asidodi nine anggaa pokomoikono bente Yerusale atuu motilalo ka luwuno bolono bente mompu'u te'onso, onaemo kadotedoa ntekuda.

⁸ Ntepo'asa ira luwu ira mpeteaakono Yerusale ka mompokomarisu i ra'ai.

⁹ Sine, mpekakai kami ndi Ondae Ue Alamami, ka mpodagai kami meene ka wongi hangano pinogaudo.

¹⁰ Mpotae iramo to Yehuda, ”Rosodo anu mpontande watu terawo molemaomo, kahinaano watu terawo da hadio ntu'u. Nahi kami mempolio wali mewanguo bente andio.”

¹¹ Iwali mami mpopewowolo ira, ”Nahi ira mento'orio ka nahi ira mpokita hapa-hapa, ranta katomekongko i tonga-tongado, mepate ira ka mokompenaa-naao anggaa atuu.”

¹² To Yahudi anu mpo'ia umpeda ndi ondae, pempulumo dome'aiwa mpopoto'oria kami, ”Ira mensapoi kita inso a luwuno po'iangado.”

¹³ Ka ku'amba monaa palili montonda pepe'etuano a luwuno po'ianga anu lalu tetotoako inso a mpo'ianga atuu, i bungkuno bente, a luwuno po'ianga anu malua, soompo saru ponai, kansai ka pana.

¹⁴ Umarino kuparesao luwu, mentade aku ka mepau a luwuno mia memota'u, anu mempabawa ka a luwuno mia susua, ”Si medoitoako ira! Rambe Iramo i Ue anu tedoa langkai pabawa-Do ka mongkokongiri ka impeteamo tiado luwuno pepaekompomiu, ana ntama ka ana beinemiu, saru hangano kombiamiu ka rahamiu.”

¹⁵ Mansado merongeo iwalimami nine tinoodo kimento'oriomo ka nine nahi Dopokogagio Ue Ala, onaemo ka kimpekule luwu a bente, singge mia a mpo'anggaano.

¹⁶ Mompu'u oleo atuu asa ntia miaku mpo'angga ka asa ntia susuano mpo'ini kansai, kanta ka pana saru mpopake lemba labu, ka luwuno petewawa mpentade i bungkudo luwuno suku Yehuda

¹⁷ anu mpowangu bente. Luwuno mia anu mpontande ka mponteo, me'anggao anggaado asa ngkae ka kae anu susuano mo'ini sangka petea.

¹⁸ Sompo mia anu mowangu, mo'angga metampi ponai a ntongano ka i horiku mentade puu mpopuuri tawuwua.

¹⁹ Mepau akumo a luwuno mia memota'u, anu mempabawa ka a luwuno mia anu susua, ”Anggaa andio langkai ka molue, ka ntemponsia kita olai asa mia ka anu susuano a rere,

²⁰ tewala mporonge komiu unino tawuwua i asa po'ianga, impepumpumo i ra'ai tepohawea kami. Ondae Ue Alato anu meteaakita!”

²¹ Kanandiomo kime'anggao anggaa atuu, kontongaano asa ntia mia mo'ini kansai mompu'u umpeda meene hawe kaisumoo luwuno anano wula.

²² I tempo mbo'u atuu parenta andio kuweeako ira palili, ”Sompo mia saru miano asalakono mperato wongi i Yerusale, ka dompo'anggaa kami i tempono wongi, ka meene mpo'angga anggaado.”

²³ Moiko ongkue maupo luwuno pepaekompoku, miaku ka luwuno puu mpodagai anu tumonda aku, luwumami nahi kintengko'ala melohuo sangkamami. Sompo mia mo'ini parewa mpetea a ngkae koanano.