Nehemia 3 - Wunta Mempori

Luwuno mia anu tewinso a mpowangua 3:1-32

¹ Sando mpesomba Langkai i Eliasi ka luwuno sando mpesomba, pepaekompono, mpompu'u ira wali mewanguo Pewowa Langkai Bimba, meronsoo ka mempasao luwuno pewowano. Domeronsoo hawe a Menara Asa etu, tendeano hawe a Menara Hanane'eli.

² To Yeriko mpowangu umpeda ndi ondae ka i Sakuri anano i Imiri mowangu mbo'u umpeda ndi ondae atuu.

³ Pewowa Langkai Bou, domewanguo inuleno i Sena'a. Domenaakono luwuno sobono ka i'amba pinasa luwuno pewowano saru luwuno pelansoano ka lansono.

⁴ Umpeda ndi ondae, i Meremoti anano i Uria anano i Hakosi mompokomoiko ka umpeda ndi onae, i Mesulami anano i Berekia anano i Mesesabe'eli mompoko moiko mbo'u. Umpeda ndi onae, i Sadoki anano i Ba'ana mompokomoiko,

⁵ ka umpeda ndi onae, ondae to Tekoa mompoko moiko mbo'u. Sine luwuno mia memota'udo nahi domebehe mpompokowali a anggaano uedo.

⁶ Pewowa Langkai Se'elu ipokomoikoo i Yoyada anano i Pasea ka i Mesula anano i Besoja. Domenaakono luwuno sobono ka i'amba pinasa luwuno pewowano saru luwuno pelansoano ka lansono.

⁷ Umpeda ndi ondae, i Melasa to Gibeoni, ka i Yadoni to Meronoti mompokomoiko saru luwuno to Gibeoni, ka Misipa anu mekongko a mpinabawaino bupati wita i sumooano oleo Koro Eparata.

⁸ Umpeda ndi ondae, i Usieli anano i Haraya, asa mia puu mpo'angga wulaa, mompokomoiko, ka umpeda ndi onae, i Hanania, asa mia puu mpoweweu mina-mina mompoko moiko mbo'u. Ondae mpokorosoo Yerusale hawe a Bente Molue.

⁹ Tepo'umpeda saru ondae i Repaya anano i Huri anu pabawaio Yerusale anu asa ntia, mompokomoiko.

¹⁰ Umpeda ndi onae, i Yedaya anano i Harumapi mompokomoiko, kona i arono rahano, ka umpeda ndi onae, i Hatusi anano i Hasabineya mompokomoiko mbo'u.

¹¹ I Malakia anano i Harimi ka i Hasubi anano i Pahati-Moabi mompokomoiko anu susuano ka Menara Ponahua.

¹² Umpeda ndi ondae, i Salumi anano i Halohesi anu pabawaio asantia Yerusale anu susua mompokomoiko saru luwuno ana beineno.

¹³ Pewowa Langkai Lembono ipokomoikoo i Hanuni ka palili i Sanoa. Dowali mewanguo ka mempasao luwuno pewowano saru luwuno pelansonao ka lansono. Dompokomoikoo mbo'u bente anu ondauno asa nsowu hiku hawe a Mpewowa Langkai Rompo.

¹⁴ Pewowa Langkai Rompo ipokomoikoo i Malakia anano i Rekabi anu pabawaio Beti-Keremi. Iwali wanguo ka pasao luwuno pewowano saru luwuno pelansoano ka lansono.

¹⁵ Pewowa Langkai Mata Uwoi ipokomoikoo i Salumi anano i Kolose anu pabawaio Misipa. Pewowa Langkai atuu iwali wanguo, i'atoo ka ipasao luwuno pewowano saru luwuno pelansoano ka lansono. Ipokomoikoo mbo'u rere watuno limbo popumpua uwoi, umpeda bondedo mokole hawe a luwuno ensa anu montindulu inso i kota Daudi.

¹⁶ I horino i Nehemia anano i Asibuki anu pabawaio asa ntia Beti-Suri, mompokomoiko hawe i arono pekaburuano i Daudi ka hawe a limbo wineweu, ranta hawe a rahado pongkiari.

¹⁷ I horino i Rehuni anano i Bani, to Lewi, mompokomoiko rere, ka umpeda ndi onae, i Hasabia anu pabawaio asa ntia Kehila anu asa, mompokomoiko witano.

¹⁸ I horino pompokomoikoa domeweweuo luwuno pepaekompodo: i Binui anano i Henada, anu pabawaio entongano wita Kehila anu susuano;

¹⁹ umpeda ndi onae i Eseri anano i Yesua anu pabawaio Misipa, mompokomoiko anu tudano i arono porakea a goda sangka petea, umpeda Siuno;

²⁰ i horino i Buruki anano i Sabai mompokomoiko anu tudano, inso a nsiuno hawe a mpewowa mewinso a rahano Sando mpesomba Langkai Eliasi;

²¹ i horino, i Meremoti anano i Uria anano i Hakosi, mompokomoiko anu tudano, inso a mpewowa mewinso a rahano i Eliasi hawe i tompano rahano.

²² I horino luwuno sando mpesomba, luwuno mia inso i Lembono Yarade, mpopokomoiko.

²³ I horino i Benami ka i Hasubi, mompokomoiko i arono rahado. I horido, i Asaria anano i Ma'aseya anano i Anania mompokomoiko i horino rahano.

²⁴ I horino i Binui anano i Henadadi, mompokomoiko anu tudano, inso a rahano i Asaria hawe a nsiuno rere.

²⁵ I Palali anano i Usai mompokomoiko i arono Siuno ka i arono menara ondau anu kontasi-tasi i wawono langkanaeno mokole, umpeda kintala podagaia. I horino i Pedaya anano i Parosi mompokomoiko rere

²⁶ hawe i arono Pewowa Langkai Uwoi i sabaano oleo ka i arono menara anu kontasi-tasi. Ka luwuno anu mpopekakaako a Raha-Do Ue Ala mpo'ia i Opeli.

²⁷ I horino i Pedaya to Tekoa mpokomoikoo anu tudano, inso i arono menara langkai anu kontasi-tasi atuu hawe a bente Opeli.

²⁸ Mompu'u inso a Mpewowa Langkai Ngara luwuno sando mpesomba mompokomoiko, singge mia i arono rahano.

²⁹ I horido i Sadoki anano i Imere mompokomoiko i arono rahano. I horino i Semaya anano i Sekania, puu mpodagai Pewowa Langkai Sabaano oleo.

³⁰ I horino i Hanania anano i Selemia ka i Hanuni anano i Salapi anu ko'onoo, mompokomoiko anu tudano. I horido i Mesulami anano i Berekia mompokomoiko i arono bolongkono

³¹ I horino i Malikia asa mia pande mo'angga wulaa mompokomoiko hawe a rahado anu mpopekakaako a Raha-Do Ue Ala ka mia mpebalu-balu i arono Pewowa Langkai Peburia ka hawe a bolongko i wawono a nsiuno.

³² Ka i'amba olono bolongko i wawono a nsiuno ka Pewowa Langkai Bimba, luwuno anu puu mpo'angga wulaa ka puu mpebalu-balu mompokomoiko rere.