Nehemia 2 - Wunta Mempori

I Nehemia tinena lumako i Yerusale 2:1-10

¹ Ia wula Nisani ta'u korua pulu poparentaano mokole Aritahasasita, mansano pingkoomo anggoro, ku'alao anggoro atuu ka kuweeako ira mokole. Se'eluno nahi kuhori tengkita mompemasusa i arodo mokole,

² onaemo kadopesikeno ndi ongkue, ”Tembio rupamu kaimasusa, kahinaano komba mahakiko? Manasaomo masusa aroamu.” Ongkue mbo'u gagi tedoa doito.

³ Kusangki ira mokole, ”Tuwu komiumo mokole ranta nahina tampulaano! Kana'umpe rupaku nahi ta mompemasusa, tewala kota, pekaburuado uempu'uku, gagiomo terawo-rawo ka luwuno pewowa langkai pingko ikaano api?”

⁴ Dopotae mokole ndi ongkue, ”Hapa anu inehemu?” Mekakai akumo ndi Ondae Ue Alano asa wawo langi,

⁵ ka kusangki ira mokole, ”Tewala ipemoikoo mokole ka i'eheakono atamiu andio, itena akumo lumako i Yehuda, a ngkota pekaburuado uempu'uku, ka kuwali wanguo.”

⁶ Ka do'amba mesikeno mokole ndi ongkue, kontongaano kombiado mokole mentoro i horido, ”Opia tehineno pelempaamu, ka te'ipia upekule?” Dopemoikoo mokole tumena aku, umarino kupompakosi tempo ndi ondae.

⁷ Kupepauako iramo mokole, ”Tewala ipemoikoo mokole, iwee akumo luwuno wunta tiado luwuno bupati i wita asatowano koro Eparata, ka dome'eheakune telalo ranta kakuhawe i Yehuda;

⁸ asa mbo'u wunta tiano i Asapi, puu mpodagai tobudo mokole, kai powee aku keu kaipinasa luwuno sobo a luwuno pewowa langkaino bente umpeda Raha Mempori, a benteno kota ka a raha anu ta po'iangaku.” Po'emaku atuu do'induo mokole, hangano kae moiko-Do Ue Alaku kumadudui aku.

⁹ Ka ku'amba aiwa a luwuno bupati i asatowano koro Eparata ka meweengakono luwuno wuntado mokole. Ondae mokole tumena ira tadulako sorodadu ka sorodadu mpengara tumonda aku.

¹⁰ Rumongeo mongkona atuu, i Sanibala to Horoni ka i Tobia to Amoni, puu mpopekakaakodo mokole, tedoa tekuda hangano hinao mia anu hawe mo'ungkeako ira manangaiado to Isaraeli.

Mompo'asa aroa wali wanguo bente Yerusale

¹¹ Hawe akumo i Yerusale. Umarino otolu oleo i ra'ai,

¹² mewangu aku tempono wongi saru ba opia mia koa anu tumonda aku. Nahi kupauo maupo ndi semamokoa posongkapi anu Dowee aku Ue Alaku a laro aroaku anu aku weweuo tiano Yerusale. Tendeano nahina maupo te'asa pinotuwu perongaku sangkadio anu kupesawikio.

¹³ Tempono wongi atuu meluarako aku telalo a Mpewowa Langkai Lembono te'aro a Mata Uwoi Naga ka Pewowa Langkai Rompo. Kuparesao ntu'u luwuno bente Yerusale anu hinoaomo ka luwuno pewowa langkaino anu pingko ikaano api.

¹⁴ Ka ku'amba motilaloakono pelempaaku a Mpewowa Langkai Mata Uwoi ka a Limbodo mokole. Hangano pinotuwu pesawiaku nahi pokolaloo po'ianga atuu,

¹⁵ mewuatako aku i wawono telelo a ngkorono mo'are i tempono wongi ka paresao ntu'u bente atuu. Ka ku'amba mekule ka mewinso telalo a Mpewowa Langkai Lembono. Kanandiomo kupekule.

¹⁶ Luwuno anu mempabawa nahi domento'orio ba isua kulako ka hapa anu kuweweuomo, hangano ranta kanandio-andio napi kupompau maupo hapa a nto Yahudi, moiko a luwuno sando mpesomba, a luwuno mia memota'u, a luwuno anu mempabawa, maupo a luwuno anu mpo'angga susuano.

¹⁷ Ka ku'amba mepau ndi ondae, ”Imengkitao urasa'o anu pinembasaito: Yerusale gagiomo terawo-rawo ka luwuno pewowa langkaino mo'aiomo. Aiwa, katowali mewanguo bente Yerusale, kasi topinokongkodei mbo'u.”

¹⁸ Tempono kupauako ira, tedoa moiko kae-Do Ue Alaku anu dumagai aku ka hapa anu pinaudo mokole ndi ongkue, mpotae iramo, ”Kami mpepatinda mpowangu!” Umarino atuu mpompu'u iramo meweweuo anggaa moiko atuu a tompaano rosodo.

¹⁹ Rumongeo mongkona atuu, i Sanibala to Horoni, ka i Tobia to Amoni puu mpopekakaakodo mokole, saru i Gisiemi to Ara, mempasinggiri kami ka mpokongkodei kami. Dompotae, ”Hapa anu wineweumiu atuu? Nde komiu umewai ira mokole?”

²⁰ Kusangki ira, kupotae, ”Ondae Ue Alano asa wawo langi, Ondaemo anu weweu kami mpokoweweuo! Omami, luwuno tetenaa-Do mpepatinda kamimo kami mpowangu. Sine omiu nahina tiamiu ka nahi komiu merinambe i Yerusale!”