Nehemia 13 - Wunta Mempori

Petenununo i Nehemia a songka

¹ I tempo atuu wuntano i Musa binasa kadomerongeo palili ka hinawe teburi i larono, nine nahi ta hori hina to Amoni ka to Moabi anu inehe mewinso bawaa-Do Ue Ala.

² Hangano nahi domentotowoako ira roti ka uwoi to Isaraeli, tendeano tumamboo i Bileami umewai ira to Isaraeli ka itotonaa ira. Sine Ondae Ue Alamami balio totonaa atuu gagi ronso.

³ Mansado merongeo Taura atuu binasa, domponsia ira luwu anu komba to Isaraeli ntu'u.

⁴ Se'eluno pinotoroomo sando mpesomba i Eliasi dumagaio luwu bolongko a Raha-Do Ue Alamami. Onae hinao penggoeano moroso saru i Tobia,

⁵ ka ipatindao asa bolongko langkai tiano i Tobia. I ndi'ipua a bolongko atuu, mia mpowawa pesomba kaanga, dupa, luwuno parewa ka pesomba tia hopulu, onaemo gandu, anggoro ka lana anu gagi tiado to Lewi, luwuno puu mpenani ka puu mpodagai pewowa langkai, saru pesomba pinesusua tiado sando mpesomba.

⁶ Tempono igagi luwuno atuu, nahi kukongko i Yerusale, hangano ia ta'u kotolu pulu ka orua poparentaano i Aritahasasita, mokole i Babeli, lumako aku me'aro ndi ondae mokole. Sine mansano ba'opia tempo, ku'emao ndi onae mokole aku mekule.

⁷ Hawe akumo i Yerusale ka kukitao mosa'oa anu wineweuno i Eliasi, mompatindaakono i Tobia asa bolongko a kintalano Raha-Do Ue Ala.

⁸ Mosa'oku ntu'u, onaemo ka kupetadiakono luwu parewa rahano i Tobia i bungkuno bolongko atuu.

⁹ Ka ku'amba metena mokomemporio bolongko atuu. Umarino atuu kupokule ira i ra'ai luwuno parewano Raha-Do Ue Ala, pesomba kaanga ka dupa.

¹⁰ Kuto'orio mbo'u nine luwuno pompowee tiado to Lewi nahi dohori mewineeako, ranta to Lewi ka luwuno puu mpenani anu mpo'angga mpolai melako a leredo.

¹¹ Kukuahako ira anu mempabawa, kupotae, ”Tembio ka ipino'inee Raha-Do Ue Ala?” Ka ku'amba pumpu ira to Lewi ka wali numaa ira a mpo'iangado.

¹² Luwuno to Yehuda wali ira mbo'u mpowawa pesomba tia hopulu, onaemo gandu, anggoro ka lana a ponaapa arataa.

¹³ Kupotoroo sando mpesomba i Selemia ka i Sadoki, asa mia anu tedoa pande a wunta, saru i Pedaya asa to Lewi gagi puu mpodagai ponaapa arataa, sekono i Hanani anano i Sakuri anano i Matania tinena mokowali ira, hangano mia atuudo kinita mpetenunu. Ondae mpinoweeako anggaado montiaako ira luwuno pepaekompodo anu gagi tiado.

¹⁴ Oo Ue Alaku, Ipewowolo akumo hangano mongkona atuu, ka sii pahihio luwuno petenunu anu kuweweuomo tiano Raha-Do Ue Alaku ka luwuno anu wineweu i larono!

¹⁵ I tempo atuu kukitao i Yehuda mia mpolanda anggoro a oleo Saba ka mia mpowawa gandu tine'u, anggoro, wua anggoro, wua ara ka dome'ulao a ngkalide saru mperupa-rupa inula anu winawa i Yerusale ia oleo Saba. Kupopoto'oriako ira tempono dompo'asa kaanga.

¹⁶ To Tirusi anu mpo'ia i tu'ai mpowawa bou ka mperupa-rupa sangka asaa, ka dome'asao atuu a nto Yehuda ia oleo Saba i Yerusale.

¹⁷ Ka ku'amba kumuahako ira mia pinemota'u i Yehuda, kupotaeako ira, ”Mosa'oa hapa anu wineweumiu andio umewaio memporino oleo Saba?

¹⁸ Komba mpoweweu iramo kanandioke uempu'umiu, ranta Ka Dopotiio Ue Alato luwuno masolaa andio ndi ontae ka a ngkota andio? Impokolangkaio tekuda-Do a nto Isaraeli ime'ewaio memporino oleo Saba.”

¹⁹ Mansano luwuno pewowa langkai i Yerusale ikolimbuo seru ngkiniwia tamo mewinso a oleo Saba, metena aku ka itinondo luwuno pewowa atuu ka nahi inungkahi hawe kaitampula oleo Saba. Kunaa ira ba'opia miaku a luwuno pewowa langkai, kasihina balu-balu anu winawa mewinso a oleo Saba.

²⁰ Ka i'amba mia mpebalu-balu ka mpo'asa mperupa-rupa sangka, mperato ira i bungkuno bente i Yerusale, pohona ke pendua.

²¹ Umarino atuu kupopoto'oriako ira, kupotae, ”Tembio kai mperato i arono bente? Tewala pohona mbo'u imeweweuo atuu, aku motiio kaeku ndi omiu.” Mompu'u i tu'ai nami domehawe mbo'u a oleo Saba.

²² Kutena ira mbo'u to Lewi mokomemporio koroido ka me'aiwa medagaio luwuno pewowa langkai kai pinokomempori oleo Saba. Oo Ue Alaku, Ipewowolo akumo hangano mongkona mbo'u atuu ka Ipehohawa akumo montonda petenunu ka pompehohawa-Miu anu langkai!

²³ I tempo atuu kukitao mbo'u nine ba'opia ira to Yahudi mpekombiaako beinedo to Asidodi, Amoni ke Moabi.

²⁴ Asa ntia inso a luwuno anado mpepau Asidodi. Nahi dompokompepau to Yahudi, butu mpokompepauako paudo tongku susua.

²⁵ Kutata ira ka kutotonaa ira. Ba'opia mia i olodo kutunduhio ka kubutao wuuno, ka ku'amba tumenao mesumpa a nee-Do Ue Ala, kanandio, ”Sii ntu'u impeweengako ira ana beinemiu domengkombia ira ana ntamado ke mpo'ala ana beinedo gagi kombiado ana ntamamiu ke tiano koroimiu!

²⁶ Komba hangano anu kanatuuke i Salomo, mokole i Isaraeli moweweuomo hala? Maupo i olono hadio ntu'u tongku nahina mokole kana onae, anu pinehohawa-Do Ue Alano ka Ondae Ue Ala atuu motoroo gagi mokole a luwuno Isaraeli, sine onae tewawaomo a laro hala hangano luwuno beinedo mia hawe atuu.

²⁷ Nde asalakono kadomerongeo miake nine omiu mbo'u mpoweweu mosa'oa anu langkai atuu, mpoweweu nahi mpetenunu ndi Ondae Ue Alato hangano mpekombiaako beinedo mia hawe?”

²⁸ Asa mia i olodo anano i Yoyada anano i Eliasi, sando mpesomba atuu, onaemo ponino i Sanibala, to Horoni. Onaemo pu'uno kusaario inso i aroku.

²⁹ Oo Ue Alaku, Ipewowoloomo kana'umpe domensosa'aio pompe'ala-ala saru pedandia mongkona pompe'ala-ala ka luwuno to Lewi.

³⁰ Kupokomempori ira inso a luwuakoano anu wo'ohu napi tino'ori ka pakosio luwuno anggaado sando mpesomba ka to Lewi, singge mia a mpo'anggaano.

³¹ Kupakosio mbo'u asa pesalaano mompatinda keu ponahu a luwuno tempo anu pinakosi ka a luwuno wua amba-ambano. Oo Ue Alaku Ipewowolo akumo a laro ntumuwuku!