Nahumi 3 - Wunta Mempori

Pohuku a Niniwe 3:1-19

¹ Masolaomo kota po'uwua rea atuu! Luwuno butu pegaupi, bukeako porontua, ka nahi penaa-naa pomperangkamia!

² Rongeo, unino ponsepi! Rongeo, unino pelempano roda! Ngara melulu mongkopa-kopa, ka rerendeno kareta!

³ Sorodadu mpengara mposapoi, ponai kolanga-langa ka kansai tesosangkilo! Hadio anu pinepate ka wata ngkoroi anu moboo tehowu! Wata ngkoroi nahi hori pingko, mia mbo'u tetidu a wata ngkoroi atuudo!

⁴ Tedoa hadio pebelesua inso a beine belesu, tekosino minosisiriako ka pande alaro monsihiri, a mpebelesuno ipopandei ira luwuno tongku ka tino'orino a luwuno pe'etu.

⁵ Kitao, Aku umewaiko, kanandiomo pau-Do Ueno luwuakoano; Aku sumungkeo tapu hawumu hawe a rupamu ka mopokitao pomaliamu a luwuno tongku ka wineweumu mosa'o a luwuno poparentaa.

⁶ Aku metadiakono mokoburumu i wawomu, weweuko tekoko'ii ka gagi pengkitaa.

⁷ Luwuno anu kumitako ta molai bintako ka ipotae, ”Niniwe terawoomo! Isemake anu ta sumabangio? Inso isuake aku mo'ungke pontarerono?”

⁸ Mentee ke omue moikoopo sekono Tebe, kota lahumoado to Amoni, anu mpo'iangano i koro Nili, ka uwoi lumimbuo, tahi kana rereno, ka uwoi kana benteno?

⁹ Etiopia ka Masiri rosono, anu nahina tidano; To Puti ka to Libia onaemo anu tumulungio.

¹⁰ Sine onae isa'a ta mewinso a pontadia, lumako kana mia tinawa. Luwuno nana'otedo mbo'u ta pinirego a tompano luwuno sala; a luwuno mia pinemota'uno tinende undi, ka luwuno anu langkai potorono pinonguako rante.

¹¹ Omue mbo'u komolangu, ka asalakono mewuni; omue komo'ungke mbo'u pepekaduduia inso a iwali.

¹² Luwuno pekorahakomu kana keu ara saru wuano amba-ambano; tewala rinensua rontaomo a laro nganga anu kumaano.

¹³ Kitaomo sorodadumu atuu, ondae beine i tonga-tongamiu! Luwuno pewowa langkaino witamu te'ungkahi molue a iwalimu; pingko ikaano api lansono pewowamu.

¹⁴ Tambuomo uwoi umaropio pongkadua, pokorosoomo luwuno pekorahakoamu! Lolandaomo wita tengawu, lolandaomo wita pulu, iniomo poweweua watu tela!

¹⁵ I ra'ai api ta pingko kumaako, ponai ta batukiko, ta kumaako kana kosume mpelonso. Pokohadioomo koroimu kana kosume mpelonso, pokohadioomo kana kosume mpelimba!

¹⁶ Omue mokohadio ira mia mpebalu-balumu lumaloio anano wula i langi, sine kana kosume mpelonso domewileo panido ka mpenee memoliu.

¹⁷ Luwuno puu mpodagaimu kana kosume mpelimba ka luwuno pegawaimu kana pebawaano kosume, ntetopa ira a rere i tempono morini, mansano saba oleo, mpolai ira moliu, nahi tino'ori lakoado.

¹⁸ Tedoa ira ntekoturi puu mpopakambimu, hei mokole Asuri! Luwuno mia pinemota'umu ntekoturi, sorodadumu ntesiarawo a luwuno torukuno, ka nahina anu pumpu ira.

¹⁹ Nahina pakulino tepolindumu, nahi tepakuli mobelamu. Luwuno anu rumongeo lelemu dompontopa-topaakomu; Hangano isemake nahi aluo poweweumu mosa'o anu nahina penaa-naaano?