Nahumi 2 - Wunta Mempori

¹ Puu mperumpa aiwa ndi omue; dagaiomo bente, tangkoroomo sala, peboo ntongamo temoroso, pumpuomo luwuno rosomu!

² Menteeano, Ondae i Ue Ira momuleakono marambano i Yako, kana marambano Isaraeli; hangano puu mporontu umari iramo merontuo ka mpepateo luwuno sampano.

Iwali sumolangio Niniwe 2:3-13

³ Kantado puu mpetea motaha, sorodaduno mpesangka motaha kirimisi; kareta tesosangkilo kana langano api pehulu ia oleo pepatindaano, ka luwuno ngara mpelonso-lonso medanggara.

⁴ Kareta magasi ntu'u a nsala, mpepolu-polulu a ntanalapa; tengkita kana langano api, mompalari kana koliki.

⁵ Luwuno puu mpetea mpinerorohino irambeo, sine tetidu ira domelako; mpopari-pari ira mpelulu te'aro a rere watuno kota, sekono parewa perumpa pinontadeomo.

⁶ Luwuno pewowano korono inungkahiomo, ka langkanae gagi ntewuka.

⁷ Pinakosiomo: Kota atuu linolohi ka winawa, luwuno atano beine mpopau masusano aroado kana u'unino marapatii saru mpontopa-topa rada.

⁸ Niniwe kana limbo uwoi ka uwoino melulu meluarako. ”Penaa-naa! Penaa-naa!” peboolido mia, sine nahina anu mewolili.

⁹ Pomuruomo salaka, pomuruomo wulaa! Hangano nahi hori pingko arataa pinatinda, hadio ntu'u sangka masuli olino!

¹⁰ Londa, telondahi ka pompokotampulaa! Aroa gagi telusa ka oluntuu telelu! Tonga mokalu luwu, ka rupano luwuno mia momite ntu'u.

¹¹ Isuamo pewuniado singa ka kunepodo singa mongura, po'iangado singa mpekule-kule, po'iangano anano singa, ba isua nahina rumerenggotio?

¹² Mararu singa atuu momperangkami ka isompo kaangado anano, montolonggeo pinerangkamino tiado wainono, ka aano ibuketiakono kaanga ka pinerangkamino a mpewuniano.

¹³ Kitao, Aku gagi iwalimu, kanandiomo pau-Do Ueno luwuakoano, Aku tumunuo karetamu gagi ahu, ka ponai ta pingko kumaano singa monguramu; Aku mokotampulao kaangamu inso i wawontolino, ka pepaudo tinenamu nahi ta teronge mbo'u.