Nahumi 1 - Wunta Mempori

Puu mpau 1:1

¹ Pinau-Do anu mempori mongkona Niniwe. Wunta pongkitano i Nahumi, to Elikosi.

Tekuda-Do i Ue 1:2-8

² Ondae i Ue atuu Ue Ala anu meposiri ka puu mpombalo, Ondae i Ue atuu puu mpombalo ka bukeako tensilano tekuda, Ondae i Ue atuu puu mpombalo a luwuno anu umewai Ira ka monaa aroa a luwuno iwali-Do.

³ Ondae i Ue atuu tedoa sabara ka langkai pabawa-Do, sine tedoa ntu'u nahi Dopotola ira mia mensala inso a mpohuku. Ondae i Ue melempa a laro lompiu ka angi mokora pelempa-Do ka seru onaemo awu a pelengkaru-Do.

⁴ Dotekudaakono tahi ka mokomotu'io, ka luwuno korono Doweweuo mo'are. Basani ka Karameli gagi londa ka bunga Libano gagi moleu.

⁵ Luwuno torukuno melelu i aro-Do, ka luwuno pongku loono. Tolino tetande i aro-Do, wawontolino saru luwuno palilino.

⁶ Isema mokompentade umaropio tekuda-Do? Ka isema mokompeteao tekuda-Do anu tensila? Tensilano tekuda-Do te'uwu kana api, ka luwuno torukuno watu ntebangku hangano Ondae.

⁷ Ondae i Ue atuu moiko; mepekadudui i tempono masusaa; Doperio ira mia anu mepekadudui ndi Ondae

⁸ maupo a laro mowo anu umaluo. Dopingko ira ntu'u po'iangado anu me'ewa, ka iwali-Do Dosaario a laro wongi-wongi.

Pau-Do i Ue ndi Yehuda ka Niniwe 1:9–2:2

⁹ Maupo hapa anu tinoomiu umewai Ira i Ue, Ira koa pingkoo luwu; masusaa nahi ta me'umbaako anu kompenduano!

¹⁰ Hangano, maupo ondae kana enano rui, ka mpo'inu kana mia wela molangu, ira pingko mengkinaa kana seami mokari.

¹¹ Kombake inso ndi omue me'umbaako mia anu montoo mosa'oa umewai Ira i Ue, mia anu mompatudu lambaha?

¹² Kanandiomo pau-Do i Ue, ”Maupo domekongko luwu ka mehadio ira, ta pingko luwu memate. Maupo Kupokokongdeikomo, nahi Aku mokongkodeiko mbo'u.

¹³ Kanandio-andio, Aku puduo pasangano inso a oweamu, ka umotuhio luwuno pongumu.”

¹⁴ Dopakosiomo i Ue mongkona omue, ”Nahi ta hina mbo'u inule mompake neemu. Inso a rahano pinesombaimu susua Aku mokotampulao tinaha pesomba pina'o ka tinaha pesomba tinawa; kaburumu Aku patindao, hangano nahina tudumu.”

¹⁵ Kitaomo! A wawo luwuno torukuno pelempaado mia anu mpowawa lele, anu mpopalele rodoa ka manangaia. Rame-rameomo oleo langkaimu, oo Yehuda, owahiomo pontangamu! Hangano nahi ta hina mbo'u mia lambaha sumapoiko; onae pinokotampulaomo mpiha!