Mika 7 - Wunta Mempori

Ponsabangi hangano mosa'ono gaudo to Isaraeli 7:1-6

¹ Masola akumo ntu'u! Hangano teweweuku kana puu mpobini wua umarino popumpua wua tempono motu'i-tu'i, umarino po'opua mbo'u wua anggoro: nami hina mbo'u wua anggoro ta kinaa, ke wua ara anu ineheku.

² Mia mpope'ala-ala tampulaomo i witano, ka nami hina mbo'u mia moleo i olodo mia. Ondae luwudo mponsikori rea, singge mia mo'ohoako buani pe'asa miano.

³ Kaedo pande ntu'u mpoweweu mosa'o; petewawa motuntu tambo, puu mpobitara montarima pompowee nahi pototo; Anu langkai potorono mompowee pomputusi po'eheno aroano, ka luwuno domemposuleo!

⁴ Mia anu lalu moiko i olodo kana ewo rui, anu lalu moleo i olodo kana wala rui. Haweomo oleono a luwuno puu mpopadasomu, oleo pohukuamu. Kanandio-andio ta gagi tewukaa i olodo!

⁵ Si mpe'ala-alao walimu, si pomperorohi a nsambe'e! Dagaiomo wiwimu, tamoako a beine anu mepombole a mpa'amu!

⁶ Hangano ana ntama mompokongkodei amano, ana beine mentade umewaio ineno, poni beine umewaio ine mponino; iwalino aasa mia onaemo luwuno mia asa laro rahano.

Pomperorohi moleoa tiano Yerusale 7:7-13

⁷ Sine ongkue andio sumisikori Ira i Ue, momperorohi ndi Ondae Ue Ala anu kumadudui aku; Ondae Ue Alaku Ira rumonge aku!

⁸ Si po'undeakune, hei iwaliku! Maupo kutebangku, aku koa mewangu mbo'u, maupo kupentoro a laro wongi-wongi, Ondae i Ue onaemo wantaku.

⁹ Aku tumembio tekuda-Do i Ue, hangano tehala akumo ndi Ondae, ranta ka Do'ungkeakono kara-karaku ka tumeahakono moleoa ndi ongkue. Ira wawa aku a mewantaano, ka kukitao moleo-Do.

¹⁰ Iwaliku ta kumitao ka mokoko'iio ta lumimbuo anu mepau ndi ongkue, ”Isua Ira i Ue, Ue Alamu?” Mataku ta kumitao; kanandio-andio onae linolanda kana rege a nsala.

¹¹ Ta hawe oleono rere watumu wali winangu; ia oleo atuumo petidaamu ta pinokomolue.

¹² Ia oleo atuu mia ira mpe'aro ndi omue inso i Asuri ka luwuno kota i Masiri, inso i Masiri hawe a ngkoro Eparata, inso a ntahi hawe a ntahi, inso a ntorukuno hawe a ntorukuno.

¹³ Sine witado ta gagi boni-boni, hangano palilino gagi wuano wineweudo.

Pekakai mo'ema pabawa ka pompehohawa-Do Ue Ala 7:14-20

¹⁴ Bawaa-Miu Ipakambiako iramo tuko-Miu, bawaano bimba lano Omiu ueno, anu mo'ia asa-asano a laro ntobu i tonga-tongano lere wua ngkeu. Po'ineeomo domengkaano ewo i Basani ka i Gileadi kana i tempono ndi'ipua.

¹⁵ Kana i tempono upeluarako inso i Masiri, Aku mopokitao a bawaa-Ku luwuno kinohali-haliako!

¹⁶ Po'ineeomo luwuno tongku mengkitao mongkona atuu ka gagi mongkoko'iiako luwuno mosiado. Po'ineeomo dometompoakono kae ngangado, ka birido gagi mobongo.

¹⁷ Po'ineeomo domposile'i pampawu kana ule, kana kondehora melele i tolino; po'ineeomo dompeluarako saru mpondende inso a mpekorahakodo, ka me'aiwa ndi Ondae i Ue, Ue Alamami, saru mpondende; po'ineeomo ka domedoito ndi Omiu!

¹⁸ Isemake kana Omiu Ue Ala anu mo'ampuni hala, anu nahi pompototoi salado toreano bawaa anu lano Ondae me'ueo, ka nahi kongko mpiha a laro ntekuda-Do, tendeano umehe mokomengkaao petenunu pompehohawa?

¹⁹ Po'ineeomo Dowali mehohawa kita, pahihio luwuno salato ka metadiakono luwuno halato a laro luwuno wingke ntahi.

²⁰ Po'ineeomo Ipopokitao petenunu-Miu ndi Yako ka pompehohawa-Miu ndi Burahima kana anu Idandiomo saru mesumpa ndi ondae uempu'umami mompu'u i ndi'ipua!