Mika 6 - Wunta Mempori

Potuntu-Do i Ue a bawaa-Do 6:1-16

¹ Rongeomo hapa anu pinau-Do i Ue, pentademo, pauomo potuntumu i arono luwuno torukuno ka po'ineeomo luwuno pongku rumongeo pepaumu!

² Rongeomo, oo luwuno torukuno potuntu-Do i Ue, ka ta'oomo biri, oo luwuno empehino tolino! Hangano Ondae i Ue hinao potuntu-Do a bawaa-Do, ka Ondae mekara-kara saru Isaraeli.

³ ”Bawaa-Ku, hapake anu Kuweweuomo ndi omue? Saru hapake Kupokomokendoakomu? Sangki Akumo!

⁴ Menteeano Ongkuemo anu tumaateko meluarako inso i wita Masiri, motolako inso a raha tepe'ataa ka tumenao i Musa wawako, saru i Haruni ka i Miriami.

⁵ Bawaa-Ku, impewowoloomo hapa anu tinoono i Balaki, mokole i Moabi, hapa sangkino i Bilea anano i Beori ndi onae ka pelempaa inso i Sitimi hawe i Giliga, ka upokonto'orio luwuno wineweu-Do i Ue anu moleo.”

⁶ ”Saru hapake bakanaano kulako me'aro ndi Ondae i Ue ka menggolontu mesomba ndi Ondae Ue Ala anu a mantandeano? Asalakono ke aku lumako me'aro ndi Ondae saru pesomba tinunu, saru ana nsapi anu tinuwuno asa nta'u?

⁷ Dopekonao i Ue ke a nsowuno bimba lakino, a pulu nsowu lana tinawa? Asalakono ke kupesombaakono anaku anu aka hangano salaku ka ana ngkoroiku hangano halaku ongkueku?”

⁸ ”Oo mia, umariomo upinauako hapa anu moiko, ka hapa anu tinuntu-Do i Ue inso ndi omue umarino melelu moleo, kumekewoio petenunu, ka tuwu me'urumako i aro-Do Ue Alamu?”

⁹ Rongeomo, Ondae i Ue mebooliakono kota: Tedoa moiko dumoitoakono nee-Do, ”Rongeomo, oo tongku ka mia a ngkota!

¹⁰ Kombake a rahano mia mosa'o gauno da hinao arataa mosa'oa ka ponsa'u efa anu makura ka tetotonaa atuu?

¹¹ Nde Aku mokomenteeo ke pontimba nahi mentee ke kadu-kadu me'ihi watu pontimba anu nahi sompo?

¹² Luwuno mia mompoli i kota atuu mpoweweu hadio pobobarasaia, palilino mpegaupi ka elo a laro ngangado bukeako pompopo'oo.

¹³ Ongkue mbo'u sumepiko ranta mahaki, lumondahiko hangano halamu.

¹⁴ Omue komongkaa, sine nahi komowohi, ka mokoninggoa kongko mpiha ndi omue; omue komompekaria hapa-hapa, sine nahi upokokaduduio, ka hapa anu pinokokaduduimu Aku meweengakono a mponai.

¹⁵ Omue komorawo inii, sine nahi kosumowi, omue komonsesa wua saitu, sine nahi ko'umurapiakono lana koroimu; ke monsesa wua anggoro, sine nahi komo'inu anggorono.

¹⁶ Omue metakokomo a luwuno pompakosino i Omiri ka a luwuno wineweuno somborino i Ahabi. Omue moweweukomo montonda tinoodo, ranta Kuweweuko gagi londa ka palilimu gagi pontiiano pomansu; kanandiomo komiu mentembio pontatado bawaa-Ku.”